Zeremi 32 - Bibeli do fee

Zeremi í ra iko gɔ

¹ Aɔ̃ Lafɛ̃ɛ í ba Zeremi ide ku fɔ si adɔ̃ mɛɛwasiai bomma ku jɛi Sedesiasi ilaalui Zudaa. Nɔ si adɔ̃ mɛɛwa do mɛɛjɔsiai bomma ku jɛi Nebukanɛsaa mbɛ.

² Soogei ilaalui Babilɔni ŋau à koo à bu ilui Zeruzalɛmu koe, wee í ko inɛi Zudaa ŋa à mu walii Zeremi í wa bantumai kpasɛ̃i ilaalui Zudaa bii sooge ŋa à ya maa degbeu.

³ Sedesiasi ilaalui Zudaaui í jɔ̀ à cĩmboɛ, domi í ni, bɛirei í ce ì ce walii ì waa ni, Aɔ̃ Lafɛ̃ɛ í ni, an so iluu ihɛ̃ n daa ilaalui Babilɔni si awɔ nɔ ku gbaa.

⁴ Na mii í jɔ̀ ì fɔ ì waa ni, Sedesiasi ilaalui Zudaau kaa fita si awɔi inɛi Kaladee ŋau, amma kù nɛ sika kãma, aa muui a daa ilaalui Babilɔniu si awɔ. Á baa ide ku fɔi, nɔ aŋaò aa yɛ njɛ ijuò iju.

⁵ Ilaalui Babilɔniu á mu Sedesiasi ku nɛò Babilɔnii, nɔ bɛi á maa wa hee amu Aɔ̃ Lafɛ̃ɛ n na n koo siɛ. Baa bii iŋɛ inɛi Zudaa ŋa ì bɔ igũ si inɛi Kaladee ŋau, i kaa jɛ igũ ŋa.

⁶ Ŋɔi Zeremi í ni, Aɔ̃ Lafɛ̃ɛ í bam ide ku fɔ í ni,

⁷ cɔ, Hanameɛli amai Salumu asiiɛ á naa bi tɛɛ ku na ku sɔ̃ɛ ku ni, ra ikom iyi í wa Anatɔti, domi ì nɛ kpãai i yaa ku jɛ titɛɛ.

⁸ Nɔ Hanameɛli amai asiim nɔu, í naa bi tom bantuma bii sooge ŋa à ya maa degbe bɛi Aɔ̃ Lafɛ̃ɛ í fɔu, nɔ í sɔ̃m í ni, ra ikom iyi í wa Anatɔti si ilɛi Bɛnzamɛɛu, domi ì nɛ kpãai i yaa ku jɛ titɛɛ. Na nŋu, ra ndɛɛ. Gbakã, ǹ mà iyi idei Aɔ̃ Lafɛ̃ɛi.

⁹ Ŋɔi ǹ ra iko iyi í wa Anatɔtiu hai bi Hanameɛli amai asiim nɔu, nɔ ǹ wã isɔ fũfũ jiida sikilii maatũ do minji ǹ naa.

¹⁰ Si anyii nŋu, ǹ ce tiai njɛ ku gbɔsi nɔ ǹ ce si akpaawɔ ǹ bɛi ǹ dɛdɛ inɛ ŋa iyi aa jɛ sɛɛda ŋa, nɔ ǹ wã isɔ fũfũ jiida si kiloo ǹ naa.

¹¹ Si anyii nŋu, ŋɔi ǹ so tia iyi ǹ raò inyau, tia iyi ǹ ce si akpaawɔ si bɛi wooda í jilɛu do tia iyi wa cĩu

¹² ǹ na Baruku amai Neria iyi wa jɛ tɔkui Maaseya. Ǹ naa tia ŋaui ijui Hanameɛli amai asiim nɔu, do si wajui inɛ ŋa iyi à jɛ sɛɛda ŋa nɔ à dasi tiai kurau awɔ, do si wajui inɛi Zudaa ŋa iyi à wa bantuma bii sooge ŋa à ya maa degbeu fei.

¹³ Nɔ si waju nŋa bɛ, ǹ na Baruku wooda ǹ ni,

¹⁴ Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í ni, so tiai akabuu ŋa iyi í jɛ akabuui ìwò ku ra iyi í nɛ akpaawɔ do iyi í wɛɛò kucĩu i dasi ŋa si inɔ cakai amà ku ba ku jilɛ ku kpɛ.

¹⁵ Bɛi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ wee. Í ni, ajɔ wa naa iyi si ilɛu ihɛ̃, inɛ ŋa aa ya ra kpasɛ̃ ŋa do iko ŋa do ikoi jĩi ndii rezɛ̃ɛ ŋa.

Kutɔɔi Zeremi

¹⁶ Si anyii iyi ǹ so tiai akabuu iyi ǹ raò inyau ǹ na Baruku amai Neria, ǹ tɔɔ Aɔ̃ Lafɛ̃ɛ ǹ ni,

¹⁷ Aɔ̃ Lafɛ̃ɛ, awɔi ì ce lele do ilɛ do gbugbã nla nlaɛ. Nkãma kù gaabu bi titɛɛ.

¹⁸ Ì ya nyisi jiida ku jɛɛ bi amanɛ ŋai hee ku koo si tɔku dubusia. Amma bii iyeò baa ŋa à ce kurara, ì ya jɔ̀ ijuukpãɛ ku sɔ si ama nŋa ŋai. Awɔi ì jɛ Aɔ̃ Lafɛ̃ɛ nla ilu gbugbã. Iriɛi í jɛ Aɔ̃ Lafɛ̃ɛi lele do ilɛ.

¹⁹ Awɔi ì ya ce sɔɔlui mii nla nla ŋa, nɔ a cei do gbugbã. Ijuɛ í ya maa kãsi mii iyi amanɛ ŋa à waa ce feii, nɔ ì ya cea inɛ feii bɛi isɛɛnɛi lafɛ̃ɛ í yɛ do bɛi daa ŋa iyi lafɛ̃ɛ wa ce í yɛ.

²⁰ Tako wo ì jɔ̀ nyinda ŋa do maamaake ŋa à ce si ilɛi Ezibiti, do si ilɛi Izirɛli do si andunya fei hee do nsɛi fei, nɔ ì jɔ̀ à mà inɛ iyi ì jɛ bɛi inɛ fei wa yɔɔ nsɛiu ihɛ̃.

²¹ Awɔi ì nya inɛi Izirɛli inɛɛ ŋau wa hai ilɛi Ezibiti do nyinda ŋa do maamaake ŋa do gbugbã nla nlaɛ, nɔ ì jɔ̀ zigii inɛi Ezibiti ŋau í da ntɔ ntɔ.

²² Awɔi ì mu nŋa ilɛ iyi ì cea bala nŋa ŋa kuwãɛ ì ni aa mu nŋau. Amɔ do nyikɔ̃i wa cã si ilɛu.

²³ À naa nɔ à na à buba si í jɛ tu ŋa. Amma a kù gbɔ ide ku fɔɛ, nɔ a kù jirima woodaɛ. A kù ce mii ŋa iyi ì sɔ̃ ŋa ì ni a ce fei. Nɔ na ŋɔi í jɔ̀ ì jɔ̀ wahala ŋau ihɛ̃ fei à naa si ŋa.

²⁴ Nsɛi inɛ ŋa à waa bi a kɛkɛ idĩ ŋau ku ba a gba iluu. Iluu á dasi awɔi inɛi Kaladee ŋa iyi aa naa a cuku siɛ a jɔɔ igũi, nɔ ari do bɔ̃ɔi á kpa inɛi ilu ŋa. Ide iyi ì ce waliiɛu, nŋui í to wa bɛ, ì nɔ ì waa yɔɔ.

²⁵ Ntɔ ntɔ aa so iluui a daa inɛi Kaladee ŋa si awɔ. Do nŋu fei Aɔ̃ Lafɛ̃ɛ, ì sɔ̃m ì ni n ra ikou do fia, nɔ n so inɛ ŋa a jɛ sɛɛda. Na mii.

Aɔ̃ Lafɛ̃ɛ í jɛa Zeremi

²⁶ Ide iyi Aɔ̃ Lafɛ̃ɛ í sɔ̃ Zeremi wee.

²⁷ Í ni, amu Aɔ̃ Lafɛ̃ɛ, amui ǹ jɛ Aɔ̃ Lafɛ̃ɛi mii iyi wa mi si hunde fei. Nkãma kù wɛɛ iyi í gaabu bi titom.

²⁸ Na nŋu, iyi ǹ wa n fɔ wee. An so iluu ihɛ̃i n daa inɛi Kaladee ŋa do Nebukanɛsaa ilaalui Babilɔni si awɔ. Aŋai aa gba iluu.

²⁹ Inɛi Kaladee ŋa iyi aa naa si iluu aa lɔ wai, nɔ aa dasi iluu inai a joo do ile ŋa iyi si antai nŋa à ya cea iwɛ̃ iyi à ya kpe Baaliu kuwee do tuae, nɔ à ya nyi a cea iwɛ̃ mmu gɔ ŋa kuwee do atɛ̃ vɛ̃ɛ má a dedeò idɔɔkɔ̃m.

³⁰ Nɔ Aɔ̃ Lafɛ̃ɛ í nyi í ni má, hai ku kpɛ wai inɛi Izirɛli ŋa do inɛi Zudaa ŋa à ya maa ce mii iyi kù dɔ̃ɔm si. Ntɔ ntɔ mii iyi inɛi Izirɛli ŋau à waa ce fei, á jɔ̀ idɔm ku maa kɔ̃i.

³¹ Ilui Zeruzalɛmuui í jɛ icui idɔɔkɔ̃m fei hai kusintii iluu wa hee ku baa do nnyi fei. Na nŋu, ǹ bi ku jĩim nii

³² na laalɔ ŋa iyi inɛi Izirɛli do inɛi Zudaa ŋau à ce à dedeò idɔɔkɔ̃m aŋa do ilaalu nŋa ŋa do akawe nŋa ŋa do woo wee nŋa ŋa do walii nŋa ŋa, aŋa iyi à jɛ inɛi Zudaa do inɛi Zeruzalɛmu ŋau fei.

³³ Anyii aŋa fei à sinda à toom wa, a kù toom waju nŋa. Ǹ kɔ ŋa, nɔ n kù gbɛɛjiò ikɔ ku na ŋa, amma a kù jɛ ikɔu ku gba.

³⁴ Nɔ iyi í re mɔm, à ce mii laalɔ, à so iwɛ̃ nŋau à dasi kpasɛ̃ iyi à nya ikã ku jɛ titom nɔu nɔ à riisiɛ.

³⁵ À maa iwɛ̃ nŋa iyi à ya kpe Baaliu inya kugboka ŋa si lɔɔmai Bɛni-Hinɔmu. À cooi ku ba a ya so ama inɛmɔkɔ do ama inaabo nŋa ŋa a ceaò iwɛ̃ nŋa iyi à ya kpe Molɔkuu kuwee si bɛ. Nɔ kuce iyi bɛ, kù jɛ amui ǹ na ŋa woodaɛ, nɔ kù naa baa si lasabum mɔm. Daa sãmi bɛɛbɛ ŋai à ce à taleò inɛi Zudaa ŋa si laalɔ ku ce.

³⁶ Na ŋɔi í jɔ̀ nsɛi amu Aɔ̃ Lafɛ̃ɛ, amu iyi ǹ jɛ Lafɛ̃ɛi inɛi Izirɛli ŋa ǹ wa n fɔ si gãmɛi ilu iyi ì ya maa ni ŋa, igũ do ari do patapoo aa jɔ̀ ku dasi awɔ gbugbãi ilaalui Babilɔniu.

³⁷ Amma ntɔ ntɔ amu Aɔ̃ Lafɛ̃ɛ an tɔtɔɔ ŋa wa má hai bii si idɔɔkɔ̃ nla nlam ǹ fangaa ŋa ǹ jɔ̀ à nɛò. An baaò ŋa wa si inyau ihɛ̃ má, nɔ n jɔ̀ a buba do laakai ku sũ.

³⁸ Aa jɛ inɛm ŋa, nɔ amu mɔ an jɛ Aɔ̃ Lafɛ̃ɛ nŋa.

³⁹ An jɔ̀ a nɛ idɔ akã do isɛɛnɛ akã ku ba a ya maa mà bɛɛrɛm hee do ajɔ fei na aranfãanii aŋa taka nŋa do na ti ama nŋa ŋa si anyi nŋa.

⁴⁰ An dĩ akabuu iyi kù nɛ ku tã do aŋa, n kaa n fũsi ŋa awɔ má. Jiidai an maa n ce nŋa. An jɔ̀ a maa jirimam nɔ a maà jĩim má.

⁴¹ An ya n nɛ inɔ didɔ̃i n maa n ce nŋa jiida, nɔ n jɔ̀ a buba si ilɛu ihɛ̃ do idɔm fei do lasabum fei hee do ajɔ fei.

⁴² Ntɔ ntɔ, Aɔ̃ Lafɛ̃ɛ í ni, do yaase bɛi ǹ jɔ̀ wahala í naa si inɛ ŋau ihɛ̃, do yaase bɛɛbɛ mɔi jiida ŋa iyi ǹ wa n fɔ ideɛu fei, an jɔ̀ ku naa si ŋa.

⁴³ Nsɛi inɛ ŋa à ya sɔ̃ njɛ a maa ni, à so ilɛu ihɛ̃i à daa inɛi Babilɔni ŋa si awɔ, nɔ í baa í kpɔò bomma bii inɛ kãma kù wa nɔ mɛɛmu kãma mɔ kù wa bɛ. Amma do nŋu fei, bɛi inɛ ŋa aa na a maa ra iko ŋa.

⁴⁴ Ntɔ ntɔ, si ilɛi Bɛnzamɛɛu, si ilu ŋa iyi à wa kɔkɔi Zeruzalɛmu, do si ilui Zudaa ŋa do si ilu ŋa iyi à wa ikpa ilɛ ilɛu, do iyi à wa ikpa iri kuta ŋau do ikpa Negɛbu, inɛ ŋa aa ya ra iko ŋa, nɔ a kɔ tiai ku ta nɔ a ce si akpaawɔ ŋa nɔ inɛ ŋa a jɛ sɛɛda, domi an teese n jilɛ inɛ ŋa si iluu mái. Amu Aɔ̃ Lafɛ̃ɛi ǹ fɔ bɛɛbɛ.