Zeremi 24 - Bibeli do fee

Isoi figi kɔlɔ minji

¹ Aɔ̃ Lafɛ̃ɛ í jɔ̀ ǹ yɛ isoi figi kɔlɔ minji gɔ ŋa iyi à waa jilɛ si andɛi kpasɛ̃i nŋu takaɛ bɛ. Iyi bɛ í cei si waati iyi Nebukanɛsaa ilaalui Babilɔni í so Yekonia amai Zoakimu ilaalui Zudaa í nɛòɛ ilɛi Babilɔni. I muui nŋu do akawei bommaɛ ŋau do woo gbe jĩi ŋa do gbɛdɛ ŋau.

² Kɔlɔ sinteu í nɛ isoi figi kusĩa jiida gɔ ŋa bɛi ti figi kujĩa sinte ŋau. Nɔ kɔlɔ iyi ihɔ̃u mɔ í nɛ figi ŋa. Amma isoi figi ŋa iyi à wa si inɔɛu, inɛ kãma kaa yɔkɔ ku jɛ ŋa, si na iyi í jɔ̀ à sãmii ntɔ ntɔ.

³ Ŋɔi Aɔ̃ Lafɛ̃ɛ í beem í ni, Zeremi, mii ì yɛ. Ŋɔi ǹ jɛaa ǹ ni, isoi figi ŋai ǹ yɛ. Nɔ isoi figi ŋa iyi à ce ncɛɛ ŋau, à ce ncɛɛi ntɔ ntɔ. Nɔ iyi à jɛ laalɔ ŋau mɔ, à ce laalɔi ntɔ ntɔ hee inɛ kãma kaa yɔkɔ ku jɛ ŋa na laalɔ ku jɛ nŋau.

⁴ Ŋɔi Aɔ̃ Lafɛ̃ɛ í bam ide ku fɔ má í ni,

⁵ ide iyi Aɔ̃ Lafɛ̃ɛi inɛi Izirɛli ŋa í fɔ wee. Í ni, yaase bɛi aa maa cɔ isoi figi jiida ŋau bɛ, bɛɛbɛ mɔi an maa n cɔ inɛi Zudaa ŋa iyi ǹ jɔ̀ à mu ŋa hai ihɛ̃ à nɛò ŋa ilɛi inɛi Kaladee ŋau.

⁶ Ntɔ ntɔ an maa n cɔ ŋai do iju jiida, nɔ an jɔ̀ a nyi a baa si ilɛu ihɛ̃ mái. N kù bi n kpa ŋa amma an jɔ̀ a ba gbugbã a kɔ̃ɔsii. N kù bi n tu ŋa, amma an teese n lɔ ŋai.

⁷ An jɔ̀ a mà iyi amui ǹ jɛ Aɔ̃ Lafɛ̃ɛ. Bii à sinda a nyi wa bi titom do idɔ nŋa fei, waati bɛɛbɛ aa jɛ inɛm ŋa, nɔ amu mɔ an jɛ Aɔ̃ Lafɛ̃ɛ nŋa.

⁸ Amma ǹ fɔ si gãmɛi Sedesiasi ilaalui Zudaa do akaweɛ ŋa do zamaa iyi í gbe Zeruzalɛmu do inɛ ŋa iyi a kù fita hai si ilɛu, hee do inɛ ŋa mɔ iyi à koo à buba ilɛi Ezibiti fei ǹ ni, bɛi aa cea figi ŋa iyi a kù ce ncɛɛ hee inɛ kãma kaa yɔkɔ ku jɛ ŋau bɛ, bɛɛbɛ mɔi an cea ilaalu Sedesiasi do inɛi anyiɛ ŋau fei.

⁹ An jɔ̀ yaasei kuwɛɛ nŋa ku jɛaa inɛ ŋa zigiidai bi bommai ilɛ ŋau fei. Tengi bii an fangaa ŋa a koo a wa fei, aŋai aa jɛ yaase iyi inɛ ŋa aa ya so waati iyi à waa bi a bú inɛ gɔ, walakɔ waati iyi à waa yaako inɛ gɔ, walakɔ waati iyi à waa kɔ̃ irii inɔ kukã gɔ, walakɔ waati iyi à waa bi a ceekpe inɛ gɔ.

¹⁰ An jɔ̀ inɛ ŋa a naa si ŋa igũi do taakuba, nɔ ari do patapoo hee a koo a kpaò iri hai si ilɛ iyi ǹ na aŋa do bala nŋa ŋau.