Zeremi 3 - Bibeli do fee

Izirɛli woo ce sakara iyi kù waa jɔ̀ daa

¹ Aɔ̃ Lafɛ̃ɛ í ni, bii inɛ gɔ í kɔ̀si aboɛ, nɔ abou í nɛ í koo í so mɔkɔ mmu, mɔkɔ nwou á yɔkɔ ku na ku gbaa ku jɛ aboɛ má? Aawo. Ilɛu á so riisii bii í ce bɛɛbɛ. Awɔ Izirɛli iyi ì ya dabii i maa tɔɔ iwɛ̃ nkpɔ nkpɔ bɛi woo ta icu í ya maa gba mɔkɔ nkpɔ nkpɔ, ì waa bi i nyi wa bi tom má?

² Wu iju i cɔ ikpa geete ŋau. Iwoi i kù tɔɔ iwɛ̃ ŋa bɛi woo ta icu ŋa iyi à ya maa gba mɔkɔ nkpɔ nkpɔ. Ì ya koo i maa leekĩ si itĩ kpãai bɛi inɛi Arabi iyi í wa si gbaa wa degbe woo lɔ ŋa. Nɔ ì riisi ilɛu do iwɛ̃ ku tɔɔ do laalɔ ku ce, bɛi inaabo à ta icu.

³ Na ŋɔi í jɔ̀ ǹ kɔ̀ɛ ijĩ, nɔ agbɛ í mu si jɛadɔ̃u. Amma ì lele idɔɛ ì waa mɔsi do icu ku taɛ, nɔ anyɔ kù waa muɛ.

⁴ Nsɛi bɛbɛi ì waa dɔ̃ anu sim ì waa ni, baam, awɔi ì jɛ kpaasim hai awaasũm.

⁵ Aa maa mum do idɔɔkɔ̃i hee do ajɔ fei? Aa maa mum do mbɛɛtɛi waati kãma fei? Bɛi ì waa fɔ mbɛ. Amma ì kɔ̀ ì waa mɔsi do laalɔ ku ce.

Izirɛli do Zudaa a kù jɛ dee dee

⁶ Si waatii ilaalu Zoziasi Aɔ̃ Lafɛ̃ɛ í sɔ̃m í ni, ì yɛ bɛi Izirɛli woo kpaasi ideu í ce? Í bɔ si antaii iri kuta ŋa fei do si abɛi jĩi tũtũ ŋau fei, nɔ bɛi í koo í riisi araɛ.

⁷ Ǹ wa n fɔ wo ǹ ni, bii í ce nŋu ŋau bɛ wa fei í tã, á nyi wa bi tom. Amma kù nyi wa. Nɔ ifɔɛ Zudaa hai jɛ dee deeu í yɔɔ.

⁸ Baa do iyi ǹ kɔ̀si Izirɛli woo kpaasi ideu na sakaraɛ ŋau fei, nɔ ǹ naa tiai njɛ ku kɔ̀siu, ǹ yɛ iyi Zudaa hai jɛ dee deeu kù ce njo, nɔ í koo í riisi araɛ wa bɛi nŋu mɔ.

⁹ Izirɛli í jɔ̀ ilɛu í so riisi. Í ya maa tɔɔ iwɛ̃ ŋa iyi à ce do kuta ŋa do jĩi ŋa.

¹⁰ Do nŋu fei wecĩɛ Zudaa hai jɛ dee deeu kù nyi wa sim do idɔɛ fei. Si iboi í ce nŋu bɛ fei. Amu Aɔ̃ Lafɛ̃ɛi ǹ fɔ bɛɛbɛ.

¹¹ Ŋɔi Aɔ̃ Lafɛ̃ɛ í sɔ̃m í ni, í jɔ bɛi Izirɛli woo kpaasi ideu kù nɛ taale bii à wãaò Zudaa hai jɛ dee deeu.

¹² Bɔ ikpa awɔ njɛi kpãai inunu i la na ideu ihɛ̃ i maa ni, baa wa Izirɛli woo kpaasi ide. Aɔ̃ Lafɛ̃ɛ í ni, n kaa n cɔɛ do iju laalɔ, domi ǹ jɛ ilu araare. N ci ya mu idei mbɛɛtɛ do ajɔ fei.

¹³ Nŋu de, jɔ̀ i mà kuraraɛ ŋa. Jɔ̀ i mà iyi ì ce ide ku kɔ̀ bi Aɔ̃ Lafɛ̃ɛ, domi ì dabii si iwɛ̃ ŋai bii fei si abɛ jĩi tũtũ fei. Nɔ ì kɔ̀ idem ku gbɔ.

Kubaai inɛi Zudaa ŋa do inɛi Izirɛli ŋa

¹⁴ I baa wa ŋa ama ku kɔ̀ ide ŋa, domi amui ǹ jɛ mɛɛtu nŋɛ. An so nŋɛ inɛ akã hai si ilu gɔ, inɛ minji hai si nyaanze gɔ, nɔ n bɔò ŋɛ Siɔ̃ɔ.

¹⁵ An dɛdɛ nŋɛ woo degbe ŋa iyi ǹ bi. Nɔ aa degbe ŋɛ do bisi do kumà.

¹⁶ Amu Aɔ̃ Lafɛ̃ɛ ǹ wa n fɔi ǹ ni, waati iyi aa bí ŋa nɔ akpɔ nŋɛ ku kɔ̃ɔsi si zamaai ilɛu bɛ ŋa, a kaa fɔ idei kpakoi akabuui amu Aɔ̃ Lafɛ̃ɛ má. Kaa nyi wa si lasabu nŋɛ má. A kaa ye gigiɛ má, nɔ a kaa mà baa mà kù wa bɛ má. Nɔ inɛ kãma kaa ce mmuɛ gɔ má.

¹⁷ Si waati nŋu bɛ, aa ya kpe ilui Zeruzalɛmui, kitãi bommai Aɔ̃ Lafɛ̃ɛ. Nɔ inɛi ilɛ ŋau fei aa ya tɔtɔɔ wa Zeruzalɛmui do irii Aɔ̃ Lafɛ̃ɛ. Nɔ a kaa ya too si lasabu laalɔ iyi á naa nŋa si idɔ má.

¹⁸ Si waati nŋu, kpasɛ̃i Zudaa do ti Izirɛli aa tɔtɔɔi a maa nɛ. Aa ya dede wai ajɔ hai ilɛi awɔ njɛi kpãai inunu, a naa si ilɛ iyi ǹ muaa bala nŋɛ ŋau.

Kubaai zamaa hai jɛ dee deeu

¹⁹ Amu Aɔ̃ Lafɛ̃ɛ ǹ ya n maa n ni, ǹ bi n kàɛi wo si inɔi amam ŋa, nɔ n muɛ ilɛ bii ididɔ̃ í wa, iyi kusĩai boodaɛ í re si ilɛ fei. Ǹ ya n maa n nii wo, awɔi aa ya kpem i ni, baam. Nɔ i kaa kɔ̀sim pai.

²⁰ Amma bɛi inaabo iyi í zamba mɔkɔɛ, bɛɛbɛi iŋɛ inɛi Izirɛli ŋa ì zambam ŋa.

²¹ À waa gbɔ anu ku dɔ̃ si antaii iri kuta ŋa. Kukpatai inɛi Izirɛli ŋa mbɛ do suuru ku tɔɔ nŋa, domi à jɔ̀ kpãam nɔ à gbɛjɛ amu Aɔ̃ Lafɛ̃ɛ nŋa.

²² I baa wa ŋa, ama ku kɔ̀ ide ŋa. An ce nŋɛ suurui dee dee hai jɛ nŋɛ. Awa wee Ilaaɔ̃, à waa baa bi tɛɛ, domi awɔi ì jɛ Aɔ̃ Lafɛ̃ɛ nwa.

²³ Ntɔ ntɔ iwɛ̃ ŋa iyi inɛ ŋa à ya maa tɔɔ si geete ŋau do iba iyi wa naa hai si antaii iri kuta iboi. Amma si Aɔ̃ Lafɛ̃ɛ nwai faabai Izirɛli í wa.

²⁴ Hai keeke nwa, iwɛ̃ iyi à ya kpe Baaliui í jɛ aranfãanii icɛi bala nwa ŋa. Hai angudã nŋa ŋa do kɛtɛ nŋa ŋa, do ama inɛmɔkɔ do inaabo nŋa ŋa.

²⁵ Ka sũ do anyɔ nwa. Nɔ ka jɛsi anyɔu ku bii wa. Ntɔ ntɔ à ce dulum bi Aɔ̃ Lafɛ̃ɛ nwa, awa do baa nwa ŋa hai keeke nwa hee ku baa nnyi. A kù gbɔ ide iyi Aɔ̃ Lafɛ̃ɛ nwa í wasi ku sɔ̃ wau pai.