Zeremi 40 - Bibeli do fee

Zeremi í koo í buba Misipa

¹ Si anyii iyi Nebuzaradãa inɛ ngboi woo degbei ilaaluu í jɔ̀ Zeremi í nɛ hai Rama, Aɔ̃ Lafɛ̃ɛ í ba Zeremi ide ku fɔ. Si waati iyi í jɔ̀ à mu Zeremiu, à dũui do sesee à dasiɛ si inɔi inɛ ŋa iyi à mu hai Zeruzalɛmu do Zudaa à waa nɛò ŋa Babilɔniu. Ŋɔi inɛ ngboi woo degbe ŋau í nyaa wa hai si inɔi inɛ ŋau.

² Ŋɔi Nebuzaradãau í kpe Zeremi í sɔ̃ɔ í ni, Aɔ̃ Lafɛ̃ɛɛ í tako í sɔ̃ɛ idei wahala iyi á naa si iluu ihɛ̃.

³ Nsɛi wee Aɔ̃ Lafɛ̃ɛ í jɔ̀ ide iyi í tako í fɔ si gãmɛ nŋɛu í naa si ŋɛ. Í ce bɛɛbɛi si na iyi í jɔ̀ ì ce dulum bi Aɔ̃ Lafɛ̃ɛ nɔ i kù jɛ ideɛ ku gbɔ ŋa. Na ŋɔi í jɔ̀ ide iyi í fɔu fei í ba ŋɛ.

⁴ Nsɛi bɛbɛi, an nyaɛ sesee ŋa iyi à wa si awɔɛ ŋaui. Nɔ bii í jɛ aa jɛsi awaɛ ka bɔ ilɛi Babilɔni, naa wa ka koo, amui an maa n ce kaasãɛ. Bii í nɔ í jɛ kù yeɛ awaɛ ka koo mɔi, maà naa. Awɔ de cɔ ilɛu fei wee í wa si wajuɛ. Tengi bii ì bi, bii í sĩaɛ si, bɛi aa bɔ.

⁵ Amma si bɛi Zeremi kù waa nɛ, ŋɔi Nebuzaradãa í ni má, sinda i nyi bi Gedalia amai Ahikamu tɔkui Safãa iyi ilaalui Babilɔni í jɔ̀ í jɛ inɛ ngboi ilui Zudaa ŋau. Si ilɛ nŋau bɛ, koo buba tengi bii í sĩaɛ si. Ŋɔi Nebuzaradãau í na Zeremi mii ku jɛ ŋa do amua ŋa í bɛi í jɔ̀ í nɛ.

⁶ Ŋɔi Zeremi í nɛ ikpa Misipa bi Gedalia amai Ahikamu í koo í buba bi titɛɛ bɛ si inɔi inɛi ilu ŋa iyi à gbe si ilɛu.

Inɛi Zudaa ŋau à tɔtɔɔ bi Gedalia bɛ

⁷ Ŋɔi inɛ ngboi sooge ŋa iyi à wa si ilɛɛko ŋau do inɛ nŋa ŋa à gbɔ iyi ilaalui Babilɔni í so Gedalia amai Ahikamu í jilɔɔ ku jɛ inɛ ngboi ilɛu, nɔ í so ilu are ŋa hai inɛmɔkɔ ŋa do inaabo ŋa do amu ŋa iyi a kù mu a kù nɛò Babilɔni ŋau í daa si awɔ.

⁸ Ŋɔi inɛ ngboi sooge ŋau à koo à ba Gedalia ilui Misipa bɛ. Inɛ ngbo ŋau wee. Isimaɛli amai Netania do Yohanaa do Zonatãa aŋa minji fei amai Karea ŋa, do Seraya amai Tãhumɛti, do amai Efai ŋa inɛi ilui Netofaa ŋa, do Yaazania amai inɛi ilui Maaka gɔ, aŋa do inɛmɔkɔ nŋa ŋa.

⁹ Ŋɔi Gedalia amai Ahikamu tɔkui Safãau í sɔ̃ aŋa do inɛmɔkɔ nŋa ŋau ide do kugbasi í ni, i maà ce njoi inɛi Kaladee ŋau ku cea icɛ ŋa. I gbe si ilɛu ŋa nɔ i cea ilaalui Babilɔniu icɛ ŋa. Do yaase bɛɛbɛ, aa maa wɛɛ nŋɛi do laakai ku sũ.

¹⁰ Amu ǹ wa Misipa ihɛ̃i do iri nŋɛ bi inɛi Kaladee ŋa iyi aa naa bi tu wa. Amma iŋɛ, i ya ka isoi rezɛ̃ɛ nŋɛ ŋa. Iso ŋau do ikpo ŋau fei i ya jilɛ kosĩaɛ nɔ i sinda i nyi i buba si ilu bii ì wa ŋau ŋa.

¹¹ Bɛɛbɛ mɔi inɛi Zudaa ŋa iyi à tako à wa Moabu bi inɛi Amɔɔ ŋau fei do inɛ ŋa iyi à wa Edɔmu do si ilɛ mmu ŋa fei à gbɔ iyi ilaalui Babilɔni í jɔ̀ inɛ mbɔ gɔ ŋa si ilɛi Zudaa, nɔ í so Gedalia amai Ahikamu tɔkui Safãa í jilɔɔ í jɛ inɛ ngboi ilɛu.

¹² Ŋɔi inɛi Zudaa ŋau fei à baa hai inya ŋa bii à tako à fangaa à nɛu, nɔ à nɛ ikpa ilɛi Zudaa bi Gedalia do ikpa Misipa. Nɔ tengi bɛ, à ba isoi rezɛ̃ɛ do isoi jĩi nkpɔ nkpɔ à ka.

À kpa Gedalia

¹³ Ŋɔi Yohanaa amai Karea do inɛ ngboi sooge ŋa iyi à wa si ilɛɛko ŋau à naa bi Gedalia ilui Misipa bɛ.

¹⁴ Iyi à to wa nɔ à beeɛ à ni, ì mà iyi Baalisi ilaalui inɛi Amɔɔ ŋau í bɛ Isimaɛli amai Netania wa ku naa ku kpaɛ? Amma Gedalia amai Ahikamu kù dasi ŋa naanɛ.

¹⁵ Nɔ Yohanaa amai Kareau í koo í ba Gedalia Misipa bɛ si asii í sɔ̃ɔ í ni, jɔ̀ n koo n ba Isimaɛli amai Netaniau n cãa n kpaa, nɔ inɛ kãma ku maà mà. Na mii í ce aa jɔ̀ ku cã ku kpaɛ. Bii í cã í kpaɛ, inɛi Zudaa ŋa iyi à tɔtɔɔ bi titɛɛ ŋau fei aa fangaa a koo a ce nfei.

¹⁶ Ŋɔi Gedalia amai Ahikamuu í jɛa Yohanaa amai Karea í ni, maà ce bɛɛbɛ domi ide iyi ì waa fɔaa Isimaɛliu bɛ, iboi.