Zeremi 20 - Bibeli do fee

À dĩ Zeremi si jĩi

¹ Ŋɔi Pasehuu woo wee iyi wa jɛ inɛ ngbo woo cɔ kpasɛ̃i Aɔ̃ Lafɛ̃ɛu í gbɔ Zeremi wa fɔ ide do irii Aɔ̃ Lafɛ̃ɛ. Pasehuuu amai Imɛɛi.

² Ŋɔi í sambalaɛ nɔ í jɔ̀ à dũu si jĩi iyi í wa anu koofai Bɛnzamɛɛ hai do bii inɛ í ya too ku lɔò inɔ kpasɛ̃i Aɔ̃ Lafɛ̃ɛu.

³ Amma iyi iju í má, Pasehuu í jɔ̀ à fũ Zeremi wa hai si jĩi nɔu. Nɔ Zeremi í sɔ̃ɔ í ni, Aɔ̃ Lafɛ̃ɛ kaa kpeɛ Pasehuu má. Amma bɛbɛi, Magɔɔ-Misabibui á kpeɛ,

⁴ domi Aɔ̃ Lafɛ̃ɛ í ni, zigiidai an dasiɛ awɔ do kpaasiɛ ŋa fei. Taakubai mbɛɛ nŋa ŋai á ce ŋa nfe, nɔ awɔ takaɛ aa maa yɔɔ. An so inɛi Zudaa ŋa mɔ feii n daa ilaalui Babilɔni si awɔ, nɔ ku mu ŋa ku nɛò ŋa ilɛi Babilɔni koo kpa ŋa.

⁵ Hai kosĩai iluu fei do mii ŋa iyi à ce à ba fei, do mii jiida ŋa iyi à nɛ fei, do amanii ilaalui Zudaa ŋau fei, an so n daa mbɛɛ nŋa ŋa si awɔi. Aa kooi ku jɛ tu ŋa a nɛò ilɛi Babilɔni.

⁶ Nɔ awɔ takaɛ mɔ Pasehuu awɔ do inɛi kpasɛ̃ɛ ŋa fei aa mu ŋɛ arui a nɛò ŋɛ ilɛi Babilɔni, nɔ bɛi aa ku awɔ do kpaasiɛ ŋa iyi ì cea walii ibou fei.

Zeremi wa kpata si Aɔ̃ Lafɛ̃ɛ

⁷ Ŋɔi Zeremi í ni, Aɔ̃ Lafɛ̃ɛ, ì lɛlɛɛm nii nɔ amu takam mɔ ǹ jɛsi kulɛlɛɛu. Ì mum nii, nɔ ì kãmiam. Ajɔ fei inɛ ŋa à ya maa nyaanyim nii. Inɛ fei í ya maa yaakom nii.

⁸ Nɔ waati iyi ǹ wa n fɔ ide bɛbɛi fei, í gbe n ya n dɔ̃ anu n maa n fɔ idei gbugbã ku ta do ijuukpã iyi wa naa. Nɔ bii ǹ wa n fɔ idei awɔ Aɔ̃ Lafɛ̃ɛ, inɛ ŋa à ya maa yaakom nii nɔ a maa nyaanyim ajɔ fei.

⁹ Bii ǹ na ǹ ni n kaa n fɔ ideɛ má, walakɔ n kaa n fɔ ide do iriɛ má, waati bɛɛbɛ í ya yɛi bɛi ina wa jo hee si lɛlɛi idɔm. Nɔ ǹ ya n maa n ce kookaaii ku ba n yɔkɔ n kãmiaɛ, amma n ci ya n yɔkɔ.

¹⁰ Ntɔ ntɔ ǹ ya n maa n gbɔ ide sãmi ŋai hai bi inɛ nkpɔ nkpɔ si gãmɛm, nɔ zigiida í ya maa naai hai bii fei. Inɛ gɔ ŋa à waa ni, ka kooò ideɛ bi inɛ ngbo ŋa. Inɛi kɔkɔm ŋa à ya maa ce laakaim nii a maa cɔ mà an ce kurara gɔ. À ya maa cɔ kpãai aŋa a mum nii si kurara gɔ. Na ŋɔi í jɔ̀ à ya maa ni, aa ka muui nɔ ka sã gbese.

¹¹ Amma Aɔ̃ Lafɛ̃ɛ, ì nɛ gbugbã, nɔ awɔi ì waa jaam. Inɛ ŋa iyi à waa kpãm iju ŋaui aa koosɛ a cuku, nɔ a kaa jɛ igũ. Anyɔ á mu ŋai do iyi aa yɛ aŋa a kù jɛ igũ. Si anyɔi aa maa wa hee do ajɔ fei, nɔ inɛ kãma kaa gbɛjɛ ideɛ.

¹² Aɔ̃ Lafɛ̃ɛi lele do ilɛ, awɔi ì ya mà bii í jɛ inɛ í jɛ dee dee si wajuɛ. Awɔi í ya mà lasabuɛ ŋa iyi wa manji. Awɔi ǹ so idem ŋa fei ǹ daa si awɔ, nɔ ǹ wa n cɔ do yaase bɛi aa jaam bi mbɛɛm ŋa.

¹³ I kɔ̃a Aɔ̃ Lafɛ̃ɛ iri, nɔ i saabuɛ ŋa, domi í ya nya ilu are hai si awɔi inɛ laalɔ ŋa.

¹⁴ Ikpei í jɛ ti ajɔ si bii à bím. Inɛ kãma ku maà weea ajɔ si bii iyem í bím.

¹⁵ Nɔ ikpei í jɛ ti inɛ iyi í koo sɔ̃ baam laabaau jiidau ihɛ̃ í ni, à bíiɛ ama inɛmɔkɔ, nɔ baam nɔu í nɛ si inɔ didɔ̃.

¹⁶ Lafɛ̃ɛu ku yɛ bɛi ilu ŋa iyi Aɔ̃ Lafɛ̃ɛ í kɛkɛ nɔ kù nɛ si inɔ kufɔu. Daadaakɔ á ya gbɔ kukpata ŋai, nɔ zakai dasã má ku gbɔ anu ku dɔ̃i igũ ŋa.

¹⁷ Na mii í ce Ilaaɔ̃ kù jɔ̀ n kù ku gbakã waati iyi ǹ wa si inɔi iyem inɔu ku jɛ balɛm gbakã nɔ n maa n wa bɛ hee do ajɔ fei.

¹⁸ Na mii í jɔ̀ ǹ fita wa hai si inɔi iyem n na n yɛ wahala do ara kurou ihɛ̃, nɔ n kpa irii kuwɛɛm si anyɔ nla nla.