Zeremi 23 - Bibeli do fee

Inɛ ngbo laalɔ ŋa do ilaalu woo faaba

¹ Aɔ̃ Lafɛ̃ɛ í ni, inɔ kufɔi í jɛ ti woo degbe ŋa iyi à waa nyɔ mɛɛmum ŋa, nɔ à waa fangaa ŋa.

² Na ŋɔi í jɔ̀ Aɔ̃ Lafɛ̃ɛi inɛi Izirɛli ŋau í nyi í fɔ má si gãmɛi inɛ ŋa iyi à waa degbe inɛɛ ŋau í ni, ì fangaa angudãm ŋa, ì lele ŋa ŋa, i kù gbɔ nŋa ŋa. Na nŋu, i cɔ, an naa si ŋɛ na kuce laalɔ nŋɛ ŋau.

³ Amu takam nii an tɔtɔɔ mɛɛmu gaam ŋa iyi à gbeu wa hai ilɛ ŋa bii ǹ lele ŋa ǹ jɔ̀ à nɛu fei. An baaò ŋa wai si aro nŋa. An jɔ̀ a bí, nɔ aa kpɔ a kɔ̃ɔsi.

⁴ An jɔ̀ a ba woo degbe jiida ŋa iyi aa maa degbe ŋa, nɔ njo kaa mu ŋa hee a maa yaya má, nɔ baa akã nŋa kaa gaizia má. Amu Aɔ̃ Lafɛ̃ɛ ǹ fɔ bɛɛbɛ.

⁵ Ŋɔi Aɔ̃ Lafɛ̃ɛ í ni, ajɔ wa naa si bii an jɔ̀ inɛ dee dee gɔ ku fita si tuubai Davidi bɛi ijui dimi ku gbɛ̃ iyi í fita. Nŋui á jɛ ilaalu nɔ á maa mu ilɛui do laakai jiida. Nŋui á ce mii iyi í tɛ do iyi í jɛ dee dee si ilɛu.

⁶ Si waatiɛi inɛi Zudaa ŋa aa ba faaba, nɔ inɛi Izirɛli ŋa aa jɛ kuwɛɛ nŋai do laakai ku sũ. Iri iyi aa ya kpoo doi í jɛ, Aɔ̃ Lafɛ̃ɛi í jɛ woo kiiti nwa.

⁷ Ŋɔi Aɔ̃ Lafɛ̃ɛ í ni má, ajɔ wa naa iyi inɛ ŋa a kaa ya ce kugbasi má do irii Aɔ̃ Lafɛ̃ɛ nŋu iyi í wɛɛ, nŋu iyi í nya inɛi Izirɛli ŋa wa hai ilɛi Ezibiti.

⁸ Amma aa ya ce kugbasii a ni, do irii Aɔ̃ Lafɛ̃ɛ nŋu iyi í wɛɛ, nŋu iyi í jɔ̀ à mu dimii inɛi Izirɛli ŋa à nɛò ŋa ilɛi ikpa awɔ njɛi kpãai inunu, nɔ í nyi í jɔ̀ à baa má, do hai si ilɛ ŋa bii í lele ŋa í jɔ̀ à nɛu fei. Aa nyi a baai má a na a buba si ilɛ nŋa.

Walii ilu ibo ŋa

⁹ Si gãmɛi walii ŋau, inɔm í fɔ ntɔ ntɔ, nɔ hee do kũkũm ŋa fei wa yaya. Ǹ baa ǹ yɛi bɛi inɛ iyi atɛ̃ wa kpaa, bɛi inɛ iyi í kua yaase na atɛ̃, na ide ŋa iyi Aɔ̃ Lafɛ̃ɛi lele do ilɛ í fɔu.

¹⁰ Ntɔ ntɔ ilɛu í kɔ̃i do inɛ ŋa iyi à sinda à toa Aɔ̃ Lafɛ̃ɛ anyi à koo à waa tɔɔ iwɛ̃ ŋa. Inɔ kufɔi iku í wa si ilɛui na ikpe. Bi ku ce degbe ŋau fei à gbɛ. Laalɔi inɛ ŋa à ya maa sɛi si, nɔ si mii iyi kù jɛ dee deei à ya nɛ himma.

¹¹ Walii do woo wee ŋau fei à baa à jɛ inɛ laalɔ ŋa. Aɔ̃ Lafɛ̃ɛ í ni, ǹ yɛ inɔ kukã í wa baa si inɔ kpasɛ̃ nŋa ŋai.

¹² Na ŋɔi í jɔ̀ kpãa nŋa á nɛ yɔɔgɔ do ilu kuku. Aa tale ŋai nɔ a cuku, domi an jɔ̀ laalɔ ku naa si ŋa si adɔ̃ iyi an naa si ŋa.

Walii ŋa iyi laalɔ ku ce nŋa í re ti Samari ŋau

¹³ Aɔ̃ Lafɛ̃ɛ í ni, mii iyi ǹ yɛ bi waliii Samari ŋau í fɔ inɔm ntɔ ntɔ. À ya ce waliii do irii iwɛ̃ Baali, nɔ à jɔ̀ zamaam inɛi Izirɛli ŋau à nyɔ.

¹⁴ Amma mii iyi ǹ yɛ bi waliii Zeruzalɛmu ŋau í nyi í sãmi í caa má. Inɛ ŋau woo ce sakara ŋai, nɔ si iboi à waa jɛ kuwɛɛ nŋa. À ya maa muaa inɛ laalɔ ŋa himmai si laalɔ ku ce nŋa ku ba baa inɛ akã nŋa ku maà sinda ku toa inɔ kukãɛ anyi. Aŋa fei à yɛi si wajum bɛi inɛi Sodomu ŋa, nɔ inɛi Zeruzalɛmu ŋa mɔ, à yɛi bɛi inɛi Gomɔɔ ŋa.

¹⁵ Ŋɔi Aɔ̃ Lafɛ̃ɛi lele do ilɛ í fɔ si gãmɛi walii ŋau í ni, sɔnda iyi í roi an jɔ̀ a jɛ, nɔ n tilasi ŋa n jɔ̀ a mɔ inyi iyi í nɛ iwɔ ku kpa inɛ, domi aŋa waliii Zeruzalɛmu ŋaui à jɔ̀ inɛ ŋa a kù waa saalu kpãai Aɔ̃ kutɔɔ si ilɛu fei.

Walii ilu ibo ŋai

¹⁶ Aɔ̃ Lafɛ̃ɛi lele do ilɛ í ni, i maà gbɔ ide iyi walii ŋau à waa sɔ̃ ŋɛ, domi à waa fɔtɔtɔi lasabu nŋɛ ŋai. Idei kuyɛ ŋa iyi à waa sɔ̃ ŋɛu bɛ, hai si lasabui aŋa taka nŋai wa naa, kù jɛ hai si lasabui amu Aɔ̃ Lafɛ̃ɛ.

¹⁷ Baa inɛ ŋa iyi à ya maa yaakom, à ya sɔ̃ ŋai a ni amu Aɔ̃ Lafɛ̃ɛ ǹ ni aa nɛ laakai ku sũ. Nɔ à ya sɔ̃ baa inɛ ŋa iyi à waa too si idɔ kulele nŋa ŋau a ni laalɔ kãma kaa ba ŋa.

¹⁸ Amma yoo nŋai awaò à buba à jilɛ ide gɔ. Yoo nŋai í yɛ nɔ í gbɔ ide iyi amu Aɔ̃ Lafɛ̃ɛ ǹ fɔ. Yoo nŋai í ce laakaii idem nɔ í gbɔ yaaseɛ.

¹⁹ Ŋɔi Zeremi í ni, fufu dabii nla nlai Aɔ̃ Lafɛ̃ɛ wee wa naa. Idɔɔkɔ̃ɛi í dede, nɔ í yɛi bɛi fufu dabii nla nla iyi í na wa bibii si irii ilu inɔ kukã ŋa.

²⁰ Nɔ idɔɔkɔ̃i Aɔ̃ Lafɛ̃ɛu kaa sinda, í gbe hee koo kpa irii mii ŋa iyi í bi ku ce si idɔɛ fei. Ajɔ akã, aa na i gbɔ yaaseɛ ŋa.

²¹ Ŋɔi Aɔ̃ Lafɛ̃ɛ í ni má, walii ŋau bɛ kù jɛ amui ǹ bɛ ŋa wa, nɔ do nŋu fei à sɛi à naa. Kù jɛ amui ǹ ba ŋa ide ku fɔ, amma à naa à waa ce walii.

²² Bii í jɛ awaò ŋa à buba à fɔ ide mɔm nii wo, aa yɔkɔ a sɔ̃ inɛm ŋa bɛi ǹ fɔ fei, nɔ aa jɔ̀ a sinda a jɔ̀ kpãa laalɔ nŋa do kuce laalɔ nŋa ŋau.

Aɔ̃ Lafɛ̃ɛ í wa si andunyaui bii fei

²³ Ŋɔi Aɔ̃ Lafɛ̃ɛ í ni, ǹ jɛ Aɔ̃ Lafɛ̃ɛ iyi í wa bii fei. Ǹ wa amɛɛ nɔ ǹ wa hee jĩijĩ.

²⁴ Ŋɔi Aɔ̃ Lafɛ̃ɛ í nyi í bee má í ni, inɛ gɔ á yɔkɔ ku manji bii gɔ iyi n kù yɔɔi? Ǹ wai bii fei, lele do ilɛ.

Maà yɔgɛɛ fɔfɔ do ijui amaajɛ

²⁵ Amu Aɔ̃ Lafɛ̃ɛ, ǹ gbɔ bɛi walii ŋa à ya maa fɔ. Walii iboi à ya maa ce do irim, a maa ni, ǹ ce kuyɛ, ǹ ce kuyɛ.

²⁶ Hee waati yoomai walii ilu ibo ŋau bɛ aa kɔ̀ a nɛ idɔi a maa mɔsi do walii ibo ŋa ku ceu. Lasabu yoomai walii ŋau ihɛ̃ à ya nɛ, waati iyi à waa sɔ ibo bɛɛbɛ, waati iyi à bu ide nŋa à waa fɔ à waa dĩò ijui inɛ ŋa bɛɛbɛ.

²⁷ À waa lasabu aŋa a jɔ̀ inɛm ŋa a gbɛjɛ irim nii na kuyɛ nŋa ŋa iyi à ya maa sisia njɛu bɛi bala nŋa ŋau à gbɛjɛm, nɔ à koo à waa too iwɛ̃ Baali.

²⁸ Si anyiɛ, ŋɔi Aɔ̃ Lafɛ̃ɛ í ni má, walii iyi í ce àla, ku ya ku sisia inɛ ŋa idei àlaɛ iyi í ce. Nɔ inɛ mɔ iyi ǹ ba ide ku fɔ, ku ya ku sisia inɛ ŋa idem dee dee. Amma i maà ya yɔgɛɛ fɔfɔ do ijui amaajɛ ŋa.

²⁹ Ntɔ ntɔ, idem í yɛi bɛi ina do bɛi mataaka iyi í ya lɛgɛ kuta. Amu Aɔ̃ Lafɛ̃ɛi ǹ fɔ bɛɛbɛ.

³⁰ Na ŋɔi í jɔ̀ ǹ kɔ̀ ide si gãmɛi walii ŋa iyi à ya maa so idem ŋa a maa fɔò ide nŋa.

³¹ Ntɔ ntɔ amu Aɔ̃ Lafɛ̃ɛ, bɛɛbɛi ǹ fɔ. Ǹ kɔ̀ ide si gãmɛi inɛ ŋa iyi à ya maa kpe ara nŋa waliim ŋau bɛ, domi ide ŋa iyi à ya maa fɔ, kãmaɛ kù waa naa hai bi titom, idei aŋa taka nŋai.

³² Ǹ kɔ̀ idei si gãmɛi woo ce walii ibo ŋau bɛ. Aŋa iyi à ya maa sisi idei àla ibo nŋa ŋa nɔ à dasi inɛm ŋa ku nyɔ do idei faau nŋa. Inɛ ŋau bɛ, kù jɛ amui ǹ bɛ ŋa wa, nɔ kù jɛ amui ǹ na ŋa wooda kãma, nɔ a kù jɛaa inɛm ŋau sobi kãma.

Idei Aɔ̃ Lafɛ̃ɛu asoi?

³³ Ŋɔi Aɔ̃ Lafɛ̃ɛ í sɔ̃ Zeremi í ni, bii walii gɔ, walakɔ woo wee gɔ, walakɔ inɛ mmu gɔ í beeɛ í ni, laabaau yoomai Aɔ̃ Lafɛ̃ɛ í fɔ. Aso yoomai í jilɛ nwa. Aa jɛ nŋai i ni, Aɔ̃ Lafɛ̃ɛ í ni, iŋɛi ì jɛ asou, nɔ an fũsi ŋɛ awɔi.

³⁴ Bii walii gɔ, walakɔ woo wee gɔ, walakɔ inɛ mmu gɔ wa fɔ idei ijuukpã iyi amu Aɔ̃ Lafɛ̃ɛ ǹ jilɛu, an naa si lafɛ̃ɛi do si inɛi kpasɛ̃ɛ ŋa.

³⁵ Ide iyi ì nɛ i maa bee njɛ ŋai í jɛ, ide yoomai Aɔ̃ Lafɛ̃ɛ í jɛ nwa, walakɔ bɛirei Aɔ̃ Lafɛ̃ɛ í ni.

³⁶ Amma i maà fɔ idei ijuukpãi Aɔ̃ Lafɛ̃ɛ ŋa, domi ijuukpãu á naai si ide ku fɔi inɛ akã akã fei. Amma bii à kɔ̀ à waa fɔ bɛɛbɛ, idei Ilaaɔ̃ nŋu iyi í wɛɛ, nŋu iyi í jɛ Aɔ̃ Lafɛ̃ɛi lele do ilɛui à waa bɛjɛ, nŋu iyi í jɛ Lafɛ̃ɛ nwa.

³⁷ Ide iyi ì nɛ i bee waliiui í jɛ, ide yoomai Aɔ̃ Lafɛ̃ɛ í jɛɛ, bɛirei í sɔ̃ɛ.

³⁸ Bii ì kɔ̀ ì waa fɔ idei ijuukpãi Aɔ̃ Lafɛ̃ɛ baa do iyi ǹ ganji ŋɛ ku fɔɛ fei, ide iyi ǹ wa n sɔ̃ ŋɛ wee.

³⁹ An fũsi ŋɛ awɔi mam mam, nɔ an nyɔ ŋɛi i jĩim ŋa, iŋɛ do ilu iyi ǹ mu nŋɛ, iŋɛ do bala nŋɛ ŋau.

⁴⁰ An dasi ŋɛ anyɔi, nɔ i baa i jɛ hai nɛ bɛɛrɛ ŋa hee do ajɔ fei. Nɔ a kaa gbɛjɛ ideɛ.