Zeremi 29 - Bibeli do fee

Zeremi í cea inɛ ŋa iyi à mu à nɛò ŋau tia

¹ Hai Zeruzalɛmu, walii Zeremi í cea inɛ ŋau tia. Í ce tiaui í sambaa inɛ ngbo ŋa do woo wee ŋau do walii ŋau do inɛ mmu gɔ ŋa má aŋa iyi Nebukanɛsaa í mu hai Zeruzalɛmu í nɛò ilɛi Babilɔniu fei.

² Í samba tiaui si anyii kufitai ilaalu Yekonia do iyeɛ, do akawe nla ŋau, do inɛ ngboi Zudaa ŋa do ti Zeruzalɛmu ŋau, do woo gbe jĩi ŋau do gbɛdɛi ilu ŋau.

³ Sedesiasi ilaalui Zudaa í bɛ Eleazaa amai Safãa do Gemaria amai Hilikiya ŋa Babilɔni bi ilaalu Nebukanɛsaa. Ŋɔi Zeremi í na ŋa tiaɛu. Í kɔ si tiaui í ni,

⁴ Aɔ̃ Lafɛ̃ɛi lele do ilɛ, Lafɛ̃ɛi inɛi Izirɛli ŋaui wa ba inɛ ŋa iyi í jɔ̀ à mu hai Zeruzalɛmu à nɛò Babilɔniu fei ide ku fɔ.

⁵ Í sɔ̃ ŋa í ni, i ma ile nɔ i buba si ŋa. I lɔ jĩi ŋa, nɔ i jɛ iso nŋa ŋa.

⁶ I ce abɔdɔ̃ ŋa, nɔ i bí ama inɛmɔkɔ do ama inaabo ŋa. I jɔ̀ ama inɛmɔkɔ nŋɛ ŋa a ce abɔdɔ̃, nɔ i muaa ama inaabo nŋɛ ŋa mɔkɔ ŋa ku ba a bí ama inɛmɔkɔ do ama inaabo ŋa. I bí ku kpɔ ikpa bɛ nɔ i maà kayeɛ ŋa.

⁷ I dɛdɛ bɛi ilu bii ǹ jɔ̀ ì koo ì wa ŋau á ce ku nɛ laakai ku sũ, nɔ i tɔɔ Aɔ̃ Lafɛ̃ɛ na irii iluu ŋa, domi laakai ku sũi iluui á jɛ laakai ku sũi iŋɛ mɔ.

⁸ Bɛi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í fɔ wee. Í ni, i maà jɔ̀ walii ŋa iyi à wa bi tu ŋɛ ŋau a sɔ nŋɛ ibo, hee má jɛ woo ce alisi nŋɛ ŋau. I maà ya ceò idei àla ŋa iyi ì waa ce ŋau icɛ ŋa.

⁹ Nɔ Aɔ̃ Lafɛ̃ɛ í ni má, ide ŋa iyi à waa ce waliiɛ do irim nɔu bɛ fei, iboi. Kù jɛ amui ǹ bɛ ŋa wa.

¹⁰ Amma Aɔ̃ Lafɛ̃ɛ í nyi í fɔ má í ni, waati iyi gbugbãi bommai Babilɔni á kpɛ ku ce adɔ̃ kitaò fɛɛwa (70) bi tu ŋɛ, an naa si ŋɛ, nɔ waati bɛɛbɛi an kɔ̃ kuwã iyi ǹ ce nŋɛu n jɔ̀ i baa Zeruzalɛmu má ŋa.

¹¹ Nɔ Aɔ̃ Lafɛ̃ɛ í nyi í fɔ má í ni, ǹ mà lasabu iyi ǹ ce na iri nŋɛ. Lasabuu, lasabui laakai ku sũi, kù jɛ ti laalɔ. Nɔ ǹ nɛ lasabu iyi bɛi ku ba n mu nŋɛ kuwɛɛi ala iyi í jɛ ti kpãa ku cɔ.

¹² Waati bɛɛbɛ, aa kpem nɔ aa tɔɔm ŋa, nɔ an jɛ nŋɛ.

^13-14 Bii ì sinda ì naa bi tom, aa yɛm ŋa. Amu Aɔ̃ Lafɛ̃ɛ, ǹ wa n sɔ̃ ŋɛi, bii ì dɛdɛɛm do idɔ nŋɛ fei, an jɔ̀ i yɛm ŋa. Nɔ an nyi n teese yaasei kuwɛɛ nŋɛ má. An jɔ̀ i fita hai bi dimi ŋa do hai afe ŋa bii ǹ jɔ̀ ì fangaa ì nɛ fei ŋa. An tɔtɔɔ ŋɛ nɔ n jɔ̀ i baa si afeu ihɛ̃ ŋa hai bii ǹ jɔ̀ à mu ŋɛ à nɛò ŋɛu. Amu Aɔ̃ Lafɛ̃ɛi ǹ fɔ bɛɛbɛ.

¹⁵ Aɔ̃ Lafɛ̃ɛ wa sɔ̃ ŋɛ iyi bɛ ŋa feii si na iyi í jɔ̀ ì waa ni ŋa, nŋui í mu nŋɛ walii ŋa ilɛi Babilɔni bɛ.

¹⁶ Bɛbɛi, Aɔ̃ Lafɛ̃ɛ wa fɔ si gãmɛi ilaalu iyi í buba si bommai Davidi do inɛ ŋa iyi à wa Zeruzalɛmu hee nsɛiu do si gãmɛi inɛ nŋɛ ŋa iyi a kù mu ŋa a kù nɛò Babilɔniu, í ni,

¹⁷ amu Aɔ̃ Lafɛ̃ɛi lele do ilɛ ǹ ni, an jɔ̀ inɛ ŋa a naa igũ si ŋa, nɔ an jɔ̀ ari do patapoo ku naa si ŋa, nɔ an jɔ̀ a yɛi bɛi isoi figi ŋa iyi à sãmi iyi inɛ kãma kaa yɔkɔ ku jɛ na ku sãmi nŋau.

¹⁸ An jɔ̀ igũ do ari do patapoo ku naa si ŋai, nɔ an jɔ̀ bommai andunya ŋau ihɛ̃ njo ku ya mu ŋa waati iyi à yɔɔ fei. Si dimi ŋa bii ǹ fangaa ŋa à nɛ fei, yaase nŋai inɛ ŋa aa ya so waati iyi à waa bi a ceekpe inɛ gɔ, walakɔ waati iyi à bi a fɔ ide laalɔ gɔ, walakɔ waati iyi à bi a fɔ idei zigiida walakɔ idei anyɔ gɔ fei.

¹⁹ Aɔ̃ Lafɛ̃ɛ í ni, bɛɛbɛi á jɛ si na iyi í jɔ̀ à kɔ̀ ku gbɔ ide iyi ǹ wa n sɔ̃ ŋa. Do nŋu fei, n kù gbɛɛji, ǹ kɔ̀ ǹ wasi ku bɛ si ŋa walii woo ce icɛm ŋa wa, amma à kɔ̀ ku gbɔ ide nŋa.

²⁰ Amma nsɛi iŋɛ fei i gbɔ ŋa, iŋɛ iyi Aɔ̃ Lafɛ̃ɛ í jɔ̀ à mu ŋɛ hai Zeruzalɛmu à nɛò Babilɔni, i gbɔ ide iyi Aɔ̃ Lafɛ̃ɛ wa sɔ̃ ŋɛ ŋa.

²¹ Ide iyi Aɔ̃ Lafɛ̃ɛi lele do ilɛ, nŋu iyi í jɛ Aɔ̃ Lafɛ̃ɛi iŋɛ inɛi Izirɛli ŋau í fɔ si gãmɛi Akabu amai Kolaya do si gãmɛi Sedesiasi amai Maaseya wee, aŋa iyi à waa ce walii ibo do iriɛu í ni, amu Aɔ̃ Lafɛ̃ɛ an so ŋai n daa Nebukanɛsaa ilaalui Babilɔniu si awɔ, nɔ ku jɔ̀ a cã a kpa ŋa si waju nŋɛ bɛ.

²² Nɔ inɛi Zudaa ŋa iyi à mu à nɛò Babilɔni ŋau fei, bii à waa bi a ceekpe inɛ gɔ, aa ya cooi do irii inɛ minji ŋau bɛ. Aa ya nii, Aɔ̃ Lafɛ̃ɛ ku ceɛ bɛi í cea Sedesiasi do bɛi í cea Akabu, aŋa iyi ilaalui Babilɔni í banda ŋa si ina.

²³ Iyi bɛ í ba ŋai si na iyi í jɔ̀ à ce ide laalɔ si ilɛi Izirɛli. À ce sakarai do aboi kpaasi ŋa, nɔ à sɔ ibo do irim baa do iyi n kù ba ŋa ide ku fɔ. Amu Aɔ̃ Lafɛ̃ɛ ǹ mà fei ndɛɛ nɔ ǹ jɛ sɛɛda.

Tia iyi à cea Semaya

^24-25 Aɔ̃ Lafɛ̃ɛi lele do ilɛ, nŋu iyi í jɛ Aɔ̃ Lafɛ̃ɛi inɛi Izirɛli ŋa, í ba Zeremi ide ku fɔ si gãmɛi Semaya inɛi ilui Nehelamu. Semayaui í kɔ tia í sambaa Sofoni woo wee iyi wa jɛ amai Maaseyau, do woo wee mmu ŋa hee do inɛ ŋa iyi à gbe Zeruzalɛmu bɛ fei. Ide iyi í kɔa Sofoniu wee.

²⁶ Í ni, Aɔ̃ Lafɛ̃ɛ í jilɛɛ i jɛ woo wee si agbɛi Yoyada iyi í tako í jɛ woo weeu ku ba i maa cɔ inɛ baa yooma iyi í jɛ sũmu nɔ wa ni nŋu í jɛ walii fei, ku ba i kpati ŋa nɔ i da nŋa si isɔ si kɔ̃ɔ.

²⁷ Nsɛi, na mii í jɔ̀ i kù kpã Zeremi inɛi Anatɔtiu iju, nŋu iyi í so araɛ bɛi walii bi tu ŋɛ,

²⁸ nŋu iyi í bɛ wa Babilɔni kaa fɔ ka ni aa ka kpɛ Babilɔni bɛ. Í fɔ mɔm í ni ka ma ile ŋa ka buba si, ka lɔ jĩi ŋa ku ba ka ya ka ba iso nŋa ka jɛ.

²⁹ Ŋɔi Sofonii woo weeu í cio tiau si wajui walii Zeremi.

³⁰ Nɔ Aɔ̃ Lafɛ̃ɛ í ba Zeremi ide ku fɔ í ni,

³¹ bɛ inɛ gɔ koo sɔ̃ inɛ ŋa iyi à mu ŋau fei ku ni, bɛi Aɔ̃ Lafɛ̃ɛ í fɔ si gãmɛi Semaya inɛi Nehelamuu wee. Ku sɔ̃ ŋa ku ni, Semaya wa ce nŋɛ walii, amma iboi wa sɔ nŋɛ, domi kù jɛ amui ǹ bɔɔ wa.

³² Ide ŋa iyi amu Aɔ̃ Lafɛ̃ɛ ǹ wa n sɔ̃ ŋɛ wee. An na n kpã Semaya do tɔkuɛ ŋa iju. Inɛi kpasɛ̃ɛ kãma kaa wɛɛ si hunde si anini nŋɛ hee ku yɛ jiida iyi an cea iŋɛ inɛm ŋa, domi nŋui í jɔ̀ inɛm ŋau à dedeò ide ku kɔ̀ si gãmɛm.