Zeremi 41 - Bibeli do fee

¹ Ŋɔi si cukpa mɛɛjesia, Isimaɛli amai Netania iyi wa jɛ tɔkui Elisama hai si dimii ilaalu ŋau í naa Misipa nŋu do inɛ ngbo ŋa iyi à wa bi ilaaluu do amanɛ mɛɛwa gɔ ŋa bi Gedalia amai Ahikamu. Misipa bɛi aŋa fei à jɛ ajɔ.

² Ŋɔi Isimaɛli í dede anu akã waati iyi à waa jɛ nŋu do inɛ mɛɛwa ŋa iyi à suu wau à gũ Gedalia amai Ahikamu tɔkui Safãau do taakuba à kpaa. Do yaase bɛɛbɛi à cã inɛ iyi ilaalui Babilɔni í cica í jilɛ si ilɛu à kpaa.

³ Si anyiɛ, Isimaɛli í kpa inɛi Zudaa ŋa iyi à wa Misipa bi Gedaliau fei. Nɔ í kpa inɛmɔkɔ woo ja igũi Kaladee ŋa iyi à wa bɛ fei.

Isimaɛli í kpa woo ce isɛɛnɛ cinɛ gɔ ŋa

⁴ Si ajɔ minjisiai kukpai Gedalia, hai waati iyi inɛ gɔ kù gbɔ ide kãma,

⁵ inɛ cinɛ gɔ ŋa à naa hai Sikɛmu do hai Siloo do hai Samari. Inɛ ŋau à wa agbã nŋa ŋa à bɛi à dasi ibɔ ku ga ŋa nɔ à bububu ara nŋa ŋa. Inɛ ŋau à waa mu amua ŋa do tuae iyi aa koo a ceò kuwee si inɔ kpasɛ̃i Aɔ̃ Lafɛ̃ɛ.

⁶ Ŋɔi Isimaɛli amai Netaniau í fita hai Misipa í nɛ wa bɔ waju nŋa do kukpata. Waati iyi í to bi tu ŋa, ŋɔi í sɔ̃ ŋa í ni, i naa wa ŋa ka bɔ bi Gedalia amai Ahikamu.

⁷ Amma waati iyi à to si aninii iluu, Isimaɛli amai Netaniau do inɛ ŋa iyi à wa bi titɛɛ ŋau à saka ŋa nɔ à so ŋa à kosi si inɔ isa bii à ya dasi inyiu.

⁸ Amma si inɔ nŋa, inɛ mɛɛwa gɔ ŋa à sɔ̃ Isimaɛli à ni, maà kpa wa, domi à nɛ kosĩa ŋa wa singa inɔ sako. À nɛ bilee do ɔɔzu do ikpo do nyikɔ̃. Ŋɔi Isimaɛli í bɛi í jɔ̀ ŋa kù kpa ŋa do kpaasi nŋa ŋau má.

⁹ Tengi bii Isimaɛli í jɔ̀ à kosi inɛ ŋa iyi í kpau, isa nla nla gɔi iyi à tu. Ilaalu Azai í jɔ̀ à tuu si waati iyi aŋaò Baesa ilaalui Izirɛli à waa ce igũ. Tengi bɛi Isimaɛli í kosi iku ŋau hee í kɔ̃.

¹⁰ Si anyii nŋu, Isimaɛli í mu inɛi Misipa ŋa iyi à gbe ŋau fei aru í nɛò ŋa. Í mu ama inaabo ŋa iyi ilaaluu í nɛ fei, hee do zamaa iyi í gbe Misipa, aŋa iyi Nebuzaradãa inɛ ngboi woo degbe kpasɛ̃i ilaalu í daa Gedalia si awɔu. Isimaɛli í mu inɛ ŋaui í nɛò ŋa ikpa bi inɛi Amɔɔ ŋa.

Inɛ ŋa iyi Isimaɛli í mu aru ŋau à nɛ ara nŋa

¹¹ Yohanaa amai Karea do inɛ ŋa iyi à jɛ inɛ ngboi sooge ŋa iyi à wa bi titɛɛ ŋau fei, à gbɔ ide laalɔ ŋa iyi Isimaɛli í ceu fei.

¹² Ŋɔi à gbã inɛ nŋa ŋa à bɔ igũ si Isimaɛli. Si isɛɛnɛ nŋau, à koo à baai bi inyi nlai Gabaɔ̃ɔu.

¹³ Waati iyi inɛ ŋa iyi Isimaɛli í mu aru ŋau à hɔ̃nnɛ Yohanaa amai Karea do inɛ ngboi sooge ŋau wa à wɛɛò inɔ didɔ̃i ntɔ ntɔ.

¹⁴ Ŋɔi inɛ ŋa iyi Isimaɛli í mu aru wa hai Misipa ŋau fei à sinda à nyi bi Yohanaa.

¹⁵ Amma Isimaɛli í ba í sa hai si wajui Yohanaa do amanɛ mɛɛjɔ í nɛ ikpa bi inɛi Amɔɔ ŋa.

¹⁶ Si anyiɛ, ŋɔi Yohanaa do inɛ ngboi sooge ŋa iyi à suu wa ŋau à gba inɛ ŋa iyi Isimaɛli í mu wa hai Misipa si anyii kukpai Gedaliau. Í gba sooge ŋau do inaabo ŋau do amu ŋau do akawe ŋau. Inɛ ŋau bɛ fei, í baaò ŋa wai hai Gabaɔ̃ɔ.

¹⁷ Ŋɔi à mɔsi isɛɛnɛ nŋa, nɔ à koo à leekĩ hee bi ku sɔi inɛ njoo ŋa Kimuhamu kɔkɔi Betelehɛmu, si anyiɛ nɔ à dasi idɔ aŋa a bɔ hee ilɛi Ezibiti

¹⁸ nɔ aŋa a jĩò inɛi Kaladee ŋa iyi njo wa mu ŋa siu, si na iyi í jɔ̀ Isimaɛli amai Netania í tako í kpa Gedalia amai Ahikamu iyi ilaalui Babilɔni í cica í jilɛ si ilɛu.