Zeremi 2 - Bibeli do fee

Inɛi Izirɛli ŋa à toa Aɔ̃ Lafɛ̃ɛ anyi

¹ Ŋɔi Aɔ̃ Lafɛ̃ɛ í sɔ̃m í ni,

² koo sɔ̃ inɛi Zeruzalɛmu ŋa i ni amu Aɔ̃ Lafɛ̃ɛ ǹ ni, awɔ Zeruzalɛmu, ǹ wa n ye gigii kubim iyi ì nɛ waati iyi ì wɛɛ mudɛ̃ɛ, do kubim iyi ì nɛ waati iyi ì waa jɛ abo titɔ̃. Waati bɛɛbɛi ì ya toom nii hee gbaa bii nkãma ci ya fitau.

³ Iŋɛ inɛi Izirɛli ŋa, ǹ cica ŋɛi i jɛ ti amu akã ŋa. Iŋɛi ì jɛ bɛi amaajɛ sintem ŋa iyi ǹ da. Inɛ ŋa iyi à lu ŋɛ fei à ba taalei, nɔ à ba wahala. Ide iyi amu Aɔ̃ Lafɛ̃ɛi ǹ fɔ mbɛ.

⁴ Iŋɛ tɔkui Zakɔbu ŋa, iŋɛ iyi ì jɛ nyaanzei inɛi Izirɛli ŋau fei, i sotĩ i gbɔ idei Aɔ̃ Lafɛ̃ɛ ŋa.

⁵ Aɔ̃ Lafɛ̃ɛ í ni, kuce hai jɛ dee dee yoomai bala nŋɛ ŋa à yɛ sim iyi í jɔ̀ à saam, nɔ à koo à waa tɔɔ iwɛ̃ nfe ŋa hee aŋa taka nŋa à baa à jɛ nfe.

⁶ A ci ya ni, iwoi Aɔ̃ Lafɛ̃ɛ iyi í nya wa hai ilɛi Ezibitiu í wa má, nŋu iyi í gbã wa si gbaa do si ilɛ ngbɛ ku nɛ isa nkpɔ nkpɔu, si ilɛ hai nɛ mandi, si ilɛ bii kuwɛɛ í gaabu, ilɛ bii inɛ kãma kù ce si ideu.

⁷ Nɔ ǹ jɔ̀ ì lɔ si ilɛ iyi í nɛ ikoi jĩi ŋa, ku ba i jɛ isoɛ ŋa iyi à dɔ̃ ku jɛ ŋau. Amma ì to wa ŋa, nɔ ì na ì riisi ilɛm nɔu ŋa. Nɔ ì so tubum nɔu ì coo mii laalɔ ŋa.

⁸ Woo wee ŋau a kù bee, iwoi Aɔ̃ Lafɛ̃ɛ í wa. Woo mà wooda ŋau a kù màm má. Woo gbã inɛm ŋau à dedeò ide ku kɔ̀ bi tom. Walii ŋau à ce walii nŋai do irii iwɛ̃ Baali. Nɔ à koo à waa too iwɛ̃ ŋa iyi a kaa yɔkɔ a ce nŋa nkãma.

⁹ Na ŋɔi í jɔ̀ an kiiti ŋɛ iŋɛ do tɔku nŋɛ ŋa má. Ide iyi amu Aɔ̃ Lafɛ̃ɛi ǹ fɔ mbɛ.

¹⁰ I bɔ si gũngũm dii Kitimu ŋau i cɔ ŋa. I bɛ inɛ ŋa ilɛi Kedaa nɔ i cɔ ilu ku ce ncɛɛ ŋa, bii í jɛ ngɔgɔ í jɔ njɛ do tu ŋɛ ihɛ̃.

¹¹ Dimi gɔ ci ya kpaasi iwɛ̃ɛ ŋa baa do iyi a kù jɛ bɛi Aɔ̃ Lafɛ̃ɛ fei. Amma iŋɛ zamaam ŋa, ì kpaasi amboe nŋɛ do mii iyi kaa sobi ŋɛ si nkãma.

¹² Iyi bɛ í to ku muɛ biti, awɔ lele. Í to i yaya nɔ i gbɛ.

¹³ Ntɔ ntɔ, hee tuuba minjii zamaam nɔu ihɛ̃ í ce kurara bɛbɛi. À kɔ̀sim, amu iyi ǹ jɛ isɔ̃i inyii kuwɛɛ, nɔ à koo à waa tua ara nŋa lɔgɔ ŋa iyi a kaa yɔkɔ a jilɛ inyi.

Inɔ kufɔ iyi Aɔ̃ Lafɛ̃ɛ ku kɔ̀si í ya nɛ

¹⁴ Inɛi Izirɛli ŋa, aru ŋai de, mà baa nŋa ŋa à nɔ à bí ŋai si kpasɛ̃ bii à waa jɛ aru. To, na mii í jɔ̀ inɛ mmu ŋa à ya maa ce asɔɔ nŋa bɛɛbɛ.

¹⁵ À waa dɔ̃ si ŋa anu bɛi muusu nla saasaabɔ ŋa. Nɔ à ce nfei ilɛu fei mam mam. À jo ilu nŋa ŋa nɔ inɛi ilu ŋau a kù wa bɛ má.

¹⁶ Nɔ mɔm baa inɛi Nɔfu ŋa do inɛi Tapanɛzi ŋa à ya naa a wa nŋa iri.

¹⁷ I kù yɛ iyi inɛ bɛ ŋa fei wa baɛi si na iyi í jɔ̀ ì fũsi Aɔ̃ Lafɛ̃ɛɛ awɔ si waati iyi í gbãɛ wa nɛòɛ si kpãa jiida?

¹⁸ To. Nsɛi, mii í ce ì waa bɔ ilɛi Ezibiti. Inyii Nilii ì waa bɔ ku mɔ? Mii í ce ì waa bɔ ilɛi Asiri. Inyii idoɛui ì waa bɔ ku mɔ?

¹⁹ Inɔ kukãɛi á jɔ̀ i ba ijuukpã, nɔ dee dee hai jɛɛi á jɔ̀ i yɛ bɔ̃nɛ. Do yaase bɛɛbɛ, aa mà iyi mii iyi ì ce í jɛ laalɔ nɔ í ro. Ì fũsi amu Aɔ̃ Lafɛ̃ɛɛ awɔ nɔ i kù mà bɛɛrɛm. Amu Aɔ̃ Lafɛ̃ɛi lele do ilɛ, amui ǹ fɔ bɛɛbɛ.

Inɛi Izirɛli ŋa à yɛi bɛi inaabo hai jɛ dee dee

²⁰ Aɔ̃ Lafɛ̃ɛ í ni, awɔ Izirɛli, hai ku kpɛi ì dedeò ide ku kɔ̀ sim. Ì fɛ anu akã nwau. Nɔ ì ni, n kù bi n maa n jɛ aru. Amma si antaii iri kuta do si abɛ jĩi tũtũ ŋa fei ì ya maa dabii si iwɛ̃ ŋai bɛi abo à ce sakara í ya ce do inɛmɔkɔ ŋa.

²¹ Amu ǹ lɔɛi wo bɛi jĩi ndii rezɛ̃ɛ ncɛɛ iyi ǹ wa n naanɛ jiida ku jɛɛ kãm kãm. Bɛirei ì ce i kpaasi dimi mmuɛ iyi kù ce ncɛɛ.

²² Baa bii í jɛ ì waa wɛ do acɛ iyi í jɛ jiida bɛbɛi, kuraraɛ á maa wɛɛi si wajum bɛi riisi. Amu Aɔ̃ Lafɛ̃ɛi ǹ fɔ bɛɛbɛ.

²³ Na mii í ce ì waa ni, n kù riisi aram, n kù tɔɔ iwɛ̃ Baali ŋa. Cɔ isɛɛnɛɛ si lɔɔmau. Jɔ̀ i mà mii iyi ì ce. Ì yɛi bɛi kpookpo zãu iyi í sɛi wa bibii kù mà iyi wa ce.

²⁴ Ì yɛi bɛi sɛnga zãu iyi í nɛ dɔ̃ɔnɛi gbaa. Si waatii ku gũɛ, kɔdɛɛɛ í ya dedei nɔ ku maa ko fufu. Inɛ kãma ci ya yɔkɔ ku gɛɛɛ. Kombo ŋa iyi à waa dɛdɛɛ fei a kù nɛ a gbɛɛji. À ya baai faala si waatii ku gũɛ.

²⁵ Ce laakai, Izirɛli. Aa na i gbe isɛ ngbɛ nɔ gbangɔlɔɛ ku gbɛ. Amma ì waa ni, kù nɛ i fɔ i maa sisi, domi ǹ bi iwɛ̃ ŋau, nɔ an too ŋai.

²⁶ Bɛi anyɔ í ya mu ile waati iyi à muu, bɛɛbɛi anyɔ á mu iŋɛ inɛi Izirɛli ŋau, iŋɛ do ilaalu nŋɛ ŋa do inɛ ngbo nŋɛ ŋa do woo wee nŋɛ ŋa do walii nŋɛ ŋa.

²⁷ Ì ya sɔ̃ jĩi i ni ŋa, awɔi ì jɛ baa nwa. Nɔ ì ya sɔ̃ kuta i ni ŋa, awɔi ì bím wa. Amui ì nɛ i cɔ ŋa wo, amma ì sinda ì toom anyi ŋa. Nɔ waati iyi ì wa si wahala, ì ya ni ŋai, dede i faaba wa.

²⁸ To, iwoi iwɛ̃ nŋɛ ŋa iyi ì ce ŋau à wa. I jɔ̀ a dede mɛɛ, bii í jɛ aa yɔkɔ a faaba ŋɛ si waatii wahala. Ntɔ ntɔ, iŋɛ inɛi Zudaa ŋa, iwɛ̃ nŋɛ ŋa do ilu nŋɛ ŋa à waa mungai.

²⁹ Amu Aɔ̃ Lafɛ̃ɛ ǹ ni, mii í ce ì waa yɛ taalem ŋa. Iŋɛ fei ì dedeò ide ku kɔ̀ ŋai si wajum.

³⁰ Ǹ kpã ama nŋɛ ŋa ijui si ngbɛ. A kù ce laakai si mii iyi í ba ŋau. Do taakuba nŋɛi ì kpaò walii nŋɛ ŋa, bɛi muusu nla kugaabu.

³¹ Iŋɛ inɛi nsɛi ŋa, i sotĩ i gbɔ idem nɔu do laakai ŋa. Amui ǹ baa ǹ yɛ bɛi ilɛ gbaa bi tu ŋɛ walakɔ bɛi ilɛi ilu kuku nla nla? Na mii í ce iŋɛ inɛm ŋa ì fɔ ì waa ni ŋa, à nɛ ara nwa. A kù bi ka nyi wa bi tɛɛ.

³² Mudɛ̃ɛ í ya gbɛjɛ jĩnɛ ku ce boodaɛ ŋa? Abo titɔ̃ í ya gbɛjɛ kungbã iyi á dĩ si gbankilii ibɔi abɔdɔ̃ɛ? Amma iŋɛ zamaam ŋa ì gbɛjɛ idem hai ajɔ nkpɔ nkpɔ iyi kù nɛ jia.

³³ Ntɔ ntɔ, ì ya mà bɛi aa ce bii ì nɛ kubii iwɛ̃ ŋa ku tɔɔ. Nɔ mɔm ì nɛ dɔ̃ɔnɛi daa sãmi ŋa ku ce ŋa.

³⁴ Iŋɛ woo ce laalɔ ŋa, njɛi ilu are hai nɛ taale ŋa í wa si ibɔ nŋɛ ŋa. A kù nɔ a kù ga gambo nŋɛ ŋa.

³⁵ Do nŋu ŋau bɛ fei ì waa ni ì jɛ hai nɛ taale ŋa, nɔ idɔɔkɔ̃i amu Ilaaɔ̃ kaa naa si ŋɛ má. Si bɛi ì waa ni i kù nɛ dulum ŋa, nsɛi an kiiti ŋɛ.

³⁶ Na mii í ce ì yaa ì mu kpãa mmu ŋa. Anyɔi á mu ŋɛ wa hai ilɛi Ezibiti bɛi í mu ŋɛ wa hai ilɛi Asiriu.

³⁷ Hai bɛi aa le awɔ si iri i fitaò wa ŋa domi amu Aɔ̃ Lafɛ̃ɛ ǹ kɔ̀si inɛ ŋa iyi ì waa kaaba ŋau bɛ. I kaa yɔkɔ i ce nkãma do sobi nŋa ŋa.