Zeremi 25 - Bibeli do fee

Waazoi adɔ̃ kɔnfia do mɛɛta

¹ Si adɔ̃ mɛɛsiai bomma ku jɛi Zoakimu amai Zoziasi, Aɔ̃ Lafɛ̃ɛ í ba Zeremi ide ku fɔ si gãmɛi zamaai Zudaau fei. Waatiu bɛ adɔ̃ sintei bomma ku jɛi Nebukanɛsaa ilaalui Babilɔni mbɛ.

² Ŋɔi Zeremi í sɔ̃ zamaai Zudaa ŋau fei ideu. Nɔ í fɔɔi si wajui inɛi Zeruzalɛmu ŋa fei í ni,

³ hai si adɔ̃ maatɛtasiai bomma ku jɛi Zoziasi amai Amɔɔ ilaalui Zudaa hee ku baa nnyi, adɔ̃ kɔnfia do mɛɛta wa mbɛ iyi n kù gbɛɛji ǹ wasi ku sɔ̃ ŋɛ idei Aɔ̃ Lafɛ̃ɛ, amma i kù waa jɛ ku gbɔɔ ŋa.

⁴ Do nŋu fei, Aɔ̃ Lafɛ̃ɛ kù gbɛɛjiò walii woo ce icɛɛ ŋau ku bɛ si ŋɛ wa. Amma ì kɔ̀ ku gbɔ ŋa, nɔ i kù bi i ce si laakai ŋa mɔm.

⁵ Aɔ̃ Lafɛ̃ɛ wa sɔ̃ ŋɛ wa ni, i jɔ̀ kpãa laalɔ iyi ì waa too ŋau ŋa, nɔ i jɔ̀ inɔ kukã ku ce nŋɛ ŋau nɔ i sinda i baa wa ŋa bi amu Aɔ̃ Lafɛ̃ɛ nɔ i buba si ilɛ iyi ǹ muaa iŋɛ do bala nŋɛ ŋau hee do ajɔ fei.

⁶ I maà jɔ̀ iŋɛ do iwɛ̃ ŋa i nɛ anu akã hee i koo i maa tɔɔ ŋa nɔ i maa sɛɛbata si waju nŋa ŋa. I maà ce iwɛ̃ ŋa i dedeò idɔɔkɔ̃m má ŋa, nɔ amu mɔ n kaa ce nŋɛ laalɔ kãma.

⁷ Do nŋu fei wee i kù jɛ ku gbɔ idem ŋa, í gbe ì ce iwɛ̃ ŋa ì dedeò idɔɔkɔ̃m ŋa nɔ nŋui í jɔ̀ ì waa ba wahala ŋa.

⁸ Na ŋɔi í jɔ̀ Aɔ̃ Lafɛ̃ɛi lele do ilɛ í ni, si bɛi ì kɔ̀ ku gbɔ ide iyi ǹ wa n fɔ ŋa,

⁹ an jɔ̀ zamaa iyi í wa ikpa awɔ njɛi kpãai inunuu fei ku naa. Nebukanɛsaa woo ce icɛm iyi í jɛ ilaalui Babilɔniui an jɔ̀ ku naa si ilɛ nŋɛ do si inɛ ŋa iyi à wa bɛ, do si dimi ŋa iyi à kaako ilɛu fei ku ba a kpa aŋa fei mam mam. Á jɔ̀ ilɛu ku kpɔò bomma hee do ajɔ fei nɔ ku mu inɛ fei biti nɔ ku jɛ dɔ̃anyi.

¹⁰ An jɔ̀ ibai jingau ŋa ku kpa irii bi tu ŋɛ, do anu ku dɔ̃i inɔ didɔ̃ ŋa, do iri ku kɔ̃i abɔdɔ̃ ŋa. Nɔ an jɔ̀ ibai alɔ ŋa mɔ ku kpa irii do inya kumái fitila ŋa.

¹¹ Ilɛu fei á baa ku kpɔò bommai, nɔ inɛi ilɛ ŋau, arui ilaalui Babilɔnii aa koo a jɛ zakai adɔ̃ kitaò fɛɛwa.

¹² Amma waati iyi adɔ̃ kitaò fɛɛwau á kɔ̃, amu Aɔ̃ Lafɛ̃ɛ, amu takam nii an koo si ilaalui Babilɔniu do si inɛɛ ŋa na kurara nŋa ŋa. An koo si inɛi Kaladee ŋa mɔ nɔ n jɔ̀ a dasi nfe ku ce hee do ajɔ fei.

¹³ Laalɔ ŋa iyi ǹ tako ǹ fɔ ideɛ si gãmɛi ilɛu bɛ fei, an jɔ̀ ku ba ŋai. Zeremii í ce waliii fei ndɛɛ nɔ à kɔɔ si tiau ihɛ̃.

¹⁴ Inɛi Babilɔni ŋau mɔ aa na a koo a jɛ aru si ilɛ ŋa iyi à la à re ŋa do bi ilaalu ŋa iyi à re ŋa do gbugbã. Waati bɛɛbɛi an sãa aŋa mɔ laalɔ ŋa iyi à ce fei.

Idɔɔkɔ̃i Aɔ̃ Lafɛ̃ɛ si waatii kiitiɛ

¹⁵ Ŋɔi Aɔ̃ Lafɛ̃ɛi inɛi Izirɛli ŋau í bam ide ku fɔ í ni, gba kɔɔfu iyi í kɔ̃ do atɛ̃ vɛ̃ɛi idɔɔkɔ̃u ihɛ̃ hai si awɔm, nɔ i jɔ̀ dimi ŋa iyi ǹ wa n bɛɛ bi tu ŋau aŋa fei a mɔ.

¹⁶ Aa mɔi hee ku maa cĩ ŋa iju nɔ ku sũmu ŋa waati iyi aa yɛ woo ce igũ ŋa iyi an jɔ̀ a naa si ŋa.

¹⁷ Ŋɔi ǹ gba kɔɔfuu hai si awɔi Aɔ̃ Lafɛ̃ɛ, nɔ ǹ jɔ̀ dimi ŋa iyi Aɔ̃ Lafɛ̃ɛ í bɛm bi tu ŋa ŋau fei à mɔ.

¹⁸ Ŋɔi ǹ sintiɛ hai si ilui Zeruzalɛmu, do si ilui Zudaa ŋa. Hai bi ilaaluɛ ŋa hee ku koo si akaweɛ ŋa, ku ba ilu nŋa ŋau a kpɔò bomma, hee inɛ ŋa a biti nɔ a baa a jɛ dɔ̃anyi, nɔ mii iyi á ba ŋau ku jɛaa inɛ ŋa yaase iyi aa ya so waati iyi à waa bi a ceekpe inɛ gɔ fei. Nŋui wa ce bɛ nnyiu ihɛ̃.

¹⁹ Nɔ nŋui í to wa si Faraɔ̃ ilaalui Ezibiti do soogeɛ ŋa do akaweɛ ŋa hee do zamaaɛ ŋa fei.

²⁰ Nɔ í to si dimi ikã ikã ŋa iyi à wa si ilɛi Ezibitiu mɔ feii. Hai ilaalu ŋa iyi à wa ilɛi Usi fei, do ilaalu ŋa iyi à wa ilɛi Filisi fei. Í to si inɛi Asikalɔ̃ɔ ŋa, do inɛi Gaza ŋa, do inɛi Ekorɔ̃ɔ ŋa, nɔ í to si inɛ ŋa mɔ iyi à gbe iyi à wa ilɛi Asidodi.

²¹ Í to hee si inɛi Edɔmu ŋa do inɛi Moabu ŋa do si inɛi Amɔɔ ŋa.

²² Nɔ í to si ilaalu ŋa mɔ iyi à wa ilɛi Tii fei, do bi ilaalui Sidɔ̃ɔ ŋa mɔ fei, do ilaalu ŋa mɔ iyi à wa gũngũm do ikpa alalai tenkuu.

²³ Í to si inɛi ilɛi Dedãa ŋau mɔ, do si inɛi Temaa ŋa, do si inɛi Buzu ŋa hee do si inɛ ŋa iyi à ya wa agbã nŋa ŋau fei.

²⁴ Í to si ilaalu ŋa iyi à wa ilɛi Arabi hee do si dimii ikã ikã ŋa iyi à wa gbaau fei.

²⁵ Í to si ilaalu ŋa iyi à wa Zimiriu fei, do si ilaalu ŋa iyi à wa Elamu do Mɛɛdi fei.

²⁶ Í to si ilaalu ŋa iyi à wa ikpa awɔ njɛi kpãai inunu, hai inɛ ŋa iyi à wa amɛɛ hee do inɛ ŋa iyi à wa hee jĩijĩ ŋau fei. Inɛ baa yooma iyi í wa si andunyau ihɛ̃ fei, akã akã á mɔ kɔɔfui idɔɔkɔ̃ɛui ku bɛi koo kpaò iri si ilaalui Sesaaki.

²⁷ Ŋɔi Aɔ̃ Lafɛ̃ɛ í ni n sɔ̃ ŋa n ni, ide iyi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í fɔ wee. Í ni, i mɔ ŋa hee ku kpa ŋɛ, nɔ i tu ŋa, nɔ i cuku i maà dede má ŋa waati iyi ì yɛ taakuba iyi amu Aɔ̃ Lafɛ̃ɛ ǹ jɔ̀ wa naa si ŋɛu.

²⁸ Nɔ bii à kɔ̀ kɔɔfuu ku gba ku mɔ hai si awɔɛ, aa sɔ̃ ŋa i ni, Aɔ̃ Lafɛ̃ɛi lele do ilɛ í ni, aa mɔɔ ŋai bɛi í jɛò fei.

²⁹ Nɔ wahalau á sintii hai si ilu iyi à nya ikã í jɛ titom nɔu. Nɔ iŋɛ taka nŋɛ i kaa fita si ŋa, domi i kaa jɛ hai nɛ taale ŋa. An ce nŋɛi bɛi ilu taale ŋau. Iyi í re mɔm, an jɔ̀ igũ ku cei si andunyau fei. Amu Aɔ̃ Lafɛ̃ɛi lele do ilɛi ǹ fɔ bɛɛbɛ.

³⁰ Ŋɔi Aɔ̃ Lafɛ̃ɛ í nyi í sɔ̃m má í ni, sisi nŋa idem ŋa iyi ǹ sɔ̃ɛ ŋau bɛ fei. Nɔ i sɔ̃ ŋa má i ni, Aɔ̃ Lafɛ̃ɛ wa dɔ̃ anu wa hai lele. Wa fɔ ide wa hai bi kuwa kumáɛu. Anu ku dɔ̃ɛ ŋau, si gãmɛi inɛɛ ŋai. Wa dɔ̃ anui si inɛ ŋa iyi à wa si ilɛu fei bɛi anu ku dɔ̃i inɛ ŋa iyi à waa lɔlɔ isoi rezɛ̃ɛ ku ba a ba vɛ̃ɛ.

³¹ Iba iyi wa ceu wa bɔi hee kɔɔi andunyau fei. Aɔ̃ Lafɛ̃ɛ wa ce kiitii do dimi ŋa iyi à wa si andunyau fei. Wa kpe inɛ baa yooma feii ile bi ku ce kiitiɛ. Nɔ nfe ku cei á jɛ ti inɛ ŋa iyi í yɛ taale nŋa. Ide iyi Aɔ̃ Lafɛ̃ɛ í fɔ mbɛ.

³² Aɔ̃ Lafɛ̃ɛi lele do ilɛ í ni, wahalau á fangaai si ilɛu akã akã ku maa koo. Fufu dabii nla nla á dedei si gonta mɛɛi andunyau fei.

³³ Waati iyi mii ŋau bɛ aa na a maa ce, inɛ kãma kù wɛɛ hai kɔɔi andunya ihɛ̃ hee ku bɔ kɔɔ ihɔ̃ iyi á maa kpata na iku ŋau bɛ. Inɛ kãma kaa tɔtɔɔ iku nŋa ŋau, nɔ inɛ kãma kaa si ŋa. Aa baa a jɛi bɛi taasii ilɛ.

³⁴ I kɔ̃ irii inɔ kufɔ nɔ i dɔ̃ anu ŋa, iŋɛ woo gbãi zamaa ŋau. I sũ i bimbili ilɛ ŋa, iŋɛ woo degbe ŋau, domi waati iyi aa saka ŋɛi í to wa bɛ. Aa cuku ŋai nɔ i lɛgɛ bɛi jɛɛ ilu bɛɛrɛ ŋa.

³⁵ Woo gbãi zamaa ŋau mɔ, a kù nɛ kpãa kãma iyi aa ba a fita siò. Woo degbe ŋau mɔ a kaa yɔkɔ a sa a bɔ bii kãma.

³⁶ Ǹ wa n gbɔ anu ku dɔ̃ nŋa tã do weewea nŋa na ara kuro. Aɔ̃ Lafɛ̃ɛ í kpa irii bi ku ce degbe nŋai.

³⁷ Idɔɔkɔ̃ nla nlaɛu í jɔ̀ ilu í coko cau hee do si inɔ sako ŋa fei bɛi bii iku í ce.

³⁸ Aa ni bɛi muusu nla í fita hai si inɔ bi kuwaɛi. Ilɛ nŋau í baa í kpɔò gbaa na igũ hai nɛ araare iyi wa ce si ilɛu do na idɔɔkɔ̃ nla nlai Aɔ̃ Lafɛ̃ɛu.