Zeremi 31 - Bibeli do fee

¹ Aɔ̃ Lafɛ̃ɛ í ni, ajɔ wa naa bii an jɛ Lafɛ̃ɛi nyaanzei inɛi Izirɛli ŋau fei, nɔ aŋa mɔ aa jɛ inɛm ŋa.

Kubaai inɛi Izirɛli ŋa iyi à wɛɛ si hunde

² Bɛi Aɔ̃ Lafɛ̃ɛ í nyi í ni má wee. Si gbaau, ǹ nyisi inɛm ŋa jiida ku jɛm ǹ jɔ̀ à fita si iku. Inɛi Izirɛli ŋau à nɛ à waa bɔ ku sĩmi mbɛ bɛi.

³ Ŋɔi zamaau í ni, hai jĩijĩi Aɔ̃ Lafɛ̃ɛ í naa í nyisim araɛ. Nɔ Aɔ̃ Lafɛ̃ɛ takaɛ mɔ í ni, ǹ nɛ kubiɛi hai ku kpɛ, nɔ hee do ajɔ feii. Na ŋɔi í jɔ̀ an maa wɛɛ do awɔ, nɔ n nyisiɛ jiida ku jɛm.

⁴ Izirɛli, an nyi n teese n jilɛɛ má. Aa so bata kusĩaɛ ŋai nɔ i fita i koo i jojo do inɛ ŋa iyi à wɛɛò inɔ didɔ̃.

⁵ Aa nyi i lɔ jĩi ndii rezɛ̃ɛ ŋa mái si iri kutai Samari ŋau. Woo lɔ ŋau aa lɔ, nɔ aa ba a da.

⁶ Nɔ ajɔ gɔ wa naa iyi woo degbe ilu ŋau aa na a maa dɔ̃ anu si iri kutai Efaraimu ŋau. Aa maa nii, i dede ŋa ka bɔ Siɔ̃ɔ bi Aɔ̃ Lafɛ̃ɛ nwa.

⁷ Bɛi Aɔ̃ Lafɛ̃ɛ í fɔ wee. Í ni, i dɔ̃ anu do inɔ didɔ̃ ŋa na irii Zakɔbu. I dakpɛaa ŋa, nŋu iyi í jɛ sinte si ilɛu. I jɔ̀ inɛ ŋa a gbɔ anu ku dɔ̃i inɔ didɔ̃ nŋɛ ŋa, nɔ i ni, Aɔ̃ Lafɛ̃ɛ, faaba inɛɛ ŋa. Faaba zamaai Izirɛli iyi í gbe si hunde.

⁸ An jɔ̀ a baa hai ilɛi ikpa awɔ njɛi kpãai inunuu, nɔ n tɔtɔɔ ŋa wa hai kɔɔi andunya bii à wau fei. Fɛɛju ŋa do ilu kutɛ akã ŋa, inaabo bãasĩ ŋa, do inaabo ŋa iyi à waa gbɔ ara kuroi kubí, aŋa fei aa wa si. Zamaa nla nlai á baa ihɛ̃.

⁹ Aa maa baai do kukpata a maa ceò kutɔɔ, nɔ ǹ ya n gbã ŋai n maa n lɛlɛ ŋa. Ǹ ya n gbã ŋai n bɔò ŋa si ido ŋa iyi à waa kɔ̃ do inyi. An gbã ŋai n tooò kpãa bii a kaa yɔkɔ a koosɛ, domi amui ǹ wa n jɛ baai Izirɛli, nɔ Efaraimu mɔ wa jɛ ama yemmam.

¹⁰ Iŋɛ inɛi andunya ŋa, i sotĩ i gbɔ idei Aɔ̃ Lafɛ̃ɛ ŋa, nɔ i sisi laabaauɛ si gũngũm ŋa iyi à wa hee jĩijĩ ŋa. I fɔ i ni ŋa, inɛ iyi í fangaa inɛi Izirɛli ŋau á nyi ku tɔtɔɔ ŋa má, nɔ á maa degbe ŋai bɛi woo degbe í ya maa degbe mɛɛmu gaaɛ ŋa.

¹¹ Aɔ̃ Lafɛ̃ɛ í jɔ̀ inɛi Izirɛli ŋau à nɛ ara nŋa. Í ya ŋa wai hai si awɔi inɛ iyi í re ŋaò gbugbã.

¹² Aa maa baai do anu ku dɔ̃i inɔ didɔ̃ si iri kutai Siɔ̃ɔ. Waju nŋa á maa daanai do inɔ didɔ̃ na mii jiida ŋa iyi aa ba hai bi Aɔ̃ Lafɛ̃ɛ. Mii jiida ŋau wee. Bilee do vɛ̃ɛ titɔ̃ do ikpoi olivi, do angudã ŋa do iwo ŋa do kɛtɛ kombo ŋa. Kuwɛɛ nŋa á maa sĩai bɛi lambo iyi à waa muaa inyi. Nɔ a kaa wɛɛò inɔ kufɔ má.

¹³ Waati bɛɛbɛ, mudɛ̃ɛ ŋa aa maa jojoi do inɔ didɔ̃. Bɛɛbɛ mɔi hee do awaasũ ŋa do mɔkɔ ngbo ŋa fei. Aɔ̃ Lafɛ̃ɛ í ni, an jɔ̀ inɔ kufɔ nŋa ku baa ku kpɔò inɔ didɔ̃i. An tũ idɔ nŋai nɔ n jɔ̀ a kɔ̃ò inɔ didɔ̃.

¹⁴ Aɔ̃ Lafɛ̃ɛ í ni má, an jɔ̀ woo wee ŋau a yoi do iŋa ku nɛ ikpo ŋa, nɔ n jɔ̀ zamaam nɔu ku ba mii jiida ŋa hai bi tom.

¹⁵ Aɔ̃ Lafɛ̃ɛ í nyi í fɔ má í ni, aa maa gbɔ anu ku dɔ̃ ŋai ikpa Rama, aa maa gbɔ kukpatai do buubuu ku cã. Rasɛlii á maa kpata na irii amaɛ ŋa, nɔ baa bii à waa lɛlɛɛ, kaa jɛ domi amu ŋau a kù wɛɛ má.

¹⁶ Amma Aɔ̃ Lafɛ̃ɛ í sɔ̃ɔ í ni, jɔ̀ weewea nɔ i maà kpata má. Amu Aɔ̃ Lafɛ̃ɛ, ǹ wa n sɔ̃ɛi, an sãɛ ribai kookaaiɛ ŋa. Amaɛ ŋau aa sinda a baa hai si ilɛi mbɛɛ.

¹⁷ Aɔ̃ Lafɛ̃ɛ í nyi í sɔ̃ɔ má í ni, kpãa ku cɔ í wɛɛɛ do waju. Amaɛ ŋau aa sinda a baa si ilɛ nŋa.

¹⁸ Ǹ wa n gbɔ inɛi Efaraimu ŋa iyi à waa weewea à waa ni, Aɔ̃ Lafɛ̃ɛ, ì kpã wa iju, nɔ à yɛ ijuukpãui bɛi ama kɛtɛ iyi wa kɔ̀ ide. Amma jɔ̀ a sinda a baa bi titɛɛ ku ba a baa ntɔ ntɔ, domi awɔ Aɔ̃ Lafɛ̃ɛi ì jɛ Lafɛ̃ɛ nwa.

¹⁹ Ntɔ ntɔ awai à sinda à toɛ anyi wo. Amma nsɛi í baa í jɛ nwa bii ǹ mà. Ì jɔ̀ à mà kurara nwa nɔ nsɛi à waa ŋɔ amaawɔ nwa. Nsɛi anyɔ wa mu wa nɔ a kù nɛ bɛɛrɛ na mii ŋa iyi à ce waati iyi à wɛɛ awaasũ.

²⁰ Nɔ Aɔ̃ Lafɛ̃ɛ í ni má, Efaraimu ama inɛmɔkɔm nii iyi ǹ bi ntɔ ntɔ. Nŋui ǹ bi í re. Nɔ bɛi ǹ wa n fɔ ideɛ fei, bɛɛbɛ mɔi ǹ ya n maa n ye gigiɛ waati kãma fei. Bɛi lasabum fei í wa siɛ, bɛɛbɛ mɔi ǹ nɛ araareɛ ntɔ ntɔ.

²¹ Na nŋu, gũ mii ŋa iyi aa nyaò kɔɔ si kpãau, nɔ i ce nyinda ŋa. Ce laakai si kpãa iyi ì too, do si kpãa bii ì nɛ si. Izirɛli, sinda i baa wa. Baa wa si ilu ŋau iyi à jɛ titɛɛ.

²² Hee waati yoomai aa nyi i maa dabii bii fei má, awɔ iyi ì yɛ bɛi mudɛ̃ɛ ku kɔ̀ ide. Aɔ̃ Lafɛ̃ɛ í taka mii titɔ̃ si ilɛ. Inaaboi wa dɛdɛ inɛmɔkɔ.

Ku teese ku ma do akabuu titɔ̃

²³ Ide iyi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í fɔ wee. Í ni, bii ǹ na n teese n jilɛ ilɛi Zudaa do iluɛ ŋau, nɔ inɛ ŋa iyi à mu à nɛò ŋau fei à baa, inɛ ŋau aa ya nyi a fɔ má a ni, Aɔ̃ Lafɛ̃ɛ ku weeɛ, awɔ bi kuwa bii ntɔ í wa, awɔ iyi ì jɛ iri kuta kumáu.

²⁴ Tengi bɛi inɛi ilɛi Zudaa ŋau do inɛi iluɛ ŋau fei aa buba. Nɔ bɛ mɔi woo logoo ŋa do ilu mɛɛmu ŋau fei aa wa.

²⁵ Ntɔ ntɔ inɛ ŋa iyi à gbɛɛji ŋau fei, an mu nŋa gbugbã, nɔ inɛ ŋa iyi a kù waa yo ŋau fei, an na ŋa bukaatai mii iyi à bi.

²⁶ Si anyiɛ, waati iyi ǹ jĩ hai si iri njoo, ǹ ba wee njoo ku sũm nɔu í ceem didɔ̃.

²⁷ Nɔ Aɔ̃ Lafɛ̃ɛ í ni má, ajɔ wa naa si bii an jɔ̀ zamaai amanɛ ŋa do mɛɛmu ŋa a fangaa si bommai Izirɛli do Zudaa bɛi à ya fã ngboi mii ku gbɛ̃ si ilɛ.

²⁸ Nɔ si bɛi ǹ wɔ njoo si ŋa ǹ tu ŋa, ǹ kɛkɛ ŋa, ǹ lɛgɛ ŋa nɔ ǹ kpa ŋa ku ba n ce nŋa laalɔ, do yaase bɛɛbɛ mɔi an dasi ŋa iju má, n ma ŋa, nɔ n nyi n lɔ ŋa má.

²⁹ Waati bɛɛbɛ, inɛ kãma kaa fɔ ku ni má, baa ŋa à jɛ isoi rezɛ̃ɛ iko, nɔ gɛlɛi amu ŋa í bɔ.

³⁰ Amma inɛ fei á kui na irii kurarai nŋu takaɛ. Nɔ inɛ baa yooma iyi í jɛ isoi rezɛ̃ɛ iko fei, lafɛ̃ɛi gɛlɛɛ á bɔ.

³¹ Nɔ Aɔ̃ Lafɛ̃ɛ í ni má, ajɔ wa naa si bii an dĩ akabuu titɔ̃ do inɛi Izirɛli ŋa do ti Zudaa ŋa.

³² Nɔ akabuuu kaa jɛ dimi bɛi ǹ tako ǹ dĩ do bala nŋa ŋa si waati iyi ǹ mu awɔ nŋa ǹ fitaò ŋa wa ilɛi Ezibitiu. Akabuu inɛ nŋu a kù kɔ̃ɔ baa do iyi ǹ jɛ Lafɛ̃ɛ nŋa fei.

³³ Amma akabuu iyi an dĩ do inɛi kpasɛ̃i Izirɛli ŋa si anyii ajɔ nŋu ŋau bɛ wee. An jɔ̀ woodam ku wa si ŋai. Woodau, an kɔɔi si idɔ nŋa. An jɛ Aɔ̃ Lafɛ̃ɛ nŋa, nɔ aŋa mɔ aa jɛ inɛm ŋa.

³⁴ Waati bɛɛbɛ, inɛ kãma nŋa kaa nɛ bukaatai ku maa kɔ́ kpaasiɛ ŋa do nyaanzeɛ ŋa bɛi aa ce a mà amu Aɔ̃ Lafɛ̃ɛ. Hai inɛ iyi í kere í re hee do inɛ iyi í la í re fei á màm nii. An ce nŋa suurui dulum iyi à ce feii, n kaa n ye gigiɛ má.

³⁵ Yooi í ya jɔ̀ inunu ku fita ku má inya dasã. Nɔ yooi í ya jɔ̀ cukpa do leleaɔ̃ ŋa a má inya idũ. Yooi í ya jɔ̀ tenku ku dede nɔ ku jɔ̀ a maa gbɔ ibai kutãngãm dɛɛ ŋa. Inɛ iyi à kpe Aɔ̃ Lafɛ̃ɛi lele do ilɛui.

³⁶ Nɔ Aɔ̃ Lafɛ̃ɛ í nyi í ni má bii nŋu í jɛsi iyi wooda iyi à jilɛa lele do ilɛ á na ku kpa iri ajɔ akã, bɛɛbɛ mɔi nŋu á jɛsi iyi tɔkui inɛi Izirɛli ŋau mɔ aa kpa irii, a kaa jɛ dimi gɔ iyi í wɛɛ má.

³⁷ Nɔ í ni má bii inɛ gɔ á yɔkɔ ku wã kugbokai lele, nɔ bii í jɛ inɛ gɔ á yɔkɔ ku wã kujĩisai icui ilɛu ihɛ̃ ku mà yaaseɛ, waati bɛɛbɛ, á fũsi tɔkui inɛi Izirɛli ŋau awɔ, na mii ŋa iyi à ce fei.

³⁸ Aɔ̃ Lafɛ̃ɛ í nyi í fɔ má í ni ajɔ ŋa à waa naa bii aa teese a maa nŋu Aɔ̃ Lafɛ̃ɛ iluu má. Aa maai hai bi ile kugbokai Hananeɛliu hee ku bɔ anu koofa iyi í wa bi gontau.

³⁹ Aa teese a nya kɔɔ titɔ̃ ŋai titã si iluu hai ikpa nunui alɛ hee ku bɔ iri kutai Garɛbu. Hai bɛ má, nɔ ku sinda ku bɔ ikpa Goa.

⁴⁰ Hai bi lɔɔmai iku ŋau do ti iluluu hee ku bɔ si bantuma iyi í wɛɛ ngbɛu hee ku bɔ lɔɔmai Sedorɔ̃ɔ, hee do bi gonta bii gamboi acĩ ŋau í wa. Inya ŋau bɛ fei, ti Aɔ̃ Lafɛ̃ɛi á jɛ. A kaa wú nkãma bɛ má hee má jɛ a lɛgɛ ngɔgɔ.