Zeremi 35 - Bibeli do fee

Zeremi do dimii Rekabu ŋa

¹ Aɔ̃ Lafɛ̃ɛ í ba Zeremi ide ku fɔ si waatii Zoakimu amai Zoziasi ilaalui Zudaa í ni,

² bɔ bi nyaanzei Rekabu ŋa nɔ i ba ŋa ide ku fɔ i jɔ̀ a naa kpasɛ̃i Aɔ̃ Lafɛ̃ɛ si inɔi ile ŋau akãɛ. Bii à to wa bɛ, nɔ i na ŋa atɛ̃ vɛ̃ɛ a mɔ.

³ Ŋɔi ǹ gbã Yaazania amai Imeya iyi wa jɛ tɔkui Habasinia do nyaanzeɛ ŋa wa, hee ku koo si nyaanzei Rekabu ŋau fei.

⁴ Ǹ gbã ŋai ǹ lɔò ŋa kpasɛ̃i Aɔ̃ Lafɛ̃ɛ si akãi inɔ ile iyi í jɛ ti ama inɛmɔkɔi Hanaa ŋa. Hanaau mɔ, amai Igidalia inɛi Ilaaɔ̃i wa jɛ. Ileu í wai kɔkɔi ilei akawe ŋau do ikpa lelei ilei Maaseya amai Salumu iyi wa jɛ woo wee iyi í ya maa cɔ kulɔi inɛ ŋa wa si kpasɛ̃i Aɔ̃ Lafɛ̃ɛu.

⁵ Ŋɔi ǹ so vɛ̃ɛ si jɔlɔ do kɔɔfu ŋa ǹ jilɔɔ si wajui nyaanzei Rekabu ŋau, ǹ bɛi ǹ sɔ̃ ŋa ǹ ni, i so vɛ̃ɛu ihɛ̃ i mɔ ŋa.

⁶ Amma à jɛ à ni, a kaa ka mɔ vɛ̃ɛ, domi bala nwa Yonadabu amai Rekabu í na wooda í ni, i kù nɛ i mɔ vɛ̃ɛ ajɔ kãma ŋa hai iŋɛ taka nŋɛ hee do ama nŋɛ ŋa.

⁷ I kù nɛ i ma ile ŋa, nɔ i kù nɛ i gbɛ̃ nkãma ŋa. I kù nɛ i lɔ jĩi ndii rezɛ̃ɛ ŋa, nɔ i kù nɛ i nɔɔ ŋa mɔm. Amma si ilei acɔ ŋai ì nɛ i maa wa ŋa si kuwɛɛ nŋɛ fei ku ba i buba i kpɛ si ilɛ bii ì waa jɛ inɛ njoo ŋau ŋa.

⁸ Wooda iyi bala nwa Yonadabu iyi wa jɛ amai Rekabu í na waui à waa jirima fei mam mam. A ci ya ka mɔ vɛ̃ɛ si kuwɛɛ nwa, hai awa taka nwa do abo nwa ŋa do ama inɛmɔkɔ nwa ŋa hee ku koo do ama inaabo nwa ŋau fei.

⁹ A ci ya ka ma ile ka bɛi ka ba bii aa ka sũ. Nɔ a kù nɛ jĩi ndii rezɛ̃ɛ ŋa do iko ŋa hee má jɛ ilɛ ŋa bii aa ka gbɛ̃.

¹⁰ Si ilei acɔ ŋai à wa à waa jirima ide ŋau à waa ceò ide ŋa iyi bala nwa Yonadabu í sɔ̃ wa ŋau fei icɛ.

¹¹ Waati iyi Nebukanɛsaa ilaalui Babilɔni í naa igũ si wa si ilɛu ihɛ̃, à fɔ à ni, ka bɔ Zeruzalɛmu, ka saa soogei inɛi Kaladee ŋa do ti inɛi Siri ŋau. Do yaase bɛɛbɛi à koo à bubaò Zeruzalɛmu.

¹² Ŋɔi Aɔ̃ Lafɛ̃ɛ í ba Zeremi ide ku fɔ í ni,

¹³ ide iyi amu Aɔ̃ Lafɛ̃ɛi lele do ilɛ, Lafɛ̃ɛi inɛi Izirɛli ŋa ǹ fɔ wee. Ǹ ni, koo i sɔ̃ inɛi Zudaa do inɛi Zeruzalɛmu ŋau fei i ni, Aɔ̃ Lafɛ̃ɛ í ni, i kaa gba ikɔ ŋa? I kaa jirima idei amu Aɔ̃ Lafɛ̃ɛ nŋɛ ŋa?

¹⁴ Yonadabu amai Rekabu í tako í na amaɛ ŋa wooda í ni a maà mɔ vɛ̃ɛ. Nɔ nyaanzei Rekabu ŋau à gba ideɛ ŋau à ceò icɛ. À bu ara nŋa a ci ya mɔ vɛ̃ɛ hee ku baa nnyi, domi idei bala nŋai à jirima. Nɔ amu Aɔ̃ Lafɛ̃ɛ, ǹ wasi ku ba ŋɛ ide ku fɔ n kù leekĩ, amma ì kɔ̀ ku gbɔ idem ŋa.

¹⁵ Ǹ bɛ si iŋɛ fei walii woo ce icɛm ŋa wa. N kù gbɛɛjiò ku bɛ ŋa wa a naa a sɔ̃ ŋɛ a ni, iŋɛ fei i jɔ̀ kpãa laalɔ nŋɛ i sinda i baa wa ŋa. I teese kuce nŋɛ ŋa, nɔ i maà nɛ anu akã do iwɛ̃ ŋa hee i koo i maa tɔɔ ŋa ŋa. Do yaase bɛɛbɛ, an jɔ̀ i buba si ilɛ iyi ǹ muaa iŋɛ do bala nŋɛ ŋau. Amma wee i kù jɛ ku sotĩ ku gbɔ nɔ i kù jirimam ŋa.

¹⁶ Ntɔ ntɔ inɛi Rekabu ŋau ngu ŋa à too si wooda iyi bala nŋa Yonadabu í na ŋau. Amma iŋɛ inɛi Zudaa ŋa, i kù jɛ ku gbɔ idem ŋa.

¹⁷ Nɔ Zeremi í sɔ̃ ŋa má í ni, na nŋu, Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í ni, wahala ŋa iyi ǹ fɔ ideɛ si gãmɛi inɛi Zudaa ŋa do inɛi Zeruzalɛmu ŋau fei, an jɔ̀ ku naa si ŋai, domi iyi ǹ ba ŋa ide ku fɔ a kù desim itĩ, nɔ iyi ǹ kpe ŋa à kɔ̀ ku jɛ.

¹⁸ Nɔ Zeremi í sɔ̃ nyaanzei Rekabu ŋau í ni, Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í ni, si bɛi ì jirima woodai bala nŋɛ Yonadabu, nɔ ì ceò ide iyi í sɔ̃ ŋɛ feiu icɛ ŋa,

¹⁹ amu Aɔ̃ Lafɛ̃ɛi lele do ilɛ, Lafɛ̃ɛi inɛi Izirɛli ŋa, ǹ wa n sɔ̃ ŋɛi, Yonadabu amai Rekabu kaa kua tɔkuɛ gɔ iyi á ya maa ceem icɛ.