Zeremi 19 - Bibeli do fee

Caka iyi í lɛgɛ

¹ Ŋɔi Aɔ̃ Lafɛ̃ɛ í sɔ̃ Zeremi má í ni, koo i ra cakai amà bi woo ma caka. Bii ì waa koo, gbã inɛ ngboi ilu ŋau do inɛ ŋa iyi à jɛ inɛ ngbo ŋa si inɔi woo wee ŋau.

² Fita hai do ikpa lɔɔmai Bɛni-Hinɔmu iyi í wa ikpa andɛ koofai caka kuku ŋau. Tengi bɛi aa dɔ̃ anu i sɔ̃ ŋa ide ŋa iyi an sɔ̃ɛu.

³ Aa sɔ̃ ŋai i ni, i sotĩ i gbɔ idei Aɔ̃ Lafɛ̃ɛ iŋɛ ilaalui Zudaa ŋa do iŋɛ inɛi Zeruzalɛmu ŋa. Bɛi Aɔ̃ Lafɛ̃ɛi lele do ilɛ, nŋu iyi í jɛ Lafɛ̃ɛi inɛi Izirɛli ŋa í ni wee. Í ni, an jɔ̀ wahala ku naa si inyau ihɛ̃. Inɛ ŋa iyi aa gbɔ ibai kunaaɛu wa fei, aa gbɔɔi bɛi ibai kulai ijĩ.

⁴ Ntɔ ntɔ, inɛi Zudaa ŋau à fũsim awɔi. À jɔ̀ inɛ ŋa a kù mà inyau ihɛ̃. Iwɛ̃ ŋai à ya maa joa tuae ku dɔ̃ inunu ŋa. Iwɛ̃ ŋau aŋa taka nŋa a kù mà ŋa, nɔ bala nŋa ŋa a kù mà ŋa, nɔ ilaalui Zudaa ŋau mɔ a kù mà ŋa. Nɔ à jɔ̀ inyau í kɔ̃i do njɛi inɛ ŋa iyi a kù nɛ taale kãma.

⁵ À maa iwɛ̃ iyi à ya kpe Baali bi kuwee si geete ŋa ku ba a joaa ama nŋa ŋa si ina fei sãa sãa. Kuce iyi bɛ, kù jɛ amui ǹ na woodaɛ, nɔ kù jɛ amui ǹ fɔ ideɛ, kù nɔ kù naa baa si lasabum mɔ wo.

⁶ Ŋɔi Aɔ̃ Lafɛ̃ɛ í nyi í ni má, na nŋu, ajɔ ŋa wa naa iyi a kaa kpe inyau ihɛ̃ Tofɛti walakɔ lɔɔmai Bɛni-Hinɔmu má. Amma aa kpooi lɔɔmai inɛ ku kpa.

⁷ Si inyau bɛi an kpa irii kucei inɛi Zudaa do ti inɛi Zeruzalɛmu ŋau. An jɔ̀ a dasi awɔi mbɛɛ nŋa ŋai do si awɔi woo yɛ taale nŋa ŋa, nɔ a kpa ŋa do taakuba. Yɛi ŋa do mɛɛmui sako ŋai an jɔ̀ a jɛ iku nŋa ŋa.

⁸ An jɔ̀ iluu ku baa ku jɛ inyai zigiidai nɔ ku jɛ dɔ̃anyi. Inɛ ŋa iyi aa maa lɔ kɔkɔɛ fei aa ya bitii nɔ a maa fã foo bii à yɛ asɔɔ ŋa iyi í ce si iluu.

⁹ Mbɛɛ hai nɛ araare nŋa ŋau, aa bu ilu nŋau koe nɔ a jɔ̀ ku baa ku jɛ inyai inɔ kufɔ nla nla, nɔ si dimii wahala iyi aa wa siu, aa na a maa ŋɔ iŋai ama nŋa ŋai, nɔ a maa ŋɔ njɛ aŋa duusɔ̃ɔ.

¹⁰ Nɔ Aɔ̃ Lafɛ̃ɛ í sɔ̃m í ni, si anyii nŋu, aa lɛgɛ cakaui si wajui inɛ ŋa iyi iŋɛò ŋa ì koou,

¹¹ nɔ i sɔ̃ ŋa i ni, Aɔ̃ Lafɛ̃ɛi lele do ilɛ í ni, do yaase bɛɛbɛi an lɛgɛ inɛ ŋau ihɛ̃ do iluu ihɛ̃ bɛi à ya lɛgɛ cakai amà, nɔ a kaa yɔkɔ a teeseɛ má. Nɔ Tofɛti bɛi aa si iku ŋau, domi inya kaa wɛɛ bii gɔ má.

¹² Ŋɔi Aɔ̃ Lafɛ̃ɛ í ni, bɛɛbɛi an cea inyau do inɛi iluɛ ŋa. An cea iluui bɛi ǹ cea Tofɛti.

¹³ Kpasɛ̃i Zeruzalɛmu ŋa do kpasɛ̃i ilaalui Zudaa ŋa aa baa a jɛ inya riisi bɛi inyai Tofɛti. Ntɔ ntɔ mii iyi á ba inɛ ŋa iyi à wa si antaii lelei ile ŋa tengi bii inɛ ŋa à ya jo tuae ku dɔ̃ inunu na irii leleaɔ̃ ŋa, do bii à ya cea iwɛ̃ ŋa kuweei atɛ̃ vɛ̃ɛ ŋau mbɛ.

¹⁴ Waati iyi Zeremi í sinda í baa hai Tofɛti bii Aɔ̃ Lafɛ̃ɛ í bɔɔ koo fɔ ide do irii nŋuu, ŋɔi í naa í leekĩ si bantumai kpasɛ̃i Aɔ̃ Lafɛ̃ɛu, nɔ í sɔ̃ inɛ ŋa iyi à wa bɛ ŋau fei í ni,

¹⁵ Aɔ̃ Lafɛ̃ɛi lele do ilɛ, nŋu iyi í jɛ Aɔ̃ Lafɛ̃ɛi inɛi Izirɛli ŋa í ni, amu Aɔ̃ Lafɛ̃ɛ an jɔ̀ wahala ku naa si iluu ihɛ̃ hee do si ilu ŋa iyi à wa kɔkɔɛ ŋau fei. Wahala ŋa iyi ǹ tako ǹ fɔ ideɛ si gãmɛu fei, á baai domi inɛi ilu ŋau à lele idɔ nŋa à kɔ̀ ku gbɔ idem ŋa.