Zeremi 4 - Bibeli do fee

¹ Ŋɔi Aɔ̃ Lafɛ̃ɛ í ni, awɔ Izirɛli bii ì sinda ì nyi wa bi tom, nɔ i kù waa mɔsi do laalɔɛ ŋau ku ce si wajum, i kaa nɛ i maa sa hai nɛ kɔɔ má.

² Bii ì fɔ do kugbasi ì ni, Aɔ̃ Lafɛ̃ɛ í wɛɛ, nɔ ì fɔɔi do idɔ iyi í má do ntɔ do dee dee ku jɛ, aa yɛ inɛi ilɛ mmu ŋa aa tɔɔ n weea aŋa nɔ aa tɔɔ fufu na irim.

³ Ntɔ ntɔ, bɛi ǹ sɔ̃ inɛi Zudaa ŋa do inɛi Zeruzalɛmu ŋa wee. Ǹ ni, i da kokosi titɔ̃ ŋa, nɔ i maà gbɛ̃ si inɔi agũ ŋa.

⁴ I ce bango na irii Aɔ̃ Lafɛ̃ɛ ŋa, i jɔ̀ idɔ kulele nŋɛ ŋau nɔ i naa ara nŋɛ iŋɛ inɛi Zudaa do inɛi Zeruzalɛmu ŋa, ku ba idɔɔkɔ̃m ku maà lu wa bɛi ina nɔ ku maà jo hee a mɔngɔ ku kpaa, na inɔ kukã ku ce nŋɛ.

Anu ku dɔ̃i gooba si ilɛi Zudaa

⁵ I cã kɛsɛɛdɛ si ilɛi Zudaa ŋa. I dɔ̃ anu si ilui Zeruzalɛmu ŋa. I fã kuu si ilɛu. I dɔ̃ anu hee lele i ni ŋa, i tɔtɔɔ wa ka sa ka bɔ si ilu ku nɛ bindi ku nɛ gbugbã ŋau ŋa.

⁶ I wu tuuta ikpa Siɔ̃ɔ. I sa, i maà leekĩ ŋa, domi ǹ jɔ̀ laalɔ wa naa hai do awɔ njɛi kpãai inunu, do tɔtɔ ku fɔ nla nla.

⁷ Woo ce nfei ilɛ ŋau wa nɛ wa bɛi muusu nla iyi í fita wa hai inɔ kubuɛ. Í dede wa hai inyaɛ ku ba ku ce nfei ilɛɛu. Iluɛ ŋa aa ce kuku, nɔ inɛ kãma kaa wa si.

⁸ Na nŋu, i bii ara nŋɛ do saaki, i kpata nɔ i ŋɔ inyí ŋa, domi idɔɔkɔ̃ nla nlai Aɔ̃ Lafɛ̃ɛu kaa jɔ̀ wa.

⁹ Aɔ̃ Lafɛ̃ɛ í ni, ajɔ nŋu bɛ, ilaalu do akaweɛ ŋa aa mɔngɔ temua. Woo wee ŋa aa biti, nɔ walii ŋa a kaa mà iyi à waa ce.

¹⁰ Ŋɔi ǹ ni, Aɔ̃ Lafɛ̃ɛ, debɛi ì lɛlɛ zamaau do inɛi Zeruzalɛmu ŋaui iyi ì ni, aa ba laakai ku sũ, nɔ waati nŋui taakuba wa kpa ŋa.

Mbɛɛ ŋau à faata wa do bii fei

¹¹ Waati nŋui Aɔ̃ Lafɛ̃ɛ á sɔ̃ zamaau do inɛi Zeruzalɛmu ŋau ku ni, fufu gbãa gɔ í dede wa hai do ikpa gbaau, si zamaam ŋau. Kù jɛ wa naa ku fɛ ijui amaajɛ walakɔ ku teeseɛ.

¹² Fufu ku nɛ gbugbã gɔi amu Aɔ̃ Lafɛ̃ɛ ǹ jɔ̀ í dede wa naa hai bɛ. Nsɛi, amui an kiiti ŋa.

¹³ Woo bɛjɛu wee wa nɛ wa bɛi kudũi ijĩ. Sarɛtiɛ ŋau à yɛi bɛi fufu dabii. Acĩɛ ŋa à gbãa à re baa katɔ. Laalɔi aa ka yɛ, domi à ce nfe mbɛ.

¹⁴ Zeruzalɛmu, bii ì bi i ba faaba, wiɛ idɔɛ. Mà hee waati yoomai ì waa bi i maa mu lasabui laalɔ ku ceɛ ŋau si idɔɛ.

¹⁵ Ntɔ ntɔ ide iyi wa naa hai Dãa wa fɔ bɔ̃nɛ iyi wa naa hai antaii iri kutai Efaraimuu.

¹⁶ I koo i sɔ̃ inɛi ilɛ ŋau ŋa nɔ i jɔ̀ inɛi Zeruzalɛmu ŋau a gbɔ. Mbɛɛ ŋa à waa naa hai ilɛ jĩijĩ gɔ, à waa dɔ̃ anu si ilui Zudaa ŋa wa.

¹⁷ À waa kaako Zeruzalɛmui bɛi inɛ ŋa iyi à waa degbe iko, domi iluu í kɔ̀si amu Aɔ̃ Lafɛ̃ɛɛ.

¹⁸ Zeruzalɛmu, mii iyi wa baɛ, wa naai hai si kuceɛ do si inɔ kukãɛ. Ntɔ ntɔ wahala iyi í baɛu í caa, nɔ wa gũɛi hee si idɔ.

Zeremi wa ce bɔ̃ɔ na wahala iyi í yɛ wa naa

¹⁹ Inɔm wa dɔ̃m. Ǹ wa n kakaa do ara kuro. Idɔm wa gba hee wa bi ku la. Laakaim nii í dede. N kaa n yɔkɔ n coko. Ǹ gbɔ imui kuu do anu ku dɔ̃i igũ wa.

²⁰ À fɔ idei wahala iyi í naa. Ilɛu fei í ce nfe. À kɛkɛ ilei acɔ nwa ŋa anu akã. À kɛkɛ bi kuwa nwa ŋaui si iju kãmɛɛ.

²¹ Hee waati yoomai an yɛ tuutau, nɔ n maa n gbɔ anui kuu.

²² Aɔ̃ Lafɛ̃ɛ í ni, ntɔ ntɔ zamaam nɔu í sũmui, kù màm. Ama nnyɛi ŋai, a kù nɛ bisi. Bisii laalɔ ku cei à nɛ. Amma a kù mà jiida ku ce.

²³ Ŋɔi ǹ cɔ ilɛu, nɔ ǹ ba wee kù nɛ yaase, nkãma kù wa si. Lele mɔ kù nɛ inya kumá má.

²⁴ Ǹ cɔ iri kuta nla ŋau, nɔ ǹ ba wee à yaga. Nɔ geete ŋa mɔ fei à waa yaga.

²⁵ Ŋɔi ǹ cɔ ilu nɔ n kù yɛ amanɛ kãma má. Nɔ yɛi ŋau fei à sa.

²⁶ Ŋɔi ǹ cɔ ilu má, nɔ ǹ ba wee ilɛ ku nɛ taasiu í baa í kpɔò gbaa. Nɔ à lɛgɛ iluɛ ŋau fei. Aɔ̃ Lafɛ̃ɛi í jɔ̀ iyi bɛ í ce si idɔɔkɔ̃ nla nlaɛ,

²⁷ domi bɛɛbɛi nŋu takaɛ í fɔ í ni nŋu á ce nfei ilɛui, amma nŋu kaa ce nfeɛ fei mam mam.

²⁸ Na ŋɔi í ce ilɛ í wa si inɔ kufɔi iku, nɔ lele í kuku. Nɔ Aɔ̃ Lafɛ̃ɛ í ni, ntɔ ntɔ bɛɛbɛi ǹ fɔ, nɔ ǹ coo. N kaa n nɔ n kpaasiɛ, nɔ n kaa n baa do anyi pai.

Siɔ̃ɔ í wa si wajui woo kpa inɛ ŋa

²⁹ Iyi inɛi ilu ŋau fei à gbɔ ibai masa ŋau do ti woo ta afa ŋau, ŋɔi à waa saa. Inɛ gɔ ŋa à waa lɔ si inɔ cucu ŋa, inɛ gɔ ŋa mɔ à waa gũ antaii kuta ŋa. À jɔ̀ ilu ŋau fei ngbɛ. Inɛ kãma kù gbe bɛ má.

³⁰ Awɔ Zeruzalɛmu iyi à ce nfeɛ, mii aa ce. Ì waa dasi jĩnɛ kusĩaɛ ŋa do sabai wura. Ì dasi cio si ijuɛ ku ba ku cĩ ku ce ncɛɛ. Amma si ngbɛi ì waa ce booda ŋau bɛ fei. Inɛ ŋa iyi à nɛ kubiɛ ŋau wo, a kù biɛ má, hundeɛi à waa dɛdɛ ku nya.

³¹ Ntɔ ntɔ ǹ wa n gbɔ anu ku dɔ̃ bɛi anu ku dɔ̃i inaabo iyi wa bi ku bí. Anu ku dɔ̃u í jɔ ti inaabo iyi wa bi ku bí ama sinteɛ. Siɔ̃ɔ iyi í yɛ bɛi mudɛ̃ɛu wa dɔ̃ anu wa kakaa nɔ í yɔ awɔ wa tɔɔ faaba wa ni, inɔ kufɔi í jɛ titom. Ǹ wa n ku na goloi woo kpa inɛ ŋau.