Zeremi 37 - Bibeli do fee

Ilaalu Sedesiasi í jɔ̀ à koo bee Zeremi ide

¹ Nebukanɛsaa ilaalui Babilɔniui í jɔ̀ Sedesiasi amai Zoziasi í jɛ bomma si ilɛi Zudaa. Sedesiasiui í sãsi agbɛi Konia amai Zoakimu.

² Amma hai nŋu takaɛ hee do soogeɛ ŋa do inɛi ilɛi Zudaa ŋa, kãma nŋa kù waa gbɔ ide ŋa iyi Aɔ̃ Lafɛ̃ɛ í jɔ̀ walii Zeremi í wasi ku sɔ̃ ŋau.

³ Nŋu de ilaalu Sedesiasiu í bɛ Yukali amai Selemia do Sofoni woo wee amai Maaseyau wa bi walii Zeremi a na a sɔ̃ɔ a ni, à naa ku tɔɔɛi i ce kutɔɔ na iri nwa bi Aɔ̃ Lafɛ̃ɛ nwa.

⁴ Waati bɛɛbɛ fei, a kù mu Zeremi a kù dasiɛ piisɔ̃ɔ titã. Wa ce isɛɛnɛɛi titã bɛi í bi.

⁵ Soogei ilaalu Faraɔ̃ ŋau à fita hai ilɛi Ezibiti, ŋɔi inɛi Kaladee ŋa iyi à bu Zeruzalɛmu koeu à gbɔ baau nŋa, nɔ à sɛkɛɛ à jĩò Zeruzalɛmu.

⁶ Ŋɔi Aɔ̃ Lafɛ̃ɛ í ba walii Zeremi ide ku fɔ í ni,

⁷ ide iyi Aɔ̃ Lafɛ̃ɛi lele do ilɛ nŋu iyi í jɛ Lafɛ̃ɛi inɛi Izirɛli ŋa í fɔ wee. Í ni, i sɔ̃ ilaalui Zudaa iyi í bɛ ŋɛ wa bi titom i na i beem ide ŋau i ni ŋa, i cɔ soogei Faraɔ̃ ŋa iyi à fita wa a naa a sobi ŋɛu à sinda à nyi Ezibiti ilɛ nŋa.

⁸ Inɛi Kaladee ŋau aa bɛi a nyi wa mbɛ a naa a cuku si ilu nŋɛu ihɛ̃. Aa jɛ ŋɛ igũ mbɛ nɔ a jo ilu nŋɛu.

⁹ Aɔ̃ Lafɛ̃ɛ í ni n sɔ̃ ŋɛ i maà cea ara nŋɛ lasabu ibo i maa ni ŋa inɛi Kaladee ŋau aa sa nŋɛ mbɛ a jĩò ŋɛ.

¹⁰ Nɔ mɔm baa bii ì jɛ soogei Kaladee ŋau fei igũ ì mɛɛ ŋa ŋa, aŋa fei aa nyi a dede má hai ilei acɔ nŋa ŋa nɔ a dasi iluu ihɛ̃ ina.

À dasi Zeremi piisɔ̃ɔ

¹¹ Si waati iyi soogei inɛi Kaladee ŋau à sɛkɛɛ à jĩò Zeruzalɛmu na soogei Faraɔ̃ ŋau,

¹² Zeremi í bi ku fitai wo hai Zeruzalɛmu ku bɔ si ilɛi Bɛnzamɛɛ ku ba ku gba tubu iyi á jɛ titɛɛ bi inɛi iluɛ ŋau.

¹³ Waati iyi í to bi anu koofai Bɛnzamɛɛu, Iriai í ba bɛ. Iriaui í jɛ inɛ ngboi woo degbe anu koofau. Amai Selemiai, nɔ wa jɛ tɔkui Hanania. Ŋɔi Iria í mu walii Zeremi nɔ í sɔ̃ɔ í ni, bi inɛi Kaladee ŋai ì waa bɔ.

¹⁴ Ŋɔi Zeremi í jɛaa í ni, iboi, kù jɛ bi inɛi Kaladee ŋai ǹ wa n bɔ. Amma Iria kù jɛaa si, nɔ í muu í bɔòɛ bi akawe ŋa.

¹⁵ Ŋɔi idɔi akawe ŋau í kɔ̃ si Zeremi nɔ à cãa à bɛi à muu à koo à cĩmboɛ si inɔ ilei Zonatãa woo kɔ tiai ilɛu, domi à sinda inyaui bi ku cĩmbo inɛ ŋa.

¹⁶ Do yaase bɛɛbɛi à dasi Zeremi si inɔ isa, nɔ í kpɛ bɛ ntɔ ntɔ.

¹⁷ Ŋɔi ilaalu Sedesiasi í jɔ̀ à kpoo wa, nɔ í gbãa í bɔò kabaɛ í koo í beeɛ ide si asii, í ni, Aɔ̃ Lafɛ̃ɛ í fɔ ide gɔ? Nɔ Zeremi í jɛaa í ni, oo. Aa dasi awɔi ilaalui Babilɔni.

¹⁸ Ŋɔi Zeremi í nyi í bee ilaalu Sedesiasi má í ni, kurara yoomai ǹ ceɛ, mà kurara yoomai ǹ ce si gãmɛi woo ce icɛɛ ŋa walakɔ si gãmɛi zamaai iluu ihɛ̃ iyi ì bɛi ì jɔ̀ à naa à dasim piisɔ̃ɔ.

¹⁹ Nɔ hee iwoi walii nŋɛ ŋau à wa, aŋa iyi à ya ce nŋɛ walii a maa ni ilaalui Babilɔni kaa naa si ilɛ nŋɛu ihɛ̃ igũ.

²⁰ Nsɛi sotĩ i gbɔ, ǹ wa n tɔɔɛi awɔ ilaalu lafɛ̃ɛm, maà jɔ̀ n sinda n nyi kpasɛ̃i Zonatãa woo kɔ tiai ilɛu má, ku ba n maà n na n ku.

²¹ Ŋɔi ilaalu Sedesiasi í ni a dasi Zeremi si bantumai kpasɛ̃u bii sooge ŋa à ya maa degbeu, nɔ ajɔ akã fei a ya naa pɛ̃ɛ akã iyi wa naa hai si kpãai woo sɔ̃ pɛ̃ɛ ŋau. Í ni si bɛi pɛ̃ɛ í wa si inɔ iluu, a ya maa naa. Do yaase bɛɛbɛi Zeremi í gbeò si bantumai kpasɛ̃u bii sooge ŋa à ya maa degbeu.