Zeremi 14 - Bibeli do fee

Waatii agbɛ nla gɔ

¹ Ide iyi Aɔ̃ Lafɛ̃ɛ í sɔ̃ Zeremi si gãmɛi agbɛ iyi wa ce.

² Inɛi Zudaa ŋa à wa si inɔ kufɔi iku. Ilu nŋa ŋa à baa à kpɔò bomma, nɔ aŋa fei à wa si inɔ kufɔ à waa buba ilɛ. Kukpatai inɛi Zeruzalɛmu ŋau wa bɔ hee lelei Aɔ̃.

³ Ilu gbugbã ŋa à ya bɛ woo ce icɛ nŋa ŋai a koo a dɛdɛ inyi wa. Amma baa bii à bɔ isɔ̃ a ci ya ba inyi kãma wa. À ya sinda a baai jɔlɔ ngbɛ. Nɔ na anyɔ do na lasabu nŋa iyi í fɔtɔtɔu, à ya bii iri nŋai do acɔ.

⁴ Ilɛ í gbɛ hee í la si na iyi í jɔ̀ ijĩ kù waa wɔ. Nɔ woo logoo ŋa mɔ à wɛɛò inɔ kufɔ ntɔ ntɔ, na ŋɔi í jɔ̀ si inɔ kufɔ nŋa, aŋa mɔ à ya maa bii iri nŋai do acɔ.

⁵ Baa kulu ŋa si inɔ sako, à ya fũsi ama nŋa ŋa iyi à bí awɔi si na iyi í jɔ̀ fɔfɔ tũtũ kù wɛɛ.

⁶ Sɛnga ŋa à wai si antaii geete ŋa bii nkãma kù fita siu, à waa ko fufu bɛi ajaako ŋa. À cɔ ilu à gbɛɛji si na iyi í jɔ̀ fɔfɔ kù wɛɛ.

⁷ Inɛi Zudaa ŋa à ni, ntɔ ntɔ à waa ba taalei na saabui kurara nwa ŋa. Amma à waa tɔɔɛi Aɔ̃ Lafɛ̃ɛ, ce ngɔgɔ baa na irii awɔ takaɛ, domi à zambaɛ tuuba nkpɔ nkpɔ, nɔ à ce dulum bi tɛɛ.

⁸ Awɔi ì jɛ kpãa ku cɔi Izirɛli, awɔi ì jɛ woo faabaɛ si waatii inɔ kufɔ. Na mii í jɔ̀ ì waa ce bɛi inɛ njoo iyi í naa si ilɛu, walakɔ bɛi inɛ njoo iyi í naa í gũ ilei acɔɛ ku ba ku sũ hee iju ku má ku bɛi ku nɛ.

⁹ Na mii í jɔ̀ ì waa ce bɛi inɛ iyi kù nɛ gbugbã, ì waa ce bɛi woo ja igũ iyi kaa yɔkɔ ku faaba inɛ mmu ŋa. Do nŋu fei ì bɛi ì wa si anini nwa Aɔ̃ Lafɛ̃ɛ, nɔ à nya wa ikãi a jɛ titɛɛ. Maà fũsi wa awɔ.

¹⁰ Ŋɔi Aɔ̃ Lafɛ̃ɛ í ba zamaau ide ku fɔ í ni, inɛ ŋau ihɛ̃ ku dabii nŋa kù nɛ kɔɔ. A ci ya leekĩ inya akã. Nɔ iyi bɛ kù waa dɔ̃a amu Aɔ̃ Lafɛ̃ɛ si. Na ŋɔi í jɔ̀ n kù gbɛjɛ idei kurara nŋa nɔ ǹ wa n kpã ŋa iju.

¹¹ Ŋɔi Aɔ̃ Lafɛ̃ɛ í sɔ̃m í ni, maà ce kutɔɔ na aranfãanii zamaau ihɛ̃ do na jiidaɛ.

¹² Baa bii à waa tɔɔm do anu ku dĩ, n kaa n gbɔ anu ku dɔ̃i inɔ kufɔ nŋa. Nɔ baa bii à waa ceem kuwee iyi à ya jo si ina fei sãa sãa do amua ŋa, n kaa n gba, domi ǹ wa n bi n ce nfe nŋai do taakuba do ari do bɔ̃ɔ ŋa iyi á kpa ŋa.

¹³ Ŋɔi ǹ jɛaa ǹ ni, Aɔ̃ Lafɛ̃ɛ, walii ŋa wee à sɔ̃ ŋa à ni igũ kaa naa si ŋa hee má jɛ ari. À ni awɔ aa mu nŋa laakai ku sũ iyi í jɛ ntɔ si inyau ihɛ̃.

¹⁴ Ŋɔi Aɔ̃ Lafɛ̃ɛ í jɛɛm má í ni, walii ŋau iboi à waa sɔ do irim. Kù jɛ amui ǹ bɛ ŋa wa, nɔ amu si ǹ na ŋa wooda, kù nɔ kù jɛ amui ǹ ba ŋa ide ku fɔ pai. Kuyɛ ibo ŋai à ce. Kuyɛi alisi nŋa ŋai do ti iwɛ̃ nŋa ŋa. À waa dĩ ijui inɛ ŋai do lasabui idɔ nŋa.

¹⁵ Na nŋu, amu Aɔ̃ Lafɛ̃ɛ, ide iyi ǹ wa n fɔ si gãmɛi inɛ ŋau bɛ wee. Inɛ ŋa iyi à waa ce walii do irim ŋau bɛ nɔ kù bɛi kù jɛ amui ǹ bɛ ŋa wa, nɔ à waa fɔɔ do irim à waa ni, si ilɛu ihɛ̃ igũ kaa ce hee má jɛ ari. Igũ do arii á kpa walii ŋau bɛ.

¹⁶ Nɔ inɛ ŋa iyi à waa cea walii ŋau, an kɛkɛ ŋai si kpãai Zeruzalɛmu ŋau na ari do igũ iyi á ceu. Inɛ kãma kaa wɛɛ iyi a si aŋa taka nŋa hee má jɛ abo nŋa ŋa. A kaa si ama inɛmɔkɔ nŋa ŋa hee má jɛ ama inaabo nŋa ŋa. An jɔ̀ inɔ kukã nŋa ku cuku si irii aŋa taka nŋai.

¹⁷ Ide iyi ì nɛ i sɔ̃ ŋa wee. Ijum í ya maa là inyii dasã do idũ fei hai nɛ kɔɔ, domi zamaam iyi ǹ bi bɛi ama inaabom í ba wahala nla nla, nɔ í ba kumɛɛ iyi wa roo ntɔ ntɔ.

¹⁸ Bii ǹ fita ǹ bɔ inɔ sako, ikui inɛ ŋa iyi à kpa si igũi ǹ ya n yɛ. Nɔ bii ǹ baa si inɔ ilu, ǹ ya n yɛ inɛ ŋa à waa wahalai do ari. Walii ŋa do woo wee ŋa à dabii si ilɛu, nɔ a kù mà yaasei mii iyi wa ce.

¹⁹ [Ŋɔi inɛ ŋau à ni,] Aɔ̃ Lafɛ̃ɛ, ì fũsi awa inɛi Zudaa ŋa awɔ mbɛ hee do ajɔ fei? Ì cé awa inɛi Siɔ̃ɔ ŋai? Bɛirei í ce ì jɔ̀ à waa ba kumɛɛ iyi kù nɛ kù tã. À waa cɔ kpãai mii fei ku teese, amma nkãma kù waa ce iyi í jɛ jiida. À waa cɔ kpãai wahala nwa ŋa ku leekĩ, amma si zigiidai à kɔ̀ à wa si.

²⁰ Aɔ̃ Lafɛ̃ɛ, à mà inɔ kukã nwa do kurarai bala nwa ŋa, domi à ce dulum bi titɛɛ.

²¹ Na bɛɛrɛɛ, maà kɔ̀si wa. Maà kaye bɛɛrɛi kitãi bomma ku nɛ amboeɛ. Ye gigi, maà fũ akabuu iyi í wa si gãmɛi awaɛ ŋa.

²² Si iwɛ̃i inɛi ilɛ ŋau ihɛ̃, baa akã í wɛɛ iyi á yɔkɔ ku jɔ̀ ijĩ ku naa? Mà lelei í ya jɔ̀ ijĩ ku naa anu akã nɔ ku leekĩ. Kù jɛ awɔ Aɔ̃ Lafɛ̃ɛ nwai? Siɛi kpãa ku cɔ nwa í wa, domi awɔi ì waa ce mii ŋau bɛ fei.