Zeremi 36 - Bibeli do fee

Zoakimu í jo tia iyi Baruku í kɔ

¹ Si adɔ̃ mɛɛsiai bomma ku jɛi Zoakimu ilaalui Zudaa iyi wa jɛ amai Zoziasi, Aɔ̃ Lafɛ̃ɛ í ba Zeremi ide ku fɔ í ni,

² so tia iyi à ya kau nɔ i kɔ ide ŋa iyi ǹ sɔ̃ɛ si gãmɛi Izirɛli do si gãmɛi Zudaa do si ilɛ ŋau fei, hai si waatii ilaalu Zoziasi iyi ǹ sinti ku baɛ ide ku fɔu hee ku baa nnyi.

³ Á yɔkɔ ku jɛ inɛi Zudaa ŋa aa gbɔ iyi ǹ wa n bi n jɔ̀ wahala ku naa si aŋai, nɔ á yɔkɔ ku jɛ aa fũsi laalɔ ku ce nŋa awɔ, nɔ n ce nŋa suurui kurara nŋa do dulum du ŋa.

⁴ Ŋɔi Zeremi í kpe Baruku amai Neria, nɔ ide ŋa iyi Aɔ̃ Lafɛ̃ɛ wa sɔ̃ɔu fei nŋu mɔ wa sɔ̃ Baruku, nɔ Baruku wa kɔ ide ŋau fei si tia.

⁵ Ŋɔi Zeremi í na Baruku wooda í ni, si bɛi à gɛɛm n kaa n yɔkɔ n bɔ kpasɛ̃i Aɔ̃ Lafɛ̃ɛ,

⁶ awɔ takaɛi aa koo nɔ idei Aɔ̃ Lafɛ̃ɛ iyi ǹ sɔ̃ɛ ì kɔɔu i cioɛ si wajui zamaau do si wajui inɛi Zudaa ŋa iyi à naa hai ilu nŋa ŋau si inɔ kpasɛ̃i Aɔ̃ Lafɛ̃ɛu si ajɔi anu ku dĩu.

⁷ Á yɔkɔ ku jɛ aa tɔɔ Aɔ̃ Lafɛ̃ɛ nɔ aŋa fei a sinda wa a jɔ̀ kuce laalɔ nŋa ŋau, domi idɔɔkɔ̃ nla nlai Aɔ̃ Lafɛ̃ɛ í wɛɛò si gãmɛi zamaau bɛ.

⁸ Ŋɔi Baruku amai Neriau í ce bɛi walii Zeremi í sɔ̃ɔu fei. Í cio idei Aɔ̃ Lafɛ̃ɛ si inɔ kpasɛ̃i Aɔ̃ Lafɛ̃ɛu.

⁹ Ide ŋau bɛ í cei si adɔ̃ miiusiai bomma ku jɛi Zoakimu amai Zoziasi ilaalui Zudaa si cukpa mɛɛsãsiai adɔ̃u. À kpe zamaai Zeruzalɛmu do ti Zudaau fei wa a naa a ce anu ku dĩu si wajui Aɔ̃ Lafɛ̃ɛ.

¹⁰ Baruku amai Neria í koo í leekĩi si inɔ ile iyi í jɛ ti Gemaria amai Safãa iyi í jɛ woo kɔ tia nwoi ilɛu. Ileu í wai si bantuma iyi í wa lelei kpasɛ̃i Aɔ̃ Lafɛ̃ɛu kɔkɔi gambo titɔ̃u. Nɔ ide ŋa iyi Zeremi í jɔ̀ à kɔ si tiau, Baruku í dede í cioɛ hee lele si wajui zamaa iyi í wa bɛu fei.

¹¹ Ŋɔi Mika amai Gemaria tɔkui Safãa í gbɔ idei Aɔ̃ Lafɛ̃ɛ iyi í wa si tiau fei,

¹² ŋɔi í nɛ í bɔ kabai ilaaluu nɔ í bɔ hee bi ku ce icɛi woo kɔ tiau. Tengi bɛi í koo í ba akawe nla ŋau fei à tɔtɔɔ. Elisama woo kɔ tiai ilɛu í wa bɛ, do Delaya amai Semaya, do Elinatãa amai Akubɔɔ, do Gemaria amai Safãa, do Sidekia amai Hanania do akawe mmu ŋa iyi à gbe ŋau fei.

¹³ Nɔ Mika í sisi nŋa ide ŋa iyi nŋu í gbɔ fei waati iyi Baruku í cio ide ŋa iyi à kɔ si tiau fei si wajui zamaau.

¹⁴ Ŋɔi akawe ŋau fei à bɛ si Baruku Yehudi amai Netania iyi wa jɛ tɔkui Selemia do tɔku gbeejisiai Kusi à ni koo sɔ̃ɔ ku naa wa do tia iyi í cio si wajui zamaau. Ŋɔi Baruku í dede í so tiau, nɔ í koo í ba ŋa bɛ.

¹⁵ Ŋɔi à sɔ̃ɔ à ni, buba nɔ i cioɛ wa ka gbɔ. Ŋɔi Baruku í buba í cio nŋa.

¹⁶ Waati iyi à gbɔ ide ŋau fei, ŋɔi à sinda à waa cɔ njɛ akã akã do zigiida, nɔ à sɔ̃ Baruku à ni, aa ka sisia ilaalu ide ŋau ihɛ̃ fei.

¹⁷ Ŋɔi à bee Baruku à ni, sisi nwa yaase bɛi wa sɔ̃ɛ ide ŋau bɛ fei ì bɛi ì kɔɔ.

¹⁸ Nɔ Baruku í jɛ nŋa í ni, wa fɔ ide ŋau feii hee lele, nɔ amu mɔ ǹ wasi ku kɔɔ si tiau ihɛ̃ do inyii ìlìlì.

¹⁹ Ŋɔi akawe ŋau à sɔ̃ Baruku à ni, koo i manji awɔ do Zeremi fei nɔ inɛ kãma ku maà mà bii ì wa ŋa.

²⁰ Si anyiɛ nɔ aŋa taka nŋa à dede à bɔ ikpa kpasɛ̃ bi ilaaluu nɔ à jɔ̀ tiau wa jilɛ inɔ ile bi ku ce icɛi Elisama woo kɔ tiau nɔ à sisia ilaalu ide ŋau fei.

²¹ Ŋɔi ilaalu í bɛ Yehudi koo so tiau wa. Nɔ Yehudi í koo í soo wa hai ile bi ku ce icɛi Elisama woo kɔ tiau í naa í cioɛ si wajui ilaalu do si wajui akawe ŋa iyi à wa bi ilaaluu fei.

²² Si bɛi si cukpa mɛɛsãsiai adɔ̃i à wa si, ilaaluu í wai inɔ ile bi kuwai sukui tũtũ kɔkɔi jɛɛ si bii ina í wa.

²³ Bɛi Yehudi í cio tiau wa koo, waati iyi í ba í cio kukɔ fii mɛɛta walakɔ fii mɛɛ fei, ilaaluu í ya bu fii nŋu ŋau bɛi do mii ku bu tia ku maa dasi ina iyi í wa si jɛɛ kɔkɔɛu hee í koo í joò tiau fei í kpa iriɛ.

²⁴ Waati iyi ilaaluu do woo ce icɛɛ ŋau fei à gbɔ ide ŋau, zigi nŋa kù da, nɔ a kù ga ibɔ nŋa ŋa.

²⁵ Do nŋu fei, Elinatãa do Delaya do Gemaria à tɔɔ ilaaluu à manteɛ à ni ku maà jo tiau, amma í kɔ̀ ku gbɔ ide nŋa.

²⁶ Nɔ mɔm í na Yerameɛli amaɛu wooda do Seraya amai Aziriɛli do Selemia amai Abudeɛli í ni a mu Baruku woo kɔ tiau wa do walii Zeremi. Amma Aɔ̃ Lafɛ̃ɛ í singa ŋa.

²⁷ Si anyii iyi ilaaluu í jo tia si bii Baruku í kɔ ide ŋa iyi Zeremi wa sɔ̃ɔu, Aɔ̃ Lafɛ̃ɛ í ba Zeremi ide ku fɔ í ni,

²⁸ so tia mmuɛ má nɔ i kɔ si ide ŋa iyi í wa si ti takou fei iyi Zoakimu ilaalui Zudaa í jou.

²⁹ Si gãmɛi Zoakimu ilaalui Zudaau aa fɔi i ni, Aɔ̃ Lafɛ̃ɛ í ni, awɔ Zoakimu awɔi ì jo tia iyi à kɔu. Nɔ ì ni, Zeremi na mii í ce ì kɔ ide ŋau ihɛ̃ ì ni ilaalui Babilɔni á naa kù nɛ sika kãma, á lɛgɛ iluui nɔ ku ce nfei amanɛ do mɛɛmu ŋa fei.

³⁰ Na nŋu, ide iyi Aɔ̃ Lafɛ̃ɛ í fɔ si gãmɛi Zoakimu ilaalui Zudaau wee. Í ni, dimiɛ kãma kaa buba si batai bommai Davidiu má, nɔ dasã ikuɛ á maa wai si inya gbãa, idũ mɔ si tũtũ.

³¹ Amu Aɔ̃ Lafɛ̃ɛ an na n naa siɛi do si amaɛ ŋa do si tɔkuɛ ŋa do si akaweɛ ŋa na kurara nŋa ŋau. Waati bɛɛbɛ, wahala ŋa iyi ǹ tako ǹ fɔ ideɛ fei, nɔ à kɔ̀ ku saaluɛu, an jɔ̀ ku naa si ŋa do si inɛi ilui Zeruzalɛmu ŋa do si inɛi Zudaa ŋa fei.

³² Ŋɔi Zeremi í so tia mmuɛ má í na Baruku woo kɔ tia iyi wa jɛ amai Neriau. Nɔ Baruku í kɔ ide ŋa iyi Zeremi wa sɔ̃ɔu fei má si tiau bɛi í tako í ce si ti tako iyi Zoakimu ilaalui Zudaa í jou. Si tia iyi ihɛ̃, ide nkpɔ nkpɔ ku jɔ njɛ ŋai à nyi à kɔ̃ɔsi má.