Zeremi 39 - Bibeli do fee

¹ Si adɔ̃ mɛɛsãsiai bomma ku jɛi Sedesiasi ilaalui Zudaa, si cukpa mɛɛwasiaɛi Nebukanɛsaa ilaalui Babilɔni í naa Zeruzalɛmu do soogeɛ ŋa fei à naa à bu iluu koe.

² Ŋɔi si adɔ̃ maatakãsia si ajɔ mɛɛsãsia si cukpa mɛɛsiaɛ, inɛi Babilɔni ŋau à lu idĩi bindii iluu.

³ Nɔ gbakã inɛ ngboi soogei ilaalui Babilɔni ŋau à lɔ inɔ iluu à koo à buba bi koofa iyi à ya kpe koofai aninii iluu. Inɛ ŋa iyi à lɔ à koo bɛ ŋau wee. Nɛɛgali-Sarɛsɛɛ iyi wa jɛ inɛ ngboi woo bɛ ŋau do Samugaa-Nebo do Saasekimu inɛ iyi ilaaluu wa naanɛ wa re do inɛ ngboi soogei Babilɔni ŋa iyi à gbe ŋau fei.

⁴ Hai Sedesiasi ilaalui Zudaa do soogeɛ ŋau à yɛ ŋa gbakã, nŋu do woo ce igũ ŋau fei à sai. Waati iyi idũ í dũ à bɛi à too kpãai lamboi ilaaluu à fita hai inɔ iluu. Andɛ iyi í wa si aninii bindi minjiu bɛi à fitaò, nɔ à too kpãa iyi í wa do ikpa lɔɔmai Zuudɛ̃ɛ.

⁵ Amma soogei inɛi Kaladee ŋau à da hãmɛ nŋa nɔ à koo à mu Sedesiasi hee si lɔɔmai Zerikou. Ŋɔi à muu à nɛòɛ bi Nebukanɛsaa ilaalui Babilɔni ikpa Ribula si ilɛi Amati. Tengi bɛi Nebukanɛsaa í kiiti Sedesiasi.

⁶ Tengi bɛ mɔi í jɔ̀ à saka amai Sedesiasi ŋau si wajui Sedesiasi takaɛ bɛ. Nɔ í jɔ̀ à saka inɛ ngboi Zudaa ŋau mɔ fei.

⁷ Si anyii nŋu, nɔ í jɔ̀ à lɛgɛ ijui Sedesiasi nɔ í jɔ̀ à dũu do sesee à nɛòɛ ilɛi Babilɔni.

⁸ Ŋɔi inɛi Kaladee ŋau à dasi kpasɛ̃i ilaaluu ina do ti inɛi ilu ŋau fei. Nɔ à lɛgɛ bindii Zeruzalɛmu ŋau.

⁹ Si anyii nŋu, zamaa iyi í gbe si inɔ iluu do inɛ ŋa iyi à fita à koo à ba ŋa ŋau, Nebuzaradãa inɛ ngboi woo degbe ilaaluu í gbã ŋa í nɛò ŋa ilɛi Babilɔni.

¹⁰ Amma inɛ mbɔ ŋa iyi à jɛ ilu are ŋa iyi a kù nɛ nkãmau, Nebuzaradãa inɛ ngboi woo degbe ilaaluu í jɔ̀ à wɛɛ nŋa si ilɛi Zudaau nɔ í na ŋa ikoi jĩi ndii rezɛ̃ɛ ŋa nɔ í na ŋa iko ŋa.

À jɔ̀ Zeremi í nɛ araɛ

¹¹ Nebukanɛsaa ilaalui Babilɔniu í na wooda si gãmɛi Zeremi, nɔ woodau Nebuzaradãa inɛ ngboi woo degbeɛ ŋaui í sɔ̃ í ni,

¹² muu, nɔ i dasiɛ iju. Maà cea laalɔ kãma, amma bɛi á sɔ̃ɛ fei, cea bɛɛbɛ.

¹³ Ŋɔi Nebuzaradãa inɛ ngboi woo degbe ilaaluu nŋu do Nebusabãa inɛ ngboi akawe ŋau à gbɔsi njɛ aŋa do Nɛɛgali-Sarɛsɛɛ ŋa nŋu iyi wa jɛ inɛ ngboi sooge ŋau do inɛ ngboi soogei Babilɔni mmu ŋa iyi à gbe ŋau.

¹⁴ Aŋau bɛi à na wooda à ni a koo gbã Zeremi wa hai bantumai kpasɛ̃i ilaaluu nɔ a soo a daa Gedalia amai Ahikamu si awɔ. Gedaliau tɔkui Safãai wa jɛ. Gedaliaui í gbãa í nɛòɛ ide nɔ í koo í wa si inɔi zamaai ilɛu.

Laabaau iyi í jɛ ti Ebɛdi-Melɛki

¹⁵ Aɔ̃ Lafɛ̃ɛ í ba Zeremi ide ku fɔ si waati iyi à muu í wa bantumai kpasɛ̃i ilaaluu í ni,

¹⁶ koo ba Ebɛdi-Melɛki inɛi Etiopiu i sɔ̃ɔ i ni, amu Aɔ̃ Lafɛ̃ɛi inɛi Izirɛli ŋau, amu iyi ǹ taka lele do ilɛ, ǹ fɔ wo ǹ ni, laalɔi á na ku ba iluu ihɛ̃, kaa jɛ jiida. Nsɛi, an jɔ̀ laalɔu ku to wa. Fei ndɛɛ á na ku cei ijuɛ ku yɔɔ.

¹⁷ Amma si ajɔ iyi laalɔu bɛ á to wa, amu Aɔ̃ Lafɛ̃ɛi an faabaɛ nɔ i kaa dasi awɔi inɛ ŋa iyi njo wa muɛ siu.

¹⁸ Amui an jɔ̀ i fita si a maà kpaɛ nɔ i wɛɛ si hunde, domi ì dasi amu Aɔ̃ Lafɛ̃ɛ naanɛ.