Zeremi 22 - Bibeli do fee

¹ Ŋɔi Aɔ̃ Lafɛ̃ɛ í sɔ̃ Zeremi má í ni, bɔ kpasɛ̃i ilaalui Zudaa nɔ i fɔ i ni,

² sotĩ i gbɔ ide iyi Aɔ̃ Lafɛ̃ɛ wa fɔ awɔ ilaalui Zudaa iyi ì waa buba si kitãi bommai Davidi, awɔ do woo ce icɛɛ ŋa do inɛɛ ŋa iyi à ya lɔ inɔ kabai bommaɛu.

³ Bɛi Aɔ̃ Lafɛ̃ɛ í fɔ wee. Í ni, i ya ce iyi í tɛ do iyi í jɛ dee dee ŋa. I ya faaba inɛ iyi inɛ laalɔ ŋa à waa takii ŋa. I maà ya gba mii ndii inɛ njoo gɔ, nɔ i maà ya gba mii ndii kɔyɔ do abo jaaɔ̃ ŋa. I maà ya taa inɛ ŋa gbugbã, nɔ i maà ya dikã njɛi hai nɛ taale ŋa si inyau ihɛ̃ ŋa.

⁴ Bii ì dasi idɔ i ceò ide ŋa iyi ǹ wa n sɔ̃ ŋɛu ihɛ̃ icɛ ŋa, aa ba ilaalu ŋa iyi aa buba si kitãi bommai Davidiu nɔ aa ya maa nɛ do acĩ walakɔ do sarɛti iyi acĩ ŋa à waa fa. Aa ya yɔkɔ a maa lɔ inɔ kabai bommau aŋa do akawe nŋa ŋau do zamaai ilɛu.

⁵ Amma bii ì kɔ̀ ku ceò ide ŋau ihɛ̃ icɛ ŋa, ntɔ ntɔ amu Aɔ̃ Lafɛ̃ɛ, ǹ wa n sɔ̃ ŋɛi, kpasɛ̃u ihɛ̃ á na ku kpɔò bomma.

⁶ Aɔ̃ Lafɛ̃ɛ í fɔ si gãmɛi kpasɛ̃i ilaalui Zudaa í ni, bi titom ì sĩai bɛi agboi Galaadi, walakɔ bɛi akãi antaii iri kutai Libãa. Amma ǹ wa n sɔ̃ɛi iyi aa baa i jɛ gbaa, ilu iyi kaa nɛ inɛ kãma má.

⁷ An jɔ̀ woo ce nfei inɛ ŋa a naa siɛi do jĩnɛi igũ nŋa ŋa. Aŋai aa da jĩi ndii sɛɛdi kusĩaɛ ŋau nɔ a jɔ̀ a cuku si ina.

⁸ Inɛi ilɛ nkpɔ nkpɔi á maa too kɔkɔi iluu bɛ, nɔ aa ya sɔ̃ njɛi a maa ni, na mii í jɔ̀ Aɔ̃ Lafɛ̃ɛ í cea ilu nla nlau ihɛ̃ bɛɛbɛ.

⁹ Nɔ aa jɛ nŋai a ni, si na iyi í jɔ̀ à fũsi akabuui Aɔ̃ Lafɛ̃ɛ iyi í jɛ Lafɛ̃ɛ nŋa awɔi, nɔ à ya koo a maa sɛɛbataa iwɛ̃ ŋa a maa tɔɔ ŋa.

Salumu atɛkɛsii Zoziasi

¹⁰ Iŋɛ inɛi Zudaa ŋa, i maà kpata na Zoziasi iyi í ku ŋa, i maà ce weewea na iriɛ ŋa. Amma i kpata na Salumu iyi wa nɛ ŋa, domi kaa baa má nɔ kaa yɛ ilɛ bii à búu má.

¹¹ Ŋɔi Aɔ̃ Lafɛ̃ɛ í ni má, Salumu ilaalui Zudaa iyi wa jɛ amai Zoziasi nɔ í fita hai si inyau ihɛ̃u, kaa baa má.

¹² Amma á kui si inya bii à mu à nɛòɛu, kaa yɛ ilɛu má.

Ide ŋa iyi à sɔ̃ Zoakimu

¹³ Inɔ kufɔi í jɛ titɛɛ Zoakimu, domi ì jɔ̀ à waa maaɛ kabai bomma, nɔ wee i ci ya jirima mii iyi í jɛ dee dee. Ì waa kɔ̃ɔsi kugbokai ileu, nɔ i kù waa jirima iyi í jɛ asaiyai inɛ ŋa. Ì jɔ̀ inɛ ŋa à waa ce icɛ si ngbɛ, i kù waa sã nŋa nkãma.

¹⁴ Ì fɔ ì waa ni, an jɔ̀ a maam ile kukpɛkɛ nla nlai, nɔ a jɔ̀ ilaawa ŋa iyi à wa si antaii kukpɛkɛu a cĩ, nɔ a dasi fɛrɛnti nla nla ŋa. Ì waa ni awɔ aa jɔ̀ a biiɛi do jĩi ndii sɛɛdi ŋa, nɔ a jɔsi ila nkpa.

¹⁵ Ì waa bi i nyisi iyi ì jɛ ilaalu, nɔ ì cica jĩi ndii sɛɛdi ku ba i nya ikãi? Baaɛ í ya jɛi wo nɔ ku maa mɔ bɛi inɛ ŋa iyi à gbe fei. Amma njɛ wa too asaiya do dee dee ku jɛ, nɔ mii fei wa nɛai dee dee.

¹⁶ Í ya ce kiitiɛi si dee dee ku jɛ si gãmɛi ilu are ŋa, do si gãmɛi inɛ ŋa iyi inɛ ŋa à waa taa gbugbã. Na nŋu, mii fei wa nɛa njɛi dee dee. Inɛ iyi wa ce bɛɛbɛ wa nyisi iyi nŋu í mà amu Aɔ̃ Lafɛ̃ɛi ntɔ ntɔ.

¹⁷ Amma awɔ, idei irii araɛi ì waa ce, nɔ ì waa kpa hai nɛ taale ŋa. Ì waa kpã inɛ ŋa ijui ntɔ ntɔ.

¹⁸ Na ŋɔi í jɔ̀ Aɔ̃ Lafɛ̃ɛ í fɔ si gãmɛi Zoakimu ilaalui Zudaa amai Zoziasi í ni, si ikuɛ, inɛ kãma kaa kpata akũɛ, nɔ inɛ kãma kaa maa ni, irei ì gbɔ inɔ kufɔ, kpaasim. Irei ì gbɔ inɔ kufɔ, wecĩm. Nɔ inɛ kãma kaa kpata ku maa ni, irei ì gbɔ inɔ kufɔ, lafɛ̃ɛm. Irei ì gbɔ inɔ kufɔ, ilaalu nwa.

¹⁹ Aa suui bɛi à ya si gbankɛlɛ bii í ku. Aa fa ikuɛui a koo a nyɔɔ angulei Zeruzalɛmu.

Anyɔ do bɛɛrɛ ku kuai Zeruzalɛmu

²⁰ Iŋɛ inɛi Zeruzalɛmu ŋa, i gũ antaii iri kutai Libãa ŋa nɔ i dɔ̃ anu ŋa. I jɔ̀ inɛ ŋa a gbɔ anu ku dɔ̃ nŋɛ si antaii iri kutai Basãa ŋa. I dɔ̃ anu hai lelei iri kutai Abarimu ŋa, domi inɛ ŋa iyi à nɛ kubi nŋɛ ŋau fei à kpa iri.

²¹ Ǹ ba ŋɛ ide ku fɔ hai waati iyi i kù nɛ bitandi kãma ŋa, amma ì ni iŋɛ i kaa gbɔ ŋa. Nɔ bɛɛbɛi isɛɛnɛ nŋɛ í yɛ hai waatii awaasũ nŋɛ, i ci ya jɛ ku gbɔ idem ŋa.

²² Inɛ ŋa iyi à jɛ inɛ ngbo nŋɛ ŋa fei, fufu á gbangaa ŋai ku nɛò ŋa, nɔ inɛ ŋa iyi à bi ŋɛ ŋau fei aa mu ŋa aru a nɛò ŋai. Do yaase bɛɛbɛ, aa kaye ŋɛi, nɔ i wa si anyɔ nla nla na laalɔ ku ce nŋɛ ŋau fei.

²³ Iŋɛ iyi ì wɛɛ wo sɛ̃ɛ si antaii Libãa ŋa, nɔ bi kuwa nŋɛ iyi ì ce, jĩi ndii sɛɛdi ŋai à jɛ sɔbeɛ, aa maa kakaa ŋai waati iyi ara kuro á na ku boe ŋɛ, nɔ i maa yaya bɛi inaabo iyi wa bi ku bí ŋa.

Konia amai Zoakimu

²⁴ Ŋɔi Aɔ̃ Lafɛ̃ɛ í ni, ǹ gbasi do irii amu takam iyi baa bii awɔ Konia amai Zoakimu ilaalui Zudaa ì jɛ lɛlɛawɔ si awɔ njɛm, an nya n nyɔɛ hai si awɔm.

²⁵ An soɛ n dasiɛ si awɔi inɛ ŋa iyi à waa dɛdɛ ku kpaɛ, inɛ ŋa iyi ì ya maa yaya si waju nŋa ŋau. An jɔ̀ i dasi awɔi Nebukanɛsaa ilaalui Babilɔni do si awɔi inɛi Kaladee ŋa.

²⁶ An soɛi awɔ do iyeɛ iyi í bíɛ n nyɔ ŋɛ ilɛ mmu iyi kù jɛ bii à bí ŋɛ, nɔ tengi bɛi aa ku ŋa.

²⁷ Aa na i bi i nyi wa si ilɛ nŋɛu ntɔ ntɔ ŋa, amma i kaa ba kpãaɛ ŋa.

²⁸ Waati bɛɛbɛ, inɛ ŋa aa beei a maa ni, Koniau bɛi mii dabu, walakɔ bɛi mii hai nɛ bɛɛrɛ iyi inɛ gɔ kù bi mái ba. Mà mii gɔi iyi inɛ gɔ kù waa saabu si má. Na mii í jɔ̀ à nyɔɔ nŋu do amaɛ ŋa fei. À so ŋai à sɔ ŋa si ilɛ gɔ iyi a kù mà.

²⁹ Ilɛm ilɛm ilɛm, sotĩ i gbɔ ide iyi Aɔ̃ Lafɛ̃ɛ wa fɔ.

³⁰ Aɔ̃ Lafɛ̃ɛ í ni, i kɔ irii inɛɛu ihɛ̃ bɛi inɛ iyi í kua amaɛ ŋa, bɛi inɛ iyi nkãma kù waa nɛa si kuwɛɛɛ. Tɔkuɛ kãma kaa ba ku buba ku jɛ ilaalu si bommai Davidi, nɔ kãma nŋa kaa ba gbugbã si ilɛi Zudaa.