Zeremi 16 - Bibeli do fee

Ilaaɔ̃ í ni Zeremi ku wɛɛ nŋu akã

¹ Aɔ̃ Lafɛ̃ɛ í bam ide ku fɔ í ni,

² maà so abo, hee i nɛ ama inɛmɔkɔ walakɔ ama inaabo ŋa si inyau ihɛ̃,

³ domi bɛi amu Aɔ̃ Lafɛ̃ɛ ǹ fɔ si gãmɛi ama inɛmɔkɔ do ama inaabo ŋa iyi aa bí si inyau ihɛ̃, do si gãmɛi iyeò baa nŋa ŋa iyi aa bí ŋa si ilɛu ihɛ̃ wee.

⁴ Bɔ̃ɔ á kpa ŋai. A kaa si ŋa, nɔ a kaa ce akũ nŋa. Aŋai aa baa a jɛ bɛi taasii ilɛ, nɔ aa kui si igũ walakɔ ari ku kpa ŋa. Nɔ mɛɛmui sako ŋa do yɛi ŋai aa jɛ iku nŋa.

⁵ Aɔ̃ Lafɛ̃ɛ í nyi í ni má, maà lɔ kpasɛ̃ bii iku í ce, nɔ i maà bɔ bi ku ce akũ ŋa, nɔ i maà wɛɛò inɔ kufɔ na iri nŋa ŋa, domi ǹ nya laakai ku sũm hai bi inɛ ŋau bɛ. Nɔ jiida ku jɛm do kubim kù wa si ŋa má. Amu Aɔ̃ Lafɛ̃ɛi ǹ fɔ bɛɛbɛ.

⁶ Si ilɛu bɛ, ilu fia ŋa do ilu are ŋa aa maa kui nɔ inɛ kãma kaa si ŋa. Inɛ kãma kaa ce akũ nŋa, inɛ kãma kaa bu araɛ nɔ inɛ kãma kaa wa iriɛ na iri nŋa.

⁷ Na iri nŋa, inɛ kãma kaa ce sɔnda ku ba ku tũò idɔi inɛ iyi í wɛɛò ara kuroi inɛ gɔ iyi í ku. Nɔ na iri nŋa, inɛ kãma kaa naaò kɔɔfu gɔ wa iyi inɛ ŋa aa mɔ a tũò idɔ na baa gɔ, walakɔ na iye gɔ iyi kù wɛɛ.

⁸ Maà lɔ kpasɛ̃ gɔ bii à waa jɛ jingau i koo i buba bɛ i jɛ nɔ i mɔ do aŋa má.

⁹ Ntɔ ntɔ amu Aɔ̃ Lafɛ̃ɛi lele do ilɛ, amu Lafɛ̃ɛi inɛi Izirɛli ŋa, ide iyi ǹ fɔ wee. An leekĩ ibai jingau ŋa, do anu ku dɔ̃i inɔ didɔ̃ ŋa, do iri ku kɔ̃i mudɛ̃ɛ do awaasũ ŋa iyi à so njɛ. Nɔ á cei si waati nŋɛ i maa yɔɔ ŋa.

¹⁰ Waati iyi aa sɔ̃ inɛ ŋau ide ŋau bɛ, á yɔkɔ ku jɛ aa beeɛ a ni, na mii í ce Aɔ̃ Lafɛ̃ɛ í jilɛ wahala nla nlau bɛ fei na iri nwa. Kurara yoomai à ce. Yoomai í jɛ dulum iyi à ce bi Aɔ̃ Lafɛ̃ɛ nwa.

¹¹ Waati bɛɛbɛ, aa jɛ nŋai i ni, Aɔ̃ Lafɛ̃ɛ í ni, bala nŋɛ ŋai à fũsim awɔ à koo à waa tɔɔ iwɛ̃ ŋa nɔ à waa sɛɛbata nŋa. À sinda à toom anyii nɔ a kù ceò woodam ŋa icɛ.

¹² Nɔ iŋɛ, ì nyi ì ce laalɔ má ŋa í re bala nŋɛ ŋau. Iŋɛ fei lasabu sãmii idɔ nŋɛ ŋai ì waa too si nɔ i kù waa gbɔ idem ŋa.

¹³ Na nŋu, an lele ŋɛi hai si ilɛu ihɛ̃ i nɛ ilɛ mmu bii i kù mà ŋa, nɔ bala nŋɛ ŋau mɔ a kù màa. Ikpa bɛ, dasã do idũ fei, iwɛ̃ ŋai aa ya maa tɔɔ ŋa, domi amu n kaa n ce araarei kãma nŋɛ má.

Kubaa nlau

¹⁴ Aɔ̃ Lafɛ̃ɛ í ni, ajɔ wa naa iyi inɛ ŋa a kaa ya ce kugbasi má a ni, do irii Aɔ̃ Lafɛ̃ɛ nŋu iyi í wɛɛ, nŋu iyi í nya inɛi Izirɛli ŋa wa hai ilɛi Ezibiti.

¹⁵ Amma aa ya ce kugbasii a ni, do irii Aɔ̃ Lafɛ̃ɛ nŋu iyi í wɛɛ, nŋu iyi í nya inɛi Izirɛli ŋa wa hai ilɛi awɔ njɛi kpãai inunu do hai si ilɛ mmu ŋa fei bii à koo à wa wo, waati iyi í lele ŋau. Aɔ̃ Lafɛ̃ɛu í ni, an baaò ŋa wa si ilɛ nŋa tengi bii ǹ tako ǹ muaa bala nŋa ŋau.

Aa mu inɛ laalɔ ŋau fei

¹⁶ Aɔ̃ Lafɛ̃ɛ í ni, an bɛ inɛ ŋai nkpɔ nkpɔ a koo a mu ŋa wa bɛi sɔɔkɔ ŋa à ya mu cɛ̃ɛ ŋa, nɔ an bɛ inɛ ŋai nkpɔ nkpɔ má a koo a ce adɛ nŋa wa si geete ŋa do si iri kuta ŋa fei, hee do si isai kuta ŋa bɛi tobi ŋa à ya ce.

¹⁷ Ntɔ ntɔ ijum wa kãsi kpãa nŋa ŋa iyi à waa too fei. Kãma nŋa kù waa manji si wajum, nɔ kurara nŋa ŋa mɔ kù waa manji si wajum.

¹⁸ An jɔ̀ a ba kusãi kurara nŋai do ti dulum du ŋa ikɔ minji, domi à dasi ilɛm nɔu riisi, nɔ à jɔ̀ tubum nɔu í kɔ̃ do iwɛ̃ nŋa ŋa iyi ǹ céu.

Inɛ fei í mà Aɔ̃ Lafɛ̃ɛ ntɔ bɛbɛi

¹⁹ Aɔ̃ Lafɛ̃ɛ, awɔi ì jɛ gbugbãm, nɔ awɔi ì jɛ bi kuwa ku nɛ gbugbãm. Si waatii wahala, bi titɛɛi an ba n sa n koo n manji. Inɛ ŋa iyi à wa hee ilɛ jĩijĩ ŋa aa naa bi tɛɛ. Nɔ aa maa ni, bala nwa ŋa, tubui iboi à jɛ. Nɔ inya ngbɛi, kù nɛ aranfãani kãma.

²⁰ Amanɛ á yɔkɔ ku ce iwɛ̃ ŋa nɔ a jɛ Ilaaɔ̃? Mii ŋa iyi amanɛ á ce, kaa jɛ Ilaaɔ̃.

²¹ Na ŋɔi í jɔ̀ Aɔ̃ Lafɛ̃ɛ í ni, bɛbɛi, an jɔ̀ a mà yiikom nii do gbugbãm. Nɔ aa mà iyi irim nii Aɔ̃ Lafɛ̃ɛ.