Zeremi 38 - Bibeli do fee

À so Zeremi à sɔsi lɔgɔ hai nɛ inyi

¹ Ŋɔi Sefatia amai Matãa do Gedalia amai Pasehuu do Yukali amai Selemia do Pasehuu amai Malikia à gbɔ ide ŋa iyi Zeremi í ya maa sɔ̃ zamaai iluu ku maa ni,

² Aɔ̃ Lafɛ̃ɛ í fɔ í ni, inɛ baa yooma iyi í gbe si inɔ iluu ihɛ̃ fei, á kui si igũ, walakɔ do ari, walakɔ si patapoo. Amma inɛ iyi í fita í koo í na inɛi Kaladee ŋa araɛ, lafɛ̃ɛ á ba ku fita si nɔ kuwɛɛɛ ku baa ku jɛaa bɛi mii iyi inɛ í ba wa hai bi ku ce igũ, nɔ á maa wɛɛ si hunde.

³ Ntɔ ntɔ Aɔ̃ Lafɛ̃ɛi wa fɔ í ni, nŋu á so iluu ihɛ̃i nŋu ku daa soogei ilaalui Babilɔni ŋau si awɔ nɔ a gbaa.

⁴ Iyi akawe ŋau à gbɔ bɛi wa fɔ, ŋɔi à sɔ̃ ilaalu Sedesiasi à ni, mɔkɔu ihɛ̃ í gbe a kpaa, domi ide ŋa iyi wa fɔu ihɛ̃ á fɔ inɔi sooge ŋa do inɛ ŋa iyi à gbe si inɔ iluui. Inɛɛu ihɛ̃ kù waa dɛdɛa zamaai iluu mii jiida, í gbe nfe ku cei zamaau.

⁵ Ŋɔi ilaalu Sedesiasi í jɛ nŋa í ni, nŋu wee í wa si awɔ nŋɛ bɛ, i cea bɛi ì bi ŋa, domi amu ilaalu n kaa n yɔkɔ n ce nkãma si gãmɛ nŋɛ.

⁶ Ŋɔi sooge ŋau à so Zeremi à sɔsiɛ si inɔ lɔgɔ hai nɛ inyi gɔ iyi à ce iyi í jɛ ti Malikia amai ilaaluu. Tengi bii à dasiɛu í wai si bantuma bii sooge ŋa à ya maa degbeu. À dasi Zeremi si inɔ bɛi do ikũ. Amma inyi kãma kù wa si inɔɛ, pɔkɔdɔ dei í nɛ, nɔ Zeremi í mile si inɔ pɔkɔdɔu.

⁷ Wee inɛi Etiopi gɔ í wa bɛ à ya kpoo Ebɛdi-Melɛki. Inɛɛu woo ce icɛ ilu naanɛi si inɔ kpasɛ̃i ilaaluu. Inɛɛu í gbɔ iyi à mu Zeremi à sɔsi inɔ lɔgɔ hai nɛ inyiu. Ilaaluu mɔ wa buba anu koofai Bɛnzamɛɛ.

⁸ Ŋɔi Ebɛdi-Melɛki í fita wa hai kabai ilaaluu, nɔ í na í ba ilaaluu ide ku fɔ í ni,

⁹ ilaalu lafɛ̃ɛm, mii iyi inɛ ŋau bɛ à ce si gãmɛi walii Zeremi fei, do yaase bɛi à soo à dasi inɔ inyau bɛ fei, mii laalɔi, nɔ á na ku ku do arii, domi sɔnda kù wa si inɔ iluu má.

¹⁰ Ŋɔi ilaaluu í na Ebɛdi-Melɛki inɛi Etiopiu wooda í ni, gbã amanɛ kuntaa hai ihɛ̃ nɔ i koo i nya Zeremi wa hai inyau bɛ hee ku maà ku.

¹¹ Ŋɔi Ebɛdi-Melɛki í gbã amanɛ kuntaa ŋau nɔ aŋaò ŋa à bɔ kabai ilaaluu, nɔ à lɔ inɔ ile bii à ya jilɛ jĩnɛ ŋa, nɔ í so jaaɛ ngbo ku ga gɔ ŋa iyi à wa bɛ do ikũ í bɛi í toa Zeremi si inɔ lɔgɔu.

¹² Ebɛdi-Melɛki í sɔ̃ Zeremi í ni, gba jaaɛ ngbo ŋau ihɛ̃ do ikũu i dasi fokoloi ikpaɛ ŋa. Nɔ Zeremi í ce bɛi í sɔ̃ɔu.

¹³ Ŋɔi inɛ ŋau à fa Zeremi wa do ikũu à nyaa wa hai inɔ lɔgɔu. Nɔ Zeremi í wa bantumai kpasɛ̃ bii sooge ŋa à ya maa degbeu.

Ilaalu Sedesiasi í nyi í bee Zeremi ide má

¹⁴ Ilaalu Sedesiasi í bɛ inɛ ŋa í ni a koo a kpe walii Zeremi wa. Iyi Zeremi í to wa, à gbã à bɔòɛ hee si bi kulɔ mɛɛtasiai kpasɛ̃i Aɔ̃ Lafɛ̃ɛu. Nɔ ilaaluu í sɔ̃ Zeremi í ni, ide gɔi ǹ wa n bi n beeɛ nɔ i maà singaam nkãma.

¹⁵ Ŋɔi Zeremi í jɛa Sedesiasi í ni, bii ǹ bɛi ǹ sɔ̃ɛ i kaa na i jɔ̀ a kpam? Nɔ baa bii ǹ naɛ ikɔ gɔ i kaa ceò icɛ.

¹⁶ Nɔ ilaalu Sedesiasi í cea Zeremi kugbasi do asii í ni, na irii Aɔ̃ Lafɛ̃ɛ iyi í jɛ inɛ iyi í wɛɛ nɔ í jɔ̀ à wɛɛ, ntɔ ntɔ n kaa n jɔ̀ a kpaɛ, nɔ n kaa n soɛ n daa inɛ ŋa iyi à waa dɛdɛ ku kpaɛ ŋau bɛ si awɔ.

¹⁷ Ŋɔi Zeremi í sɔ̃ Sedesiasi í ni, Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í ni, bii ì fita ì kooò araɛ bi inɛ ngboi soogei ilaalui Babilɔni ŋau, aa fita si awɔ do inɛi kpasɛ̃ɛ ŋa, nɔ a kaa ce nfei iluu do ina má.

¹⁸ Amma bii ì kɔ̀ ku fita ku kooò araɛ bi inɛ ngboi soogei ilaalui Babilɔni ŋau, iluu ihɛ̃ á dasi awɔi inɛi Kaladee ŋai, nɔ aa dasi inai a joo, nɔ awɔ takaɛ i kaa fita hai si awɔ nŋa.

¹⁹ Ŋɔi ilaalu Sedesiasi í sɔ̃ Zeremi í ni, zigiidam í wai si gãmɛi inɛi Zudaa ŋa iyi à so ara nŋa à daa inɛi Kaladee ŋau si awɔ. Zigim wa dai a maa na a som a da nŋa si awɔ nɔ a wahalam.

²⁰ Ŋɔi Zeremi í jɛa í ni, aawo, a kaa soɛ a da nŋa si awɔ. Sotĩ i gbɔ ide iyi Aɔ̃ Lafɛ̃ɛ wa sɔ̃ɛ si ide iyi ǹ wa n fɔ. Aa fita si mbɛ nɔ i wɛɛ si hunde nkãma kaa ceɛ.

²¹ Amma bii í jɛ ì kɔ̀ ku fita, ide iyi Aɔ̃ Lafɛ̃ɛ í sɔ̃m iyi á na ku baɛ wee.

²² Inaabo ŋa iyi à wa kpasɛ̃i ilaalui Zudaa ŋau fei, aa gbã ŋai a kooò ŋa bi soogei ilaalui Babilɔni ŋau nɔ aa maa nii, ì jɔ̀ inɛ ŋa iyi à waa fɔ idei laakai ku sũ ŋau à zambaɛ à kãmiaɛ. Nɔ waati iyi kutɛɛ í mile si pɔkɔdɔ bɛɛbɛ, à fa ara nŋa à jɔ̀ɛ.

²³ Nɔ waati bɛɛbɛ, aboɛ do amaɛ ŋau fei, aa gbã ŋai a koo a na inɛi Kaladee ŋau, nɔ awɔ takaɛ mɔ, i kaa fita si awɔ nŋa. Inɛi Babilɔni ŋau aa muɛi nɔ a dasi iluu ihɛ̃ ina.

²⁴ Ŋɔi Sedesiasi í sɔ̃ Zeremi í ni, maa jɔ̀ inɛ kãma ku gbɔ ide ŋau ihɛ̃ iyi ì sɔ̃m, nɔ inɛ kãma kaa kpaɛ.

²⁵ Bii akawe ŋau à gbɔ iyi awaɛ à fɔ ide, bii à naa à waa beeɛ à ni, sɔ̃ wa ide ŋa iyi ì koo ì sɔ̃ ilaalu do ide ŋa iyi nŋu mɔ í sɔ̃ɛ. Baa bii à sɔ̃ɛ à ni, bii i kù singa nwa nkãma a kaa ka kpaɛ,

²⁶ aa jɛ nŋai i ni, ǹ koo n tɔɔ ilaalui ǹ ni ku maà lelem ku bɔòm kpasɛ̃i Zonatãa ku ba n maà n na n ku.

²⁷ Nɔ bɛɛbɛi akawe ŋau fei à naa à bee Zeremi ide. Amma í jɛ nŋai bɛi ilaaluu í sɔ̃ɔ í ni ku jɛ nŋau. Ŋɔi aŋa fei à coko nŋa nɔ à sinda à nɛ, domi ideu kù fita gbugbãa.

²⁸ Zeremi í wɛɛi si bantumai kpasɛ̃i ilaalu bii sooge ŋa à ya maa degbeu hee ajɔ iyi mbɛɛ ŋa à gba ilui Zeruzalɛmuu. Mii iyi í na í ce si anyii iyi à gba ilui Zeruzalɛmu wee.