Zeremi 28 - Bibeli do fee

Zeremi do walii Hanania

¹ Si adɔ̃ akãu bɛ, hai sintei bomma ku jɛi Sedesiasi ilaalui Zudaa, si cukpa miiusiai adɔ̃ mɛɛsia, Hanania amai Azuu walii Gabaɔ̃ɔu í bam ide ku fɔ si inɔ kpasɛ̃i Aɔ̃ Lafɛ̃ɛ si wajui woo wee ŋau do si wajui zamaau fei í ni,

² bɛi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋau í fɔ wee. Í ni, amu Aɔ̃ Lafɛ̃ɛ an nya gbugbãi ilaalui Babilɔni iyi í jɛ nŋɛ bɛi zuuguu hai si antai nŋɛ.

³ Nebukanɛsaa ilaalui Babilɔni í ko jĩnɛ ŋa hai si kpasɛ̃i Aɔ̃ Lafɛ̃ɛ í nɛò Babilɔni. To, nsɛi hai ihɛ̃ ku bɔ adɔ̃ minji zaka bii à wau ihɛ̃, an baaò jĩnɛ ŋau bɛ fei wa ihɛ̃.

⁴ Nɔ Aɔ̃ Lafɛ̃ɛ í nyi í ni má, an baaò Yekonia ilaalui Zudaa iyi wa jɛ amai Zoakimuu mɔ wa hee do inɛi Zudaa ŋa iyi à mu à nɛò Babilɔniu fei wa. Ntɔ ntɔ zuugu iyi ilaalui Babilɔni í kãa nŋɛ do tilasiu, an nya nŋɛ.

⁵ Ŋɔi walii Zeremi í jɛa walii Hanania si wajui woo wee ŋa do si wajui zamaa iyi wa leekĩ si inɔ kpasɛ̃i Aɔ̃ Lafɛ̃ɛu fei.

⁶ Walii Zeremi í jɛ í ni, ami. Aɔ̃ Lafɛ̃ɛ ku jɔ̀ ku jɛ bɛɛbɛ. Aɔ̃ Lafɛ̃ɛ ku kɔ̃ ideɛ ŋa iyi ì ce waliiɛ ŋau fei, nɔ ku jɔ̀ jĩnɛi kpasɛ̃i Aɔ̃ Lafɛ̃ɛ ŋau a baa si inyau ihɛ̃ hai Babilɔni hee do inɛ ŋa iyi à mu à nɛò ŋau fei.

⁷ Do nŋu fei, gbɔ ide iyi an sɔ̃ɛ awɔ do zamaau fei.

⁸ Walii ŋa iyi à cuaam wa hai ku kpɛ, nɔ à cuaa awɔ mɔ wa, à ce walii si gãmɛi ilɛ nkpɔ nkpɔ do si gãmɛi bomma nkpɔ nkpɔ à ni igũ do wahala do patapoo á naa.

⁹ Amma bii walii gɔ í fɔ idei laakai ku sũ, bii ide iyi í ce waliiɛu í naa í kɔ̃, nŋui aa bɛi a mà iyi ntɔ ntɔ Aɔ̃ Lafɛ̃ɛi í bɔɔ wa.

¹⁰ Waati bɛɛbɛi, walii Hanania í bɛi í nya zuugu iyi í wa si kɔ̃ɔi walii Zeremiu nɔ í cɔɔ.

¹¹ Nɔ Hanania í fɔ si wajui zamaau fei í ni, Aɔ̃ Lafɛ̃ɛ í ni, do yaase bɛɛbɛi si afei adɔ̃ minji an cɛ zuugu iyi Nebukanɛsaa ilaalui Babilɔniu í daa dimi ŋa si kɔ̃ɔu fei. Nɔ walii Zeremi í mɔsi isɛɛnɛɛ.

¹² Waati iyi walii Hanania í cɛ zuuguu hai si kɔ̃ɔi Zeremi, si anyiɛi Aɔ̃ Lafɛ̃ɛ í ba Zeremi ide ku fɔ í ni,

¹³ koo i sɔ̃ Hanania i ni, Aɔ̃ Lafɛ̃ɛ í ni n sɔ̃ɛ, si bɛi ì cɛ zuugui jĩi, i nɛ i kpaasiɛi do zuugui isɔ.

¹⁴ Nɔ Zeremi í nyi í ni má, Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í ni, an dasi zuugui isɔ si kɔ̃ɔi inɛi ilɛ ŋau ihɛ̃ fei ku ba a sũa Nebukanɛsaa ilaalui Babilɔniu iri ilɛ nɔ a maa ceaa icɛ. Nɔ an jɔ̀ hee do mɛɛmui sako ŋa fei a sũaa iri ilɛi.

¹⁵ Ŋɔi walii Zeremi í sɔ̃ walii Hanania í ni, Hanania, sotĩ i gbɔ. Kù jɛ Aɔ̃ Lafɛ̃ɛi í bɛɛ wa, nɔ ì jɔ̀ zamaau ihɛ̃ í dasiɛ naanɛ si ibo.

¹⁶ Na nŋu, ide iyi Aɔ̃ Lafɛ̃ɛ í fɔ wee. Í ni nŋu á nyaɛi hai si andunyau ihɛ̃, nɔ adɔ̃ɔyi aa kui, domi lasabui ide ku kɔ̀ si gãmɛi Aɔ̃ Lafɛ̃ɛi ì naa zamaau wa.

¹⁷ Nɔ adɔ̃ nŋu bɛi walii Hanania í ku si cukpa mɛɛjesia.