Zeremi 21 - Bibeli do fee

Ide iyi à jɛa ilaalu Sedesiasi

¹ Aɔ̃ Lafɛ̃ɛ í ba Zeremi ide ku fɔ si gãmɛi ilaalu Sedesiasi. Ilaaluu í bɛ Pasehuu amai Malikia wa bi titɛɛ do Sofoni amai Maaseya woo weeu a naa a sɔ̃ɔ a ni,

² ce nwa kubee bi Aɔ̃ Lafɛ̃ɛ, domi Nebukanɛsaa ilaalui Babilɔni wa naa si wa igũ. Á yɔkɔ ku jɛ Aɔ̃ Lafɛ̃ɛ á ce baa akãi maamaakeɛ ŋau bɛ na iri nwa ku ba ku sinda inɛi Babilɔni ŋau bɛ hai bi tu wa.

³ Ŋɔi Zeremi í jɛ nŋa í ni a koo a sɔ̃ Sedesiasi a ni,

⁴ Aɔ̃ Lafɛ̃ɛi inɛi Izirɛli ŋau í ni, amu Aɔ̃ Lafɛ̃ɛ an gba jĩnɛi igũ ŋa iyi à wa si awɔ nŋɛ ŋa iyi aa ceò igũ do ilaalui Babilɔniu ŋa do inɛi Kaladee ŋa iyi à naa à wa do anyii bindi ŋau, nɔ n jɔ̀ a naa ikpa inɔ iluu.

⁵ Nɔ amu takam nii an ba ŋɛ ku ja nɔ n nyisi ŋɛ gbugbãm si idɔɔkɔ̃ nla nlam nɔu.

⁶ An cã inɛi ilu ŋaui hai amanɛ ŋa do mɛɛmu ŋa, nɔ aŋa fei aa kui na patapoo iyi á naa si ŋa.

⁷ Nɔ Aɔ̃ Lafɛ̃ɛ í ni má, Sedesiasi ilaalui Zudaau do akaweɛ ŋa do inɛi ilu ŋa iyi aa fita si patapoou, do inɛ ŋa iyi aa fita si igũu do ari iyi á ceu, an so ŋai n daa Nebukanɛsaa ilaalui Babilɔniu si awɔ. Ntɔ ntɔ an so ŋai n daa mbɛɛ nŋa ŋa iyi à waa dɛ ku kpa ŋau si awɔ. Nɔ Nebukanɛsaa á kpa ŋai, kaa ce araare nŋa, nɔ kaa jɔ̀ baa inɛ akã ku fita si. Kaa ce araarei inɛ kãma nŋa.

⁸ Nɔ Aɔ̃ Lafɛ̃ɛ í nyi í sɔ̃ Zeremi má í ni, iyi í jɛ ti zamaai iluu mɔ aa sɔ̃ ŋai i ni amu Aɔ̃ Lafɛ̃ɛ ǹ ni, i cɔ wee ǹ jilɛ kpãai kuwɛɛ do ti iku si waju nŋɛ.

⁹ Inɛ iyi í gbe si iluu, taakubai á kpaa, walakɔ ari walakɔ patapoo. Amma inɛ iyi í fita í koo í na inɛi Kaladee ŋa iyi à bu iluu koeu araɛ, lafɛ̃ɛi á fita si, nɔ iyi bɛi á jɛ amaniɛ iyi í ba.

¹⁰ Ǹ sinda wajum hai si iluu bɛi, nɔ laalɔi an ceaa, n kaa n ceaa jiida. An sooi n daa ilaalui Babilɔni si awɔ, nɔ á jooi.

Laabaau iyi í jɛ ti kpasɛ̃i ilaalu

¹¹ Aa sɔ̃ inɛi kpasɛ̃i ilaalui Zudaa ŋaui i ni, i sotĩ i gbɔ idei Aɔ̃ Lafɛ̃ɛ ŋa,

¹² iŋɛ inɛi kpasɛ̃i Davidi ŋa. Aɔ̃ Lafɛ̃ɛ í ni, i ya kiiti dee dee hai daadaakɔ ŋa, nɔ i ya faaba inɛ ŋa iyi inɛ laalɔ ŋa à waa takii ŋa, ku ba idɔɔkɔ̃m ku maà na ku dede bɛi ina iyi a kaa yɔkɔ a kpa na kuce laalɔ nŋɛ ŋa.

¹³ Ŋɔi i nyi i ni má, iŋɛ iyi ì wa si lɔɔmai iri kuta ku munga anuu, iŋɛi ǹ wa n fãa bɛ. Iŋɛ iyi ì ya maa ni, mbɛɛ yoomai á naa hee bi tu wa. Yooi á lɔ ku naa hee bi tu wa ihɛ̃.

¹⁴ Amu Aɔ̃ Lafɛ̃ɛi an naa si ŋɛ na kuce laalɔ nŋɛ ŋau. An dasi agbo nŋɛ ŋau ina nɔ ku ce asɔɔi inya ŋa iyi à kaako ŋɛu fei.