Zeremi 15 - Bibeli do fee

¹ Ŋɔi Aɔ̃ Lafɛ̃ɛ í sɔ̃m í ni, baa bii Moizi do Samuɛli à naa bi titom na iri nŋa, lasabum kaa nyi wa si ŋa má pai. Lele ŋa a nɛ a jĩim, n kù bi ku yɛ ŋa má.

² Waati bɛɛbɛ, bii à beeɛ à ni, iwoi aa ka bɔ, aa jɛ nŋai i ni, bɛi amu Aɔ̃ Lafɛ̃ɛ ǹ fɔ wee. Ǹ ni, mii iyi í nɛ ku ba inɛ fei á baai. Inɛ iyi í jɛ ti iku, á kui. Inɛ mɔ iyi í jɛ ti igũ, si igũi á ku. Inɛ mɔ í jɛ ti ari, arii á kpaa. Inɛ mɔ iyi á jɛ aru, aa muu arui.

³ Nɔ Aɔ̃ Lafɛ̃ɛ í nyi í ni má, ijuukpã ikã ikã mɛɛi an jɔ̀ ku naa si ŋa. Taakuba á kpa ŋa, nɔ aja ŋa aa fà ŋai a nɛò hee jĩijĩ. Yɛi ŋa do mɛɛmui sako ŋai aa ŋɔ ŋa a kpa iri nŋa.

⁴ Waati bɛɛbɛ, njo á mu inɛi bommai andunya ŋau fei bii à waa yɛ ŋa. Mii ŋau bɛ fei á ba ŋai na laalɔ ŋa iyi Manasee amai Ezekiasi iyi wa jɛ ilaalui Zudaau í ce si ilui Zeruzalɛmu.

Kuce nŋa ŋau í caa si Aɔ̃ Lafɛ̃ɛ

⁵ Ŋɔi Aɔ̃ Lafɛ̃ɛ í ni, inɛ kãma kù wɛɛ iyi á ce araarei Zeruzalɛmu má, nɔ inɛ kãma kù wɛɛ iyi á kpata na iriɛ má, nɔ inɛ kãma kaa maa bitandi araɛ ku maa bee laabaauɛ ŋa má.

⁶ Ŋɔi Aɔ̃ Lafɛ̃ɛ í ni má, ì fũsim awɔ ì sinda ì nyi do anyi. Na nŋu, an yɔ awɔm wa siɛ nɔ n ce nfeɛ. N kaa n yɔkɔ n maa n mɔsi do araareɛ ku ce.

⁷ Si ilui ilɛu fei, ǹ wu mii ku fɛm nii ǹ wa n fɛ ŋa. Ǹ jɔ̀ inɛm ŋau à kua ama nŋa ŋa, nɔ ǹ jɔ̀ à waa ku, aŋa iyi a kù jɛ ku fũsi kpãa nŋa ŋau awɔ.

⁸ Ǹ jɔ̀ jaaɔ̃ inaabo nŋa ŋa à kpɔ à re sãai tenku. Ǹ jɔ̀ woo ce nfei inɛ í naa si ŋai, do si iyei awaasũu dasã nkpa. Anu akã, ǹ jɔ̀ wa yayai do njo.

⁹ Abo iyi à mà bɛɛrɛɛ wo si na iyi í jɔ̀ í bí ama mɛɛje, kù jɛ nkãma má. Í wɛɛò inɔ kufɔ na ikui amaɛ ŋa. Anyɔ do bɛɛrɛ hai nɛi í jɛ tɛɛ. Inɛ ŋa iyi à gbe ŋau, an jɔ̀ mbɛɛ nŋa ŋa a kpa ŋai do taakuba. Amu Aɔ̃ Lafɛ̃ɛ, amui ǹ fɔ bɛɛbɛ.

Kuweeweai Zeremi si Aɔ̃ Lafɛ̃ɛ

¹⁰ Iyem, inɔ kufɔi í jɛ titom, domi awɔi ì bím wa, nɔ ǹ jɛ inɛ iyi à ya maa jãa ide do woo ce kakɔɔ si ilɛu fei. N ci ya wɛ̃ hai bi inɛ gɔ, nɔ n ci ya wɛ̃a inɛ gɔ. Amma do nŋu fei, inɛ fei í wasi ku ceekpem nii.

¹¹ Ŋɔi Aɔ̃ Lafɛ̃ɛ í ni, n kù tako n kù sɔ̃ɛ wo ntɔ ntɔ? N kù ni an faabaɛ na n ceɛ jiida? N kù tako n kù cãaɛ mbɛɛɛ wo na iriɛ si waatii wahala do si waatii inɔ kufɔ?

¹² Isɔ á yɔkɔ ku cɛ isɔi awɔ njɛi kpãai inunu walakɔ isɔ danya?

¹³ Awɔ Zudaa, an jɔ̀ a ko mii jiidaɛ ŋa do amaniɛ ŋa nɔ a kaa nɛ a sãaɛ nkãma, na dulum dɛɛ ŋa iyi ì ce si ilɛu fei.

¹⁴ An jɔ̀ i koo i jɛ arui mbɛɛɛ ŋa si ilɛ gɔ bii i kù mà, domi idɔɔkɔ̃m í yɛi bɛi ina, nɔ awɔi á jo.

¹⁵ Ŋɔi Zeremi í ni, Aɔ̃ Lafɛ̃ɛ, ì mà mii fei sãa sãa si gãmɛm. Dasi ideu baa na irim. Jaam bi woo kpãm iju ŋau bɛ. Maà jɔ̀ n ku, awɔ iyi idɔɛ ci ya saasa ku kɔ̃. Jɔ̀ i mà iyi na iriɛi ǹ wa n temuaò arabu ŋa.

¹⁶ Waati iyi ǹ ba ide gɔ wa hai bi titɛɛ fei, ǹ ya n gba ideui. Ǹ ya n nɛ si ideɛ ŋau inɔ didɔ̃ nla nlai hee si idɔm, domi à nyam ikã n jɛ tɛɛ, awɔ Aɔ̃ Lafɛ̃ɛi lele do ilɛ.

¹⁷ N kù koo n kù buba n kù waa kpɛ̃ inɔ didɔ̃ do woo yaako inɛ ŋa inya akã. Amma ì tilasim nii ì jɔ̀ ǹ nya aram ikã, domi ì jɔ̀ ǹ wɛɛò idɔɔkɔ̃ nla nla.

¹⁸ Na mii í jɔ̀ wahalam í mɔsi wa koo. Na mii í jɔ̀ jujum kù waa jɛ ku tã. Ntɔ ntɔ, awɔi ì jɛ icui inɔ kufɔm bɛi ido iyi inyiɛ í ya tã?

¹⁹ Na ŋɔi í jɔ̀ Aɔ̃ Lafɛ̃ɛ í fɔ í ni, bii ì sinda ì nyi wa bi tom, an jɔ̀ i baa si icɛɛ si wajum má. Bii ì tã sɔɔlu i ya wũaa ide iyi í nɛ bɛɛrɛ, do iyi kù nɛ bɛɛrɛ, awɔi aa jɛ woo fɔ idem. Nɔ aŋai à nɛ a sinda a baa bi titɛɛ bɛbɛi, amma kù jɛ awɔi aa nyi si ŋa.

²⁰ An jɔ̀ i jɛi bɛi bindii isɔ danya ku nɛ gbugbã bi inɛ ŋau bɛ. Aa naa siɛ igũ, amma a kaa jɛɛ igũ, domi ǹ wɛɛ do awɔ ku ba n faabaɛ nɔ n nyaɛ. Amu Aɔ̃ Lafɛ̃ɛi ǹ fɔ bɛɛbɛ.

²¹ An nyaɛ hai si awɔi inɛ laalɔ ŋa, nɔ n faabaɛ hai si awɔi woo taa inɛ gbugbã ŋa.