Zeremi 34 - Bibeli do fee

Ide iyi à sɔ̃ Sedesiasi

¹ Nebukanɛsaa ilaalui Babilɔniu í bɔ igũ si ilui Zeruzalɛmu do si ilui Zudaa ŋa. Í kooi do soogeɛ ŋa fei, do soogei ilɛ ŋa iyi nŋu takaɛ í kãmia ŋau fei. Ŋɔi Aɔ̃ Lafɛ̃ɛ í ba Zeremi ide ku fɔ í ni,

² koo i ba Sedesiasi ilaalui Zudaa ide ku fɔ i sɔ̃ɔ i ni, Aɔ̃ Lafɛ̃ɛ í ni nŋu á so iluu ihɛ̃ nŋu ku daa ilaalui Babilɔni si awɔ ku ba ku ce nfeɛ do ina.

³ Nɔ i kaa ba i fita hai si awɔɛ, amma aa muɛi a daa si awɔ. Awɔ do ilaalui Babilɔniu aa yɛ njɛ ŋai ijuò iju. Iŋɛò aa fɔ ide ŋai gɛlɛò gɛlɛ, nɔ aa nɛ ilɛi Babilɔnii.

⁴ Na nŋu Sedesiasi ilaalui Zudaa, bii ì gbɔ ide iyi Aɔ̃ Lafɛ̃ɛ wa sɔ̃ɛ, taakuba kaa kpaɛ má.

⁵ Aa kui do laakai ku sũ, nɔ si waatii akũɛ ku ce, bɛi à joa balaɛ ŋa tuae ku dɔ̃ inunu ŋau bɛ, bɛɛbɛi aa ceaa awɔ mɔ, nɔ inɛ ŋa aa kpata akũɛui do bɛɛrɛ a maa ni, lafɛ̃ɛ, irei ì gbɔ inɔ kufɔ. Ilaalu wee í ku. Amu Aɔ̃ Lafɛ̃ɛi ǹ wa n sɔ̃ɛ ideu ihɛ̃.

⁶ Walii Zeremi í sɔ̃ Sedesiasi ilaalui Zudaa ide ŋau bɛ fei Zeruzalɛmu bɛ.

⁷ Nɔ si waati bɛɛbɛu, soogei ilaalui Babilɔni ŋau à koo à waa ce igũ si ilui Zeruzalɛmu do si ilu ku nɛ gbugbãi Zudaa ŋa iyi à gbe ŋau. Ilu ŋaui à ya kpe Lakisi do Azeka.

Ara ku nɛi aru ŋa do kumu nŋa má

⁸ Aɔ̃ Lafɛ̃ɛ í ba Zeremi ide ku fɔ si anyii iyi ilaalu Sedesiasi í dĩ akabuu do inɛi Zeruzalɛmu ŋau fei si gãmɛi idei ara ku nɛu.

⁹ Inɛ fei í nɛ ku jɔ̀ aru Ebɛɛ inɛmɔkɔ walakɔ inaabo ku nɛ araɛ ku nɛi. Inɛ kãma kù nɛ ku maa mu inɛi Zudaa kpaasiɛ aru má.

¹⁰ Ŋɔi inɛ ngbo ŋau do zamaau fei à na ara nŋa si idei akabuuu à jirimaɛ à jɛsi a jɔ̀ aru inɛmɔkɔ walakɔ inaabo ku ba a maà ti a maa mu ŋa si aru ku jɛ má. Aŋa fei à jirima ideu nɔ à jɔ̀ aru ŋau à nɛ.

¹¹ Amma hee do ankãanyi à nyi à dede si ide nŋau má. Aru inɛmɔkɔ ŋau do inaabo ŋa iyi à tako à jɔ̀ à nɛ ŋau, à tilasi ŋa à nyiò ŋa wa à naa à waa jɛ aru ŋa má.

¹² Ŋɔi Aɔ̃ Lafɛ̃ɛ í nyi í ba Zeremi ide ku fɔ má í ni,

¹³ Aɔ̃ Lafɛ̃ɛi inɛi Izirɛli ŋau í ni, ǹ dĩ akabuu do bala nŋɛ ŋa si ajɔ iyi ǹ nya ŋa wa hai ilɛi Ezibiti bii à waa jɛ aruu, nɔ ǹ sɔ̃ ŋa ǹ ni,

¹⁴ bii í koo í to kɔɔi adɔ̃ mɛɛje, inɛ iyi í ra inɛi Ebɛɛ kpaasiɛ í jɛ aruɛ fei, bii í cea icɛ zakai adɔ̃ mɛɛfa, í nɛ ku jɔ̀ɔ ku nɛi. À nɛ a jɔ̀ɔ ku nɛ araɛi. Amma bala nŋɛ ŋau à kɔ̀ ku jirimam. À kɔ̀ ku sotĩ ku gbɔ ide iyi ǹ wa n sɔ̃ ŋa.

¹⁵ Amma iŋɛ ì kpaasi kuceu ŋa. Ǹ yɛ iyi iŋɛ, kuce nŋɛ í sĩam si, domi ì jɔ̀ kpaasi nŋɛ ŋa à nɛ ara nŋa. Ì dĩ akabuu si wajum ŋa si inɔ kpasɛ̃ iyi à nya ikã í jɛ titom nɔu ihɛ̃.

¹⁶ Amma iŋɛ mɔ ì nyi ì na ì kpaasi má ŋa nɔ ì bɛjɛ irim ŋa. Iŋɛ fei ì nyi ì tilasi aru inɛmɔkɔ do aru inaabo ŋa iyi ì jɔ̀ à nɛ ara nŋa ŋau à nyi à baa si aru ku jɛ má do gbugbã.

¹⁷ Na ŋɔi í jɔ̀ Aɔ̃ Lafɛ̃ɛ í sɔ̃ ŋa í ni, i kù jirimam ŋa si gãmɛi kpaasi nŋɛ ŋa do inɛi kɔkɔ nŋɛ ŋa iyi ì ni aa jɔ̀ ŋa a nɛ ara nŋa ŋau ŋa. Na nŋu, amu Aɔ̃ Lafɛ̃ɛ ǹ wa n sɔ̃ ŋɛi iyi an naa nŋɛ ara ku nɛ wa do wahala dimi ikã ikã baa yooma fei. Hai igũ do patapoo do ari. Nɔ an jɔ̀ kuwɛɛ nŋɛ ku jɛaa bomma ŋa iyi à wa si andunya fei zigiidai.

^18-19 Ŋɔi inɛ ngboi Zudaa ŋa do ti Zeruzalɛmu ŋau do akawe nla ŋau do woo wee ŋau hee do zamaai ilɛu fei à dĩ akabuu do amu. Si akabuu iyi à dĩu, à kpɛ̃ ama kɛtɛ gɔ iyi à ceò kuwee minji nɔ à lɔ si aninii kukpɛ̃ minjiu. Amma inɛ ŋau à kua akabuu iyi awaò ŋa à dĩu, a kù kɔ̃ akabuu nŋa ŋau. Na nŋu, an ce nŋai bɛi aŋa mɔ à cea ama kɛtɛ iyi à kpɛ̃ minjiu.

²⁰ An so ŋai n daa mbɛɛ nŋa ŋa si awɔ aŋa iyi à waa dɛdɛ ku kpa ŋa, nɔ iku nŋa ku baa ku jɛ sɔndai yɛi ŋa do ti mɛɛmui sako ŋa.

²¹ An so Sedesiasi ilaalui Zudaa do inɛ ngboɛ ŋaui n daa mbɛɛ nŋa ŋa si awɔ aŋa iyi à waa dɛdɛ ku kpa ŋa, do si awɔi soogei ilaalui Babilɔni ŋa iyi à fa ara nŋa à jĩò ŋɛ.

²² Nɔ Aɔ̃ Lafɛ̃ɛ í nyi í ni má, nsɛi an na ŋa woodam ŋa, nɔ n jɔ̀ a nyi wa si iluu má a naa a ce igũ do iluu má. Si igũu ku ce, aa gba iluui nɔ a dasi ina. An jɔ̀ inyau ku baa ku jɛ inyai bomma bii inɛ kãma kaa wa.