Zeremi 12 - Bibeli do fee

¹ Aɔ̃ Lafɛ̃ɛ, dee dee ku jɛɛ í caa. N kù nɛ n maa n ce kakɔɔ do awɔ. Amma do nŋu fei, ǹ bi n baɛ ide ku fɔ si kiitiɛ ŋa. Inɛ ŋa iyi à jɛ inɛ laalɔ ŋa, mii iyi à waa ce si kuwɛɛ nŋa fei, í ya maa nɛ nŋai dee dee. Na mii. Bɛirei í ce woo zamba inɛ ŋa, aŋa fei à ya maa wɛɛ nŋai do laakai ku sũ.

² Awɔi ì lɔ ŋa, à ce icã, à la à waa koo, nɔ à waa so iso ŋa. Iriɛ í ya maa wai si gɛlɛ nŋa waati kãma fei, amma idɔ nŋa í jĩòɛ.

³ Nɔ amu, ì màm Aɔ̃ Lafɛ̃ɛ. Ì waa yɛm, ì wusɛ idɔm ì yɔɔ iyi í wa bi titɛɛ. Amma aŋa iyi à gbe ŋau, nya ŋa ikã bɛi angudã ŋa iyi à waa bɔò bi ku kpa mɛɛmu ŋa. Nya ŋa ikã a maa degbeò ajɔi kukpa nŋa.

⁴ Hee waati yoomai ilɛu á maa wa si kukpatai akũ, nɔ jĩi do fɔfɔ tũtũ fei ku gbɛ. Na irii inɔ kukãi inɛi ilɛ ŋau, mɛɛmu do yɛi ŋa fei aa tãi, domi à ya maa ni, kaa yɔkɔ ku fɔ mii iyi á na ku ba wa.

⁵ Ŋɔi Aɔ̃ Lafɛ̃ɛ í ni, bii ì waa sɛi do inɛ ŋa iyi à waa sɛi do kutɛ, nɔ à waa gbɛɛjiɛ, bɛirei aa ce i yɔkɔ i gaasa do acĩ ŋa si kusɛi. Nɔ bii í jɛ ì ya wɛɛò laakai ku sũi si ilɛ iyi í jɛ ilɛi laakai ku sũ nŋu akã, bɛirei aa ce bii idoi Zuudɛ̃ɛ í naa í kɔ̃.

⁶ Ntɔ ntɔ, inɛɛ ŋa taka nŋa mɔ, do inɛi kpasɛ̃i baaɛ ŋa à waa zambaɛ. Aŋa taka nŋa à waa dɔ̃ anu si fitiɛ wa ntɔ ntɔ. Maà dasi naanɛ baa bii à waa sɔ̃ɛ ide didɔ̃ ŋa.

Aɔ̃ Lafɛ̃ɛ í fũsi kpasɛ̃ɛ do zamaaɛu awɔ

⁷ Ǹ fũsi kpasɛ̃m awɔ, ǹ fũsi zamaam nɔu awɔ. Ǹ fũa mbɛɛ mii iyi ǹ bi ntɔ ntɔ si idɔm nɔu awɔ.

⁸ Zamaam nɔu í jɛɛm nii bɛi muusu nla iyi í wa si inɔ agbo, nɔ wa dɔ̃ sim anu. Na ŋɔi í jɔ̀ amu mɔ ǹ cóo.

⁹ Debɛi zamaam nɔu í baa í jɛɛm bɛi yɛi ku jɛ iŋai kpaasi ŋa iyi í fɔ́ araɛ do njɛ? Yɛi ŋa iyi à ya jɛ iŋai kpaasi ŋai à kaakoɛ? I koo i tɔtɔɔ mɛɛmui sako ŋau fei ŋa nɔ i jɔ̀ a naa jingau ŋa.

¹⁰ Woo degbe nkpɔ nkpɔi wa ce asɔɔi jĩi ndii rezɛ̃ɛm. À waa jojo si bantumai ikom ŋa. À waa kpaasi iko kusĩam nɔu bɛi gbaa do bɛi inya iyi í kpɔò bomma.

¹¹ À jɔ̀ í baa í kpɔò bomma do inyai kukpata na inɔ kufɔi iku. Ilɛu í baa í kpɔò bomma si wajum. À ce nfei ilɛui fei mam mam, nɔ inɛ kãma kù waa lasabu si.

¹² Hai si iri kuta ŋa bii inɛ kãma ci ya fitaui woo ce asɔɔ ŋau à faata wa. Taakubai Aɔ̃ Lafɛ̃ɛ í ce nfei ilɛu hai kɔɔ ihɛ̃ hee ku bɔ kɔɔ ikpa ihɔ̃. Nɔ laakai ku sũ kù wɛɛa inɛ kãma.

¹³ Inɛ ŋau à gbɛ̃ bilee, nɔ à waa da agũ ŋa. À wahala ara nŋai ngbɛ ngbɛ, a kaa jɛ baakaɛ kãma. Anyɔi í jɛ tu ŋa si amaajɛ nŋa ŋa iyi à da. Idɔɔkɔ̃ nla nlai Aɔ̃ Lafɛ̃ɛi í jɔ̀ í ce bɛɛbɛ.

Aɔ̃ Lafɛ̃ɛ do inɛi kɔkɔi inɛi Izirɛli ŋa

¹⁴ Ide iyi Aɔ̃ Lafɛ̃ɛ wa fɔ si gãmɛi inɛ laalɔ ŋa iyi à wa kɔkɔi inɛi Izirɛli ŋa wee. Í ni, inɛ ŋa iyi à lù ilɛ iyi ǹ na inɛm ŋa inɛi Izirɛli ŋau, an nya lafɛ̃ɛ ŋai hai si ilɛ nŋa, nɔ n nya inɛi Zudaa ŋa mɔ hai si anini nŋa.

¹⁵ Amma si anyiɛ, an nyi n ce araare nŋa má, nɔ n jɔ̀ inɛ fei ku nyi si tubuɛ, nɔ inɛ fei ku nyi si ilɛɛ.

¹⁶ Inɛ ŋau à kɔ inɛm ŋa kugbasi ku ce do irii iwɛ̃ iyi à ya kpe Baali. Amma ntɔ ntɔ, bii à mà isɛɛnɛ bɛi inɛ iyi í jɛ inɛm í nɛ ku ce, bii à waa ce kugbasi à waa ni, ǹ wa n gbasi do irii Aɔ̃ Lafɛ̃ɛ iyi í wɛɛ, waati bɛɛbɛi aŋa mɔ aa ba a buba si inɔi inɛm ŋa.

¹⁷ Amma bii dimi gɔ si ilɛ ŋa í kɔ̀ ku gbɔ idem, an leleɛi hee do ajɔ fei, nɔ n kpa iriɛ. Amu Aɔ̃ Lafɛ̃ɛi ǹ fɔ bɛɛbɛ.