Zeremi 18 - Bibeli do fee

Zeremi í bɔ bi woo ma caka

¹ Ide ŋa iyi Aɔ̃ Lafɛ̃ɛ í sɔ̃ amu Zeremi wee. Í ni,

² dede i bɔ kpasɛ̃i woo ma caka, tengi bɛi an jɔ̀ i gbɔ idem ŋa iyi ǹ nɛ ku sɔ̃ɛ.

³ Ŋɔi ǹ dede ǹ bɔ kpasɛ̃i woo ma cakau, nɔ ǹ koo ǹ ba wee wa ce icɛi caka gɔ.

⁴ Ŋɔi caka iyi wa ceu í haata. Bii í jɛ caka iyi woo mau wa ce í haata bɛi amà í ya na ku ce si awɔi woo ma caka, í ya teese ku ma caka mmuɛi bɛi í sĩaa si.

⁵ Ŋɔi Aɔ̃ Lafɛ̃ɛ í nyi í bam ide ku fɔ má í ni,

⁶ iŋɛ inɛi Izirɛli ŋa, n kaa n yɔkɔ n ce bɛɛbɛ si gãmɛ nŋɛ bɛi woo ma cakau bɛ? Nɔ Aɔ̃ Lafɛ̃ɛ í nyi í ni má, i cɔ ŋa, bɛi amà í yɛ si awɔi woo ma cakau bɛ, bɛɛbɛ mɔi iŋɛ mɔ ì yɛ si awɔm ŋa iŋɛ inɛi Izirɛli ŋa.

⁷ Waati gɔ ŋa ǹ ya n fɔ idei si gãmɛi dimi gɔ, walakɔ si gãmɛi bomma gɔ. Ǹ ya n fɔ idei ku tu do idei ku lɛgɛ do idei ku kpa.

⁸ Amma bii í jɛ dimi iyi ǹ wa n fɔ ideɛu ihɛ̃ í sinda í jɔ̀ laalɔ ku ceɛ, n kaa n ceaa laalɔ iyi ǹ tako ǹ dasi idɔ n ceaau má.

⁹ Nɔ si afe gɔ ŋa, ǹ ya n fɔ ide si gãmɛi dimi gɔ, walakɔ si gãmɛi bomma gɔ. Ǹ fɔ idei ku ma do idei ku lɔ.

¹⁰ Amma bii inɛi ilɛ ŋau à waa ce mii laalɔ si wajum, nɔ a kù waa gbɔ idem, jiida iyi ǹ dasi idɔ n ce nŋau, n kaa n coo má.

¹¹ Ŋɔi Aɔ̃ Lafɛ̃ɛ í ni má, ba inɛi Zudaa ŋa do inɛi Zeruzalɛmu ŋa ide ku fɔ. Sɔ̃ ŋa i ni amu Aɔ̃ Lafɛ̃ɛ ǹ ni ǹ nɛ lasabu iyi ǹ ce si gãmɛ nŋa. Sɔɔlui wahalai ǹ ce nŋa. Na nŋu, a fũsi kpãa sãmi nŋa ŋau awɔ a sinda wa. A teese kpãa nŋa ŋa do kuce nŋa ŋau.

¹² Amma aa jɛ a ni kpãa ku cɔ gɔ kù wɛɛ má, domi lasabu nŋai aa too si. Aŋa fei idɔ kulele nŋau bɛi aa maa nɛ si.

Inɛi Izirɛli ŋa à gbɛjɛ Aɔ̃ Lafɛ̃ɛ nŋa

¹³ Na nŋu, Aɔ̃ Lafɛ̃ɛ í ni, i bee inɛi ilɛ mmu ŋa i gbɔ ŋa. Yooi í gbɔ dimii mii bɛɛbɛ. Mii iyi inɛi Izirɛli ŋa à ce, í sãmi hee í caa.

¹⁴ Iri kutai Libãa ŋa iyi à jɛ fũfũ, ila nŋa á yɔkɔ ku kpaasi? Inyi tũtũ iyi wa naa hai si acãi inyi ŋau wa, á yɔkɔ ku gbɛ? Aawo.

¹⁵ To, inɛm ŋa wee à gbɛjɛm. À koo à waa cea iwɛ̃ ŋa kuwee. Iwɛ̃ ŋaui à waa dasi ŋa isɛ ku ko si kpãa nŋa ŋa iyi à mà hai tako wo, nɔ à koo à waa nyaa ara nŋa kpãa titɔ̃ ŋa.

¹⁶ À jɔ̀ ilɛ nŋau í baa í jɛ inyai zigiida, nɔ í jɛ dɔ̃anyi hee do ajɔ fei. Inɛ ŋa iyi à too do bɛ à waa lɔ fei, à ya bitii nɔ a maa gbugbã iri.

¹⁷ Na nŋu, an fangaa ŋai si wajui mbɛɛ nŋa ŋa bɛi fufui nunui daakɔ í ya dede ilùlù. Si ajɔi wahala, an sinda n to nŋa anyii nɔ a kaa yɛ wajum.

Zamba iyi à dĩaa Zeremi do kutɔɔi waliiu

¹⁸ Ŋɔi inɛ gɔ ŋa à ni, ka koo, waatii ihɛ̃ bɛ iyi aa ka ba kpãa ka dĩaò Zeremi zamba, domi a kaa ka kua woo wee ŋa iyi aa maa kɔ wa si cio, do ilu laakai ŋa iyi aa maa na wa ikɔ jiida, do walii ŋa iyi aa maa sɔ̃ wa idei Aɔ̃ Lafɛ̃ɛ. I naa wa ŋa kaa nya fũnɛɛ do idei gɛlɛ nwa, nɔ ka maà desi baa ide ku fɔɛ ŋa itĩ.

¹⁹ Aɔ̃ Lafɛ̃ɛ, jɔ̀ laakaiɛ ku wɛɛ do amu. Gbɔ bɛi mbɛɛm ŋa à waa dɔ̃.

²⁰ Bii à cea inɛ jiida, laalɔi í nɛ ku sã? Ǹ wa n fɔ bɛɛbɛi si na iyi í jɔ̀ inɛ ŋau à tu isa ku ba n dasi bɛ a kpam. Ye gigi iyi amui ǹ naa ǹ leekĩ si wajuɛ nɔ ǹ fɔ ide na iri nŋa nɔ ì sinda idɔɔkɔ̃ɛ hai si ŋa.

²¹ Na nŋu, jɔ̀ ari ku naa si ama nŋa ŋa, nɔ i jɔ̀ a kpa ŋa do taakuba. Jɔ̀ abo nŋa ŋau a kua ama nŋa ŋa do mɔkɔ nŋa ŋa, nɔ a baa a jɛ jaaɔ̃ ŋa. Jɔ̀ inɛmɔkɔ ŋa a ku si patapoo, nɔ awaasũ ŋa mɔ a ku si igũ.

²² Jɔ̀ a maa gbɔ anu ku dɔ̃ ŋa si inɔ kpasɛ̃ nŋa ŋa, waati iyi aa jɔ̀ inɛ laalɔ ŋa a faata si ŋa wa anu akã. Ce nŋa bɛɛbɛ, si na iyi í jɔ̀ à tu isa ku ba n dasi, nɔ à leem cɛkũm ku ba a mum.

²³ Nɔ awɔ Aɔ̃ Lafɛ̃ɛ, ì mà sɔɔlui zamba nŋa iyi à dĩ ku ba a kpam. Na nŋu, maà ce nŋa suurui dulum du ŋa. Maà kpa dulum du ŋa hai si wajuɛ. Jɔ̀ a cuku si wajuɛ. Jɔ̀ idɔɔkɔ̃ɛ ku naa si ŋa.