Zeremi 26 - Bibeli do fee

À waa bi a kpa Zeremi

¹ Hai sintei bomma ku jɛi Zoakimu amai Zoziasi si ilɛi Zudaa, Aɔ̃ Lafɛ̃ɛ í ba Zeremi ide ku fɔ í ni,

² ide iyi amu Aɔ̃ Lafɛ̃ɛ ǹ wa n sɔ̃ɛ wee. Koo i leekĩ bantumai kpasɛ̃i amu Aɔ̃ Lafɛ̃ɛu, nɔ i ba inɛ ŋa iyi à waa naa amu Aɔ̃ Lafɛ̃ɛ ku tɔɔ hai si ilui Zudaa ŋau fei ide ku fɔ. Sisi nŋa ide ŋa iyi an sɔ̃ɛ ŋau fei. Maà jɔ̀ baa ide icu akã.

³ Á yɔkɔ ku jɛ aa gbɔ nɔ aŋa fei a fũsi yaasei kuwɛɛ laalɔ nŋa awɔ. Ǹ nɛ lasabui n jɔ̀ wahala ku naa si ŋa na laalɔ ŋa iyi à waa ce. Amma bii à gbɔ, n kaa n jɔ̀ ku naa si ŋa má.

⁴ Na nŋu, sɔ̃ ŋa i ni bɛi amu Aɔ̃ Lafɛ̃ɛ ǹ fɔ. Ǹ ni, i sotĩ i gbɔ idei amu Aɔ̃ Lafɛ̃ɛ ŋa nɔ i too si ikɔ ŋa iyi ǹ na ŋɛ.

⁵ I mu laabaau iyi walii woo ce icɛm ŋau à waa sɔ̃ ŋɛ ku ce ncɛɛ. N kù gbɛɛjiò walii ŋa ku bɛ si ŋɛ wa ajɔ kãma, amma i ci ya gbɔ ide nŋa ŋai.

⁶ Bii i kù waa jɛ ku gbɔ idem ŋa, an lɛgɛ kpasɛ̃i amu Aɔ̃ Lafɛ̃ɛu ihɛ̃i bɛi ǹ lɛgɛ ti Siloou. Nɔ an jɔ̀ Zeruzalɛmu ku baa ku jɛ yaase iyi inɛi andunya fei á ya so ku ceekpeò.

⁷ Ŋɔi woo wee ŋa do walii ŋa do inɛ ŋa iyi à wa bɛ fei à gbɔ Zeremi wa fɔ ide ŋau si bantumai kpasɛ̃i Aɔ̃ Lafɛ̃ɛu.

⁸ Waati iyi Zeremi í fɔ ide ŋa iyi Aɔ̃ Lafɛ̃ɛ í sɔ̃ɔ í ni ku sɔ̃ inɛ ŋau fei í tã, ŋɔi woo wee ŋa do walii ŋa do zamaau fei à muu nɔ à sɔ̃ɔ à ni, í to a kpaɛ.

⁹ Bɛirei í ce ì jɛ ì waa ce walii do irii Aɔ̃ Lafɛ̃ɛ ì waa ni, aa lɛgɛ kpasɛ̃i Aɔ̃ Lafɛ̃ɛu ihɛ̃ bɛi à lɛgɛ ti Siloou nɔ iluu ihɛ̃ ku baa ku kpɔò bomma inɛ kãma kaa wa si. Ŋɔi zamaau fei í naa í tɔtɔɔ í kaako Zeremi si bantumai kpasɛ̃i Aɔ̃ Lafɛ̃ɛu.

¹⁰ Waati iyi akawei Zudaa ŋa à gbɔ ide ŋau, ŋɔi à dede wa hai kabai ilaaluu à naa bantumai kpasɛ̃i Aɔ̃ Lafɛ̃ɛu nɔ à koo à buba anu koofai gambo titɔ̃i kpasɛ̃i Aɔ̃ Lafɛ̃ɛu.

¹¹ Ŋɔi woo wee ŋau do walii ŋau à sɔ̃ akawe ŋau do zamaau fei à ni, ikui í nɛ ku jɛ ti inɛɛu ihɛ̃, domi í ce walii sãmi si gãmɛi iluu ihɛ̃ bɛi iŋɛ taka nŋɛ ì gbɔɔ do itĩ nŋɛ ŋa.

¹² Ŋɔi Zeremi í sɔ̃ akawe ŋau do zamaau fei í ni, Aɔ̃ Lafɛ̃ɛi í bɛm wa n naa n ce walii si gãmɛi kpasɛ̃u ihɛ̃ do si gãmɛi iluu ihɛ̃. Nɔ ide ŋa iyi í ni n fɔu fei, nŋui ì gbɔ ŋau bɛ.

¹³ Bɛbɛi, i teese isɛɛnɛ nŋɛ ŋa nɔ i kpaasi kuce nŋɛ ŋa. I sotĩ i gbɔ idei Aɔ̃ Lafɛ̃ɛ nŋɛ ŋa ku ba ku fũsi laalɔ iyi í dasi idɔ nŋu ku ce nŋɛu awɔ.

¹⁴ Amma amu, si awɔ nŋɛi ǹ wa. I ceem bɛi í sĩa nŋɛ si do bɛi í jɛ nŋɛ dee dee ŋa.

¹⁵ Amma mii iyi ì nɛ i mà ŋa wee. Bii ì kpam ŋa, hai nɛ taalei ì kpa ŋa bɛ, nɔ njɛm ku dikãɛ á jɛ idei iri nŋɛ, iŋɛ do zamaai iluu ihɛ̃ fei, domi ntɔ ntɔ Aɔ̃ Lafɛ̃ɛi í bɛm wa bi tu ŋɛ n naa n sɔ̃ ŋɛ ide ŋau bɛ fei.

¹⁶ Ŋɔi akawe ŋau do zamaau fei à sɔ̃ woo wee ŋau do walii ŋau fei à ni, inɛɛu ihɛ̃ kù nɛ ku ku má, domi ntɔ ntɔ, ide iyi Aɔ̃ Lafɛ̃ɛ nwa í sɔ̃ɔ wai í naa í sisi nwa.

¹⁷ Nɔ mɔm inɛ gɔ ŋa hai si inɔi inɛ ngbo ŋa iyi à wa si ilɛu, à dede à sɔ̃ zamaau fei à ni,

¹⁸ si waatii Ezekiasi ilaalui Zudaa, walii gɔ í wɛɛ iyi à ya kpe Misee inɛi Moresɛti. Nŋui í ce walii í sɔ̃ zamaai Zudaa fei í ni, ide iyi Aɔ̃ Lafɛ̃ɛi lele do ilɛ í fɔ wee. Í ni, Siɔ̃ɔ á na ku yɛi bɛi iko iyi à logoo à nya fiiɛ, Zeruzalɛmu mɔ bɛi ilu iyi í cuku í ce geete, nɔ iri kuta bii kpasɛ̃i Aɔ̃ Lafɛ̃ɛ í wau mɔ á ce agboi, fɔfɔ ku biiɛ fei.

¹⁹ Waati bɛɛbɛ, ilaalu Ezekiasi do zamaai Zudaa ŋau à kpa walii Miseei? Aawo. Ngu ŋa à jirima Aɔ̃ Lafɛ̃ɛi, nɔ à tɔɔɛ suuru. Nɔ Aɔ̃ Lafɛ̃ɛ í fũsi laalɔ iyi í dasi idɔ ku ce nŋau awɔ. Nɔ nŋui awa aa ka cea ara nwa laalɔ nla nla?

Zoakimu í jɔ̀ à kpa Uria waliiu

²⁰ Si afe gɔ wo inɛ gɔ í ya ce walii do irii Aɔ̃ Lafɛ̃ɛ. Inɛɛui à ya kpe Uria amai Semaya. Inɛɛu inɛi Kiria-Yarimui. Nŋu mɔ í ce walii do irii Aɔ̃ Lafɛ̃ɛ bɛi Zeremi í ceu si gãmɛi ilui Zeruzalɛmu do si gãmɛi ilɛi Zudaa.

²¹ Ŋɔi ilaalu Zoakimu do inɛmɔkɔ kaasãanɛɛ ŋa do akaweɛ ŋau fei à gbɔ ide ŋa iyi Uria í fɔu. Ŋɔi ilaaluu wa dɛdɛ ku kpaa. Amma waati iyi Uria í gbɔ iyi ilaaluu wa dɛdɛ ku kpa nŋu, njo í muu nɔ í sa í nɛ ilɛi Ezibiti.

²² Ŋɔi ilaalu Zoakimu í bɛ Elinatãa amai Akubɔɔ do inɛ mmu gɔ ŋa má Ezibiti.

²³ Inɛ ŋau à koo à mu Uria wa à baaɛ wa à koo à na ilaalu Zoakimu, nɔ í jɔ̀ à gũu do taakuba à kpaa, à bɛi à so ikuɛu à koo à dasi inɔ balɛ bii à si zamaa nkpɔ nkpɔ.

²⁴ Amma Ahikamu amai Safãa í bii si Zeremi awɔ nɔ í ganji a soo a daa zamaau si awɔ a kpaa.