Zeremi 27 - Bibeli do fee

Zeremi wa so zuugu si kɔngɔɛ ŋa

¹ Hai sintei bomma ku jɛi Zoakimu amai Zoziasi si ilɛi Zudaa, Aɔ̃ Lafɛ̃ɛ í ba Zeremi ide ku fɔ í ni,

² amu Aɔ̃ Lafɛ̃ɛ, ǹ wa n sɔ̃ɛi, ce ikũ ŋa do zuugu, nɔ i lesi kɔngɔɛ ŋa.

³ Nɔ i jɔ̀ a so ŋa a koo a na ilaalui Edɔmu si awɔ do ilaalui Moabu do ilaalui inɛi Amɔɔ ŋa do ilaalui Tii do ilaalui Sidɔ̃ɔ. Woo bɛ gɔ ŋa iyi à naa Zeruzalɛmu bi Sedesiasi ilaalui Zudaaui aa na,

⁴ nɔ i sɔ̃ ŋa i ni a sɔ̃ lafɛ̃ɛ nŋa ŋa bɛi amu Aɔ̃ Lafɛ̃ɛi inɛi Izirɛli ŋa amu Aɔ̃ Lafɛ̃ɛi lele do ilɛ ǹ fɔ dee dee.

⁵ Amui ǹ ce ilɛ do amanɛ ŋa do mɛɛmu ŋa iyi à wa si ilɛu do gbugbãm do kumàm, nɔ inɛ iyi ǹ bii ǹ na ilɛu.

⁶ Nsɛi bɛbɛi, ilɛ ŋau bɛ fei, an so ŋai n daa Nebukanɛsaa ilaalui Babilɔni woo ce icɛm nɔu si awɔ. Mɛɛmui sako ŋau mɔ, an so ŋai n daa si awɔ ku ba a maa cea icɛ.

⁷ Zamaai andunyau fei á maa ceaa icɛi nŋu do amaɛ do tɔkuɛ hee koo to waati iyi ilɛi nŋu takaɛ mɔ á na ku maa ceaa ilɛ ŋa do ilaalu ŋa iyi à roo do gbugbã ŋau icɛ.

⁸ Bii dimi gɔ walakɔ ilɛ gɔ kù waa cea Nebukanɛsaa ilaalui Babilɔni icɛ, nɔ kù jɛsi ku to kɔ̃ɔɛ ku so zuugui ilaalui Babilɔniu, an jɔ̀ igũ do ari do patapoo ku naa siɛ. Amu Aɔ̃ Lafɛ̃ɛ, bɛi ǹ fɔ mbɛ, nɔ do yaase bɛɛbɛi an kpaò irii dimiu.

⁹ Na nŋu, i maà gbɔ idei walii nŋɛ ŋa do ti woo ce alisi nŋɛ ŋa, aŋa iyi à ya maa tusɛ yaasei àla ŋa do kudũi ijĩ ŋa, walakɔ do dobu dobu ŋa iyi à maa ce. Inɛ bɛ ŋai aa sɔ̃ ŋɛ a maa ni i kù nɛ ku sũa ilaalui Babilɔniu iri ilɛ ŋa.

¹⁰ Amma ntɔ ntɔ, ide ŋa iyi à waa sɔ̃ ŋɛ ŋau bɛ fei ibo mbɛ. Bii ì gbɔ ide nŋa ŋa, inɛ ŋa aa na a mu ŋɛ hai ilɛ nŋɛ a nɛò ŋɛ hee jĩijĩ, nɔ si bɛɛbɛ an kpa iri nŋɛ mam mam.

¹¹ Amma Aɔ̃ Lafɛ̃ɛ í ni, dimi iyi í jɛsi nŋu ku so zuugu iyi ilaalui Babilɔni í kãa nŋuu, nɔ wa sũaa iri ilɛ, an jɔ̀ɛi ku buba si ilɛɛu nɔ ku maa logooɛ.

¹² Ide bɛɛbɛ ŋai ǹ sɔ̃ Sedesiasi ilaalui Zudaau cau cau. Ǹ sɔ̃ɔi ǹ ni, i toa ilaalui Babilɔni kɔ̃ɔ nŋɛ ŋa ku da nŋɛ si zuugu. I ceaa icɛ ŋa nŋu do zamaaɛu ku ba i maa wɛɛ si hunde ŋa.

¹³ Na mii í ce aa jɔ̀ i ku awɔ do inɛɛ ŋa si igũ do si ari do si bɔ̃ɔ bɛi Aɔ̃ Lafɛ̃ɛ í fɔ si gãmɛi dimi iyi kù jɛ ku sũa ilaalui Babilɔni iri ilɛ.

¹⁴ I maà gbɔ idei walii ŋa iyi à waa sɔ̃ ŋɛ à waa ni i maà sũa ilaalui Babilɔni iri ilɛu bɛ ŋa, domi walii iyi à ce à waa sɔ̃ ŋɛu bɛ ibo mbɛ.

¹⁵ Aɔ̃ Lafɛ̃ɛ í ni, kù jɛ amui ǹ bɛ ŋa wa. À ya ni idem nii aŋa à waa fɔ, amma iboi à ya maa sɔ. Bii ì gbɔ ide nŋa ŋa, an lele ŋɛi nɔ n kpa iŋɛ fei mam mam hee do aŋa iyi à waa ce nŋɛ walii ŋau fei.

¹⁶ Zeremi í ba woo wee ŋau do inɛ ŋa iyi à wa bɛ ŋau fei ide ku fɔ í ni, ide iyi Aɔ̃ Lafɛ̃ɛ í fɔ wee. Aɔ̃ Lafɛ̃ɛ í ni, i maà gbɔ ide ku fɔi walii nŋɛ ŋau ŋa, aŋa iyi à ce walii à waa ni, wee nsɛi bɛbɛi jĩnɛ ŋa iyi à jɛ ti Aɔ̃ Lafɛ̃ɛu aa baaò ŋa wa hai Babilɔni kaa kpɛ má. Ntɔ ntɔ, walii iyi à waa ce nŋɛu bɛ, iboi.

¹⁷ I maà gbɔ ide nŋa ŋa. I cea ilaalui Babilɔniu icɛ ku ba i wɛɛ si hunde ŋa. Na mii aa jɔ̀ ilu nŋɛ ku na ku kpɔò bomma ŋa.

¹⁸ Bii à jɛ walii ŋai, nɔ bii idei Aɔ̃ Lafɛ̃ɛ í wɛɛ do aŋa do ntɔi, a tɔɔ Aɔ̃ Lafɛ̃ɛi lele do ilɛ ku ba jĩnɛ ŋa iyi à gbe si inɔ kpasɛ̃i Aɔ̃ Lafɛ̃ɛu do si inɔ kpasɛ̃i ilaalui Zudaau do iyi à wa Zeruzalɛmu ŋau a maà nɛ Babilɔni má.

¹⁹ Ntɔ ntɔ Aɔ̃ Lafɛ̃ɛi lele do ilɛ í fɔ ide si gãmɛi sɔbe ŋa iyi à jɛ ti kpasɛ̃ɛu do si gãmɛi dangala nlau do si gãmɛi sarɛtii isɔ nkpa ŋau do si gãmɛi jĩnɛ mmu ŋa iyi à gbe Zeruzalɛmu bɛ máu.

²⁰ Inɛ nŋu ŋau à gbe Zeruzalɛmu bɛ, si waati iyi Nebukanɛsaa ilaalui Babilɔni í mu Yekonia ilaalui Zudaa iyi wa jɛ amai Zoakimu do inɛ ngboi Zudaa ŋa do ti Zeruzalɛmu ŋau í nɛò ŋa.

²¹ Ŋɔi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í nyi í fɔ má si gãmɛi jĩnɛ ŋa iyi à gbe si inɔ kpasɛ̃i Aɔ̃ Lafɛ̃ɛ do si kpasɛ̃i ilaalui Zudaa do si inɔ ilu Zeruzalɛmu í ni,

²² aa nɛò fei ndɛɛ Babilɔnii, nɔ bɛi aa maa wa hee koo to ajɔ iyi an baaò ŋa wa ihɛ̃ má. Ide iyi Aɔ̃ Lafɛ̃ɛ í fɔ mbɛ.