Zeremi 13 - Bibeli do fee

Zeremi do idei kungbã iyi à ce do ikũ ku nɛ gbugbã

¹ Ŋɔi Aɔ̃ Lafɛ̃ɛ í sɔ̃m í ni, koo ra kungbã iyi à ce do ikũ ku nɛ gbugbã i dũu si kpakaɛ. Amma maà fɔɔ.

² Ŋɔi ǹ koo ǹ ra kungbãu wa si bɛi Aɔ̃ Lafɛ̃ɛ í sɔ̃m, nɔ ǹ dũu si kpakam.

³ Ŋɔi Aɔ̃ Lafɛ̃ɛ í nyi í bam ide ku fɔ isɛ gbeejisia má í ni,

⁴ so kungbã iyi ì rau iyi ì dĩ si kpakaɛu, nɔ i dede i bɔ ikpa idoi Efarata. Bii ì to bɛ, singaɛ si afãi kuta gɔ.

⁵ Ŋɔi ǹ koo ǹ singaɛ kɔkɔi idoi Efarata si bɛi Aɔ̃ Lafɛ̃ɛ í sɔ̃m nɔu.

⁶ Si anyiɛ iyi í kpɛ, ŋɔi Aɔ̃ Lafɛ̃ɛ í sɔ̃m má í ni, dede i bɔ idoi Efarata i koo i nya kungbã iyi ǹ tako ǹ ni i koo i singau wa.

⁷ Ŋɔi ǹ dede ǹ bɔ idoi Efarata nɔ ǹ koo ǹ nya kungbãu wa hai tengi bii ǹ tako ǹ singaɛu. Amma ǹ ba wee kungbãu í bɛjɛ, kaa ce saalu jiida kãma gɔ má.

⁸ Ŋɔi ide ku fɔi Aɔ̃ Lafɛ̃ɛ í nyi í naa sim má í ni,

⁹ bɛi amu Aɔ̃ Lafɛ̃ɛ ǹ wa n fɔ wee. Ǹ ni, do yaase bɛi ì yɛ kungbãu bɛ í ce, do yaase bɛɛbɛ mɔi an jɔ̀ faaui inɛi Zudaa ŋa do faau nla nlai inɛi Zeruzalɛmu ŋa ku leekĩ.

¹⁰ Inɛ ŋau inɛ laalɔ ŋai iyi à kɔ̀ ku gbɔ idem ŋa. Inɛ ŋai iyi à waa nɛ si idɔ kulele nŋa, nɔ à nɛ anu akã do iwɛ̃ ŋa. À ya koo a gulɛ a maa tɔɔ ŋa nɔ à ya maa sɛɛbata nŋa. Inɛ ŋau aa baa a yɛi bɛi kungbãu ihɛ̃ iyi kaa ce saalu kãma gɔ má.

¹¹ Ntɔ ntɔ, bɛi inɛ í ya dĩ kungbã si kpakaɛ, bɛɛbɛ mɔi amu takam ǹ tako ǹ dĩ inɛi kpasɛ̃i Izirɛli ŋa do inɛi kpasɛ̃i Zudaa ŋa fei. Amu Aɔ̃ Lafɛ̃ɛi ǹ fɔ bɛɛbɛ. Ǹ ce bɛɛbɛi wo ku ba a jɛ inɛm ŋa, nɔ irim do idei saabum ku wa si gɛlɛ nŋa, nɔ a jɛ boodam. Amma a kù jɛ ku gbɔ.

Atɛ̃ vɛ̃ɛ do idɔɔkɔ̃i Aɔ̃ Lafɛ̃ɛ

¹² Na nŋu, koo i sɔ̃ ŋa i ni, ide iyi Aɔ̃ Lafɛ̃ɛi Izirɛli í fɔ wee. Í ni, aa wɔ si jɔlɔ ŋau fei atɛ̃ vɛ̃ɛi ku kɔ̃. Amma bii ì sɔ̃ ŋa bɛɛbɛ, aa sɔ̃ɛ a ni, awa a kù mà iyi à nɛ a wɔ si jɔlɔ ŋau fei atɛ̃ vɛ̃ɛ a kɔ̃i?

¹³ Aa sɔ̃ ŋa mái i ni, ide iyi Aɔ̃ Lafɛ̃ɛ í fɔ wee. Í ni, an jɔ̀ inɛi ilɛ ŋau ihɛ̃ fei a mɔ atɛ̃i hee ku maa kpa ŋa, hai ilaalu ŋa iyi à waa buba si kitãi bommai ilaalu Davidi, do woo wee ŋa, do walii ŋa, do inɛi Zeruzalɛmu ŋa fei.

¹⁴ An so ŋai n gãmɔ ŋa si njɛ nɔ a lɛgɛ yabi yabi. An gãmɔ iyeò baa ŋai do amu ŋa ajɔ. Amu Aɔ̃ Lafɛ̃ɛi ǹ fɔ bɛɛbɛ. N kaa n jɔ̀ inɛ kãma ku fita si. Nɔ n kaa n ce araare nŋa. Nkãma kaa nɔ ku ganjim n kpa ŋa.

I sotĩ i gbɔ ŋa hee waati ku maa lɔ

¹⁵ I de itĩ nɔ i gbɔ ku ce ncɛɛ ŋa. I maà jɛ woo lele idɔ ŋa má ŋa, domi Aɔ̃ Lafɛ̃ɛi wa fɔ ide.

¹⁶ I jɔ̀ Aɔ̃ Lafɛ̃ɛ nŋɛ ku nɛ bɛɛrɛ ŋa hee ku na ku maa jɔ̀ ilu kuku ku naa si ŋɛ hee i na i maa koosɛ ŋa si iri kuta ŋa na ilu kukui alɛ alɛu. Aa maa degbe inya kumá ŋa, amma Aɔ̃ Lafɛ̃ɛ á kpaasi inya kumáu ku baa ku jɛ ilu kuku bɛi bi kuwai iku ŋa. Á jɔ̀ inya kumáu ku baa ku jɛ ilu kuku nla nla bɛi kudũi ijĩ.

¹⁷ Bii ì kɔ̀ ku gbɔ iyi ihɛ̃ ŋa, an kpatai si asii na faau nŋɛ. An kpatai ntɔ ntɔ si na iyi í jɔ̀ aa na a mu mɛɛmu gaai Aɔ̃ Lafɛ̃ɛ aru a nɛò.

Ide iyi Aɔ̃ Lafɛ̃ɛ wa sɔ̃ inɛi kpasɛ̃i ilaalu ŋa

¹⁸ Sɔ̃ ilaalu do iyeɛ i ni, i buba ilɛ ŋa, domi fulai amanlu nŋɛ iyi í nɛ booda kusĩau í nya í cuku hai si iri nŋɛ.

¹⁹ Mbɛɛ ŋa à cĩmbo ilui Negɛbu ŋau, nɔ inɛ kãma kù wɛɛ iyi á cũu. À ko inɛi Zudaa ŋau fei à nɛò ŋa, à nɛò ŋai fei mam mam.

Zeruzalɛmu kù nɛ bɛɛrɛ má

²⁰ Wu iju nɔ i cɔ inɛ ŋa iyi à waa naa hai ikpa awɔ njɛi kpãai inunu. Hee iwoi mɛɛmu gaa iyi à tako à naɛu í wa. Hee iwoi mɛɛmu gaa iyi í tako wa jɛ bɛɛrɛɛ wou í wa.

²¹ Bii inɛ ŋa iyi awɔ takaɛ ì jɔ̀ iŋɛò ŋa ì nɛ anu akã à naa siɛ igũ nɔ à kãmiaɛ, bɛirei aa ba i ni má. Ara kuro á to siɛi ntɔ ntɔ bɛi inaabo iyi wa bi ku bí.

²² Waati bɛɛbɛ, aa bee araɛ ide i maa ni, na mii í jɔ̀ mii nɔu ihɛ̃ wa bam. Na kurara nkpɔ nkpɔɛ ŋaui í jɔ̀ itĩi ibɔɛ ŋau wa nya, nɔ ì waa ba kumɛɛ ntɔ ntɔ si cicĩisɛɛ ŋa.

²³ Inɛi Etiopi á yɔkɔ ku kpaasi batai araɛ? Mà muãa á yɔkɔ ku kpaasi ila bati batii araɛ. Bɛɛbɛ mɔi iŋɛ iyi ì nɛ dɔ̃ɔnɛi laalɔ ku ce ŋa, aa yɔkɔ i ce jiida ŋa?

²⁴ An fangaa ŋɛi bɛi fufu í ya gbangaa fɔfɔ si gbaa.

²⁵ Ŋɔi Aɔ̃ Lafɛ̃ɛ í ni má, mii iyi á baɛ mbɛ, nɔ ikpɛ̃ iyi amu Aɔ̃ Lafɛ̃ɛ ǹ wã ǹ jilɛɛ mbɛ, si na iyi í jɔ̀ ì gbɛjɛm nɔ ì dasi naanɛɛ si ibo.

²⁶ An wu itĩi ibɔɛi hee ku naa si wajuɛ ku ba inɛ ŋa a yɛ basĩɛ.

²⁷ Ntɔ ntɔ ǹ wa n yɛ sakara ku ceɛ ŋa nɔ ǹ wa n gbɔ anu ku dɔ̃i kɔdɛɛɛ, nɔ ǹ wa n yɛ icu ku taɛ iyi wa jɛ anyɔɛ si iri kuta ŋa do si inɔ sako ŋa. Ntɔ ntɔ, ǹ yɛ iwɛ̃ɛ ŋau. Inɔ kufɔi í jɛ titɛɛ Zeruzalɛmu, awɔ iyi i kù waa dɛ araɛ ku maaju. Hee waati yoomai aa kɔ̀ i maa wɛɛ bɛɛbɛ.