Zeremi 17 - Bibeli do fee

Aɔ̃ Lafɛ̃ɛ í fitaò kurarai inɛi Zudaa ŋa gbugbãa

¹ À kɔ dulum dii inɛi Zudaa ŋai do isɔ ku nɛ gbugbã gɔ, walakɔ do kuta ku nɛ gbugbã gɔ. À kɔɔi si idɔ nŋa do si gontai bi ku ce kuwee nŋa ŋau.

² Do yaase bɛɛbɛ, ama nŋa ŋa aa maa ye gigii bi kuwee nŋa ŋaui, do jĩi iyi à gũa iwɛ̃ Asera nŋa ŋau, do jĩi tũtũi iri kuta ŋau.

³ Iŋɛ inɛi Zudaa ŋa, iŋɛ iyi ì ya gũ antaii iri kuta ŋa si inɔ sako ŋa, an jɔ̀ inɛ ŋa a naa a ko mii jiida nŋɛ ŋa, do amani nŋɛ ŋa fei nɔ a lɛgɛ bi ku ce kuwee nŋɛ ŋa fei. Mii ŋau bɛ aa ba ŋɛi na dulum ŋa iyi ì ce ŋa si ilɛu fei.

⁴ Aa sindoom tubum iyi amu takam ǹ na ŋɛu ŋai. An jɔ̀ i baa i jɛ arui mbɛɛ nŋɛ ŋai si ilɛ gɔ iyi i kù mà ŋa, domi ì ma inai idɔɔkɔ̃m ŋa mbɛ, nɔ á maa joi hee do ajɔ fei.

Laakai ku sũ ibo do laakai ku sũ ntɔ

⁵ Ide iyi Aɔ̃ Lafɛ̃ɛ í fɔ wee. Í ni, ikpei í jɛ ti inɛ iyi idɔɛ í jĩò amu Aɔ̃ Lafɛ̃ɛ í koo í dasi amanɛ naanɛ, nɔ í so amanɛ ku jɛ gbugbãɛ.

⁶ Lafɛ̃ɛ á yɛi bɛi ama jĩi tũtũ ŋa iyi à dede si gbaa. Lafɛ̃ɛ kaa ba ku yɛ ididɔ̃ kãma iyi wa naa. Á maa wai si inya gbãai gbaau, inya ku da imu bii inɛ kãma kù wau.

⁷ Amma kuweei í jɛ ti inɛ iyi í dasi amu Aɔ̃ Lafɛ̃ɛ naanɛ, nɔ kaabaɛ fei í wa si amu Aɔ̃ Lafɛ̃ɛ.

⁸ Lafɛ̃ɛ á yɛi bɛi jĩi iyi à lɔ kɔkɔi inyi, nɔ icãɛ ŋa à nɛ ikpa bi acãi inyiu. Baa bii inya gbãa wa ce, inya gbãau kaa ceaa nkãma, nɔ wuaɛ á ya maa tũi waati kãma fei. Baa bii agbɛ í mu si adɔ̃u, kaa ya wɛɛò zigiida, nɔ waati kãma fei á ya soi.

⁹ Nkãma kù wɛɛ iyi í nɛ zamba bɛi idɔi amanɛ, nɔ inɛ kãma kaa yɔkɔ ku jɔ̀ ku ba iri. Nɔ bɛɛbɛ mɔi inɛ kãma kaa yɔkɔ ku mà idɔi amanɛ.

¹⁰ Amu Aɔ̃ Lafɛ̃ɛ, amui ǹ ya n wusɛ idɔi amanɛ n yɛ hee lɛlɛɛ. Do yaase bɛɛbɛi ǹ ya n sãaò inɛ fei si bɛi isɛɛnɛɛ í yɛ do si bɛi kookoosuɛ ŋa í to.

¹¹ Inɛ iyi í ba amani ŋa do kpãa iyi kù jɛ dee dee, í yɛi bɛi kpau iyi wa wɔɔba si njɛ ŋa iyi kù jɛ titɛɛ. Amaniɛu í ya na ku nɛ ku jɔ̀ɔi waati iyi kuwɛɛɛ í to anini, nɔ si waatii iri ku kpai kuwɛɛɛu, í ya baa ku jɛ nnyɛii.

Aɔ̃ Lafɛ̃ɛ nŋu akãi í jɛ icui kuwɛɛ

¹² Kitãi bomma gɔ í wɛɛ í nɛ yiiko ntɔ ntɔ. Kitãu í wa antaii mii feii hai sinte. Tengi bɛi kpasɛ̃i Aɔ̃ Lafɛ̃ɛ nwau í wa.

¹³ Aɔ̃ Lafɛ̃ɛ, awɔi ì jɛ kpãa ku cɔi Izirɛli. Inɛ ŋa iyi à fũsiɛ awɔ fei, si anyɔi aa wa. Inɛ ŋa iyi à sɛkɛɛ à jɔ̀ɛ fei, aa yɛi bɛi inɛ ŋa iyi à kɔ iri nŋa si ilulu, domi awɔ Aɔ̃ Lafɛ̃ɛ iyi ì jɛ isɔ̃i inyii kuwɛɛi à fũsi awɔ bɛ.

Kutɔɔi Zeremi

¹⁴ Aɔ̃ Lafɛ̃ɛ, jɔ̀ n ba iri, nɔ n ba iri. Faabam, nɔ n ba faaba, domi saabum fei, awɔi.

¹⁵ Inɛ ŋa wee à ya fɔ a maa ni, hee iwoi idei Aɔ̃ Lafɛ̃ɛu í wa. To, ku ce icɛɛ.

¹⁶ Amu n kù kɔ̀ n jɛ amaadegbe si fitiɛ. Awɔ takaɛ ì mà iyi amu si ǹ tɔɔ ajɔi wahalau ihɛ̃. Ide iyi wa fita hai si gɛlɛm fei, í jɛ do kumà siɛ.

¹⁷ Na nŋu, maà jɔ̀ zigim ku da, awɔ iyi ì jɛ bi ku manjim si ajɔi wahala.

¹⁸ Inɛ ŋa iyi à jɛ woo kpãm iju ŋai a nɛ a yɛ anyɔ, nɔ amu anyɔ ku maà mum. Aŋai a nɛ a maa yaya, nɔ amu n maà n yaya. Jɔ̀ ajɔi wahala ku naa si ŋa. Jɔ̀ wahala tuuba minji ku naa si ŋa.

Ajɔi kusĩmi ku jirima

¹⁹ Ŋɔi Aɔ̃ Lafɛ̃ɛ í bam ide ku fɔ má í ni, koo i leekĩ anu koofai inɛi ilu ŋau hai bii ilaalu ŋau à ya lɔò nɔ a fitaò hee do si anu koofai Zeruzalɛmu ŋau fei,

²⁰ nɔ i sɔ̃ ŋa i ni, i sotĩ i gbɔ idei Aɔ̃ Lafɛ̃ɛ iŋɛ ilaalui Zudaa do inɛi Zudaa ŋa fei hee ku koo si inɛi Zeruzalɛmu ŋa iyi à ya lɔò hai andɛ koofa ŋau fei.

²¹ Aɔ̃ Lafɛ̃ɛ í ni, i ce laakaii ara nŋɛ. I maà ya so aso si ajɔi kusĩmi ŋa, nɔ i maà ya naaò wa baa si anu koofai Zeruzalɛmu ŋau ŋa.

²² I maà ya fitaò aso ŋa hai inɔ kpasɛ̃ nŋɛ ŋa si ajɔi kusĩmi, nɔ i maà ya ce icɛ kãma ŋa. Amma i nya ajɔi kusĩmiu ikã ŋa bɛi ǹ tako ǹ jilɛa bala nŋɛ ŋau wo.

²³ Ntɔ ntɔ, bala nŋɛ ŋau a kù gbɔ idem, a kù desi itĩ, à lele idɔ nŋai ku ba a maà gbɔ nɔ a maà ba ikɔ.

²⁴ Amma Aɔ̃ Lafɛ̃ɛ í sɔ̃ ŋa í ni, iŋɛ, i sotĩ i gbɔ idem ku ce ncɛɛ ŋa. Si ajɔi kusĩmi, i maà ya so aso kãma i lɔò wa inɔ iluu ŋa. I nya ajɔu bɛ ikã ŋa ku jɛ titom, nɔ i maà ya ce icɛ kãma ajɔ nŋu bɛ ŋa.

²⁵ Bii ì waa ce bɛɛbɛ ŋa, ilaalu ŋa iyi aa buba si kitãi bommai Davidi, iyi à waa ce isɛɛnɛ do acĩ ŋa walakɔ do sarɛti iyi acĩ ŋa à waa fa, do akawe nŋa ŋa, do inɛi Zudaa ŋa, do inɛi Zeruzalɛmu ŋa, aŋa fei aa yɔkɔ a maa ce wũaa nŋa ŋa si inɔ iluu, nɔ inɛ ŋa aa maa wa si iluui hee do ajɔ fei.

²⁶ Nɔ do yaase bɛɛbɛ má, inɛ ŋa aa ya naa a ce kuwee ŋa iyi à ya jo si ina fei sãa sãa, do kuwee mmuɛ ŋa má, do amua nŋa ŋa, do kuweei tuae iyi à ya jo si inau, do ti anu akã nŋa ŋau si inɔ kpasɛ̃i amu Aɔ̃ Lafɛ̃ɛ. Inɛ ŋa aa ya naai hai si ilui Zudaa ŋa, do hai ilu ŋa iyi à wa kɔkɔi Zeruzalɛmu, do hai si ilɛi Bɛnzamɛɛ, do ilu ŋa iyi à wa ilɛ ilɛ ŋau, do iyi à wa si iri kuta ŋau do iyi à wa ilɛi Negɛbu.

²⁷ Amma bii ì kɔ̀ ku gbɔ idem ŋa, nɔ ì ce atafii si ajɔi kusĩmiu ku nya ikã ku jɛ titom ŋa, bii ì ya so aso ŋa i maa naaò wa Zeruzalɛmu si ajɔi kusĩmiu ŋa, an dasi gamboi anu koofai iluu inai. Inau á jo kpasɛ̃ kusĩa ŋau, nɔ inau kaa ku má ajɔ kãma.