Zeremi 11 - Bibeli do fee

Inɛ ŋa iyi a kù jirima akabuu nŋa

¹ Ide iyi Aɔ̃ Lafɛ̃ɛ í sɔ̃ Zeremi wee.

² Í ni, i sotĩ i gbɔ idei akabuuu ihɛ̃ ŋa, nɔ i sɔ̃ inɛi Zudaa ŋa do inɛi Zeruzalɛmu ŋa.

³ Aa sɔ̃ ŋai i ni, bɛi Aɔ̃ Lafɛ̃ɛ, nŋu iyi í jɛ Lafɛ̃ɛi inɛi Izirɛli ŋa í fɔ wee. Í ni, ikpei í jɛ ti inɛ iyi kù waa gbɔ idei akabuuu ihɛ̃

⁴ iyi amu Aɔ̃ Lafɛ̃ɛ ǹ jilɛa bala nŋɛ ŋa si ajɔ iyi ǹ fitaò ŋa wa hai ilɛi Ezibiti. Tengi bɛ, à yɛi bɛi inɛ ŋa iyi à wa si inɔ caka iyi à ya tɛkɛ si ina à yɔò isɔ. Waati bɛɛbɛi ǹ sɔ̃ ŋa ǹ ni, i sotĩ i gbɔ idem ŋa, nɔ i ce bɛi an sɔ̃ ŋɛ.

⁵ Do yaase bɛɛbɛ, an kɔ̃ kuwã iyi ǹ cea bala nŋɛ ŋa ǹ ni an mu nŋa ilɛ bii amɔ do nyikɔ̃ wa kɔ̃u bɛi iŋɛ taka nŋɛ ì waa yɔɔ nnyiu ihɛ̃ ŋa. Nɔ amu Zeremi ǹ jɛ ǹ ni, ami Aɔ̃ Lafɛ̃ɛ.

⁶ Ŋɔi Aɔ̃ Lafɛ̃ɛ í sɔ̃m í ni, dɔ̃ anu hee lele i fɔ ide ŋau ihɛ̃ si ilui Zudaa ŋa do si kpãai Zeruzalɛmu ŋa i ni, i sotĩ i gbɔ idei akabuuu ihɛ̃ ŋa, nɔ i ceò ŋa icɛ ŋa.

⁷ Hai ajɔ iyi amu Aɔ̃ Lafɛ̃ɛ ǹ jɔ̀ bala nŋɛ ŋa à fita wa hai ilɛi Ezibiti ǹ sɔ̃ ŋa ǹ kɔnkɔn du ŋa ǹ ni a ya sotĩ a gbɔ idem ŋa. Bɛɛbɛi ǹ wa n sɔ̃ iŋɛ mɔ nnyi ǹ wa n kɔnkɔn du ŋɛ ǹ ni i ya sotĩ i gbɔ idem ŋa.

⁸ Amma a kù jɛ ku gbɔ, a kù jɛ ku desim itĩ. Aŋa fei idɔ ku lele sãmi nŋai à too si. Na nŋu, ide ŋa iyi à fɔ si akabuuu si gãmɛi inɛ ŋa iyi a kù jirima woodam ŋau fei, ǹ jɔ̀ ide ŋau í ba ŋa.

⁹ Ŋɔi Aɔ̃ Lafɛ̃ɛ í sɔ̃m má í ni, inɛi Zudaa do inɛi Zeruzalɛmu ŋa à dĩ tɔɔsii laalɔ ku ce.

¹⁰ À sinda à nyi si kurarai bala nŋa ŋa iyi à tako à kɔ̀ idem ŋa ku gbɔu, nɔ à ce anu akã do iwɛ̃ ŋa à ya maa tɔɔu. Inɛi Izirɛli ŋa do inɛi Zudaa ŋa à fũ akabuu iyi ǹ tako ǹ dĩ do bala nŋa ŋa.

¹¹ Na nŋu, Aɔ̃ Lafɛ̃ɛ í ni, cɔ, an jɔ̀ wahala ku naa si ŋai, nɔ a kaa yɔkɔ a fita si. Waati iyi aa na a maa dɔ̃ sim anu a maa tɔɔm faaba, n kaa n gbɔ nŋa.

¹² Inɛi Zudaa do inɛi Zeruzalɛmu ŋau aa koo a maa tɔɔ iwɛ̃ ŋa iyi à ya maa cea kuweei tuae ku dɔ̃ inunu ŋau. Amma kù nɛ sika kãma, iwɛ̃ ŋau a kaa faaba ŋa si waatii wahala nŋau.

¹³ Kukpɔi iwɛ̃i inɛi Zudaa ŋau do kukpɔi ilu nŋa ŋau fei à waa mungai. Si ilui Zeruzalɛmu, bi kuwee ŋa iyi à ce do kukpɔi kpãaɛ ŋau fei à waa mungai. Si bi kuwee ŋau bɛi à ya cea iwɛ̃ Baali iyi à ya kpe anyɔu kuwee ŋa.

¹⁴ Awɔ Zeremi, maà ce kutɔɔ na irii inɛ ŋau ihɛ̃ má. Maà dɔ̃ sim anu nɔ i maà ce kutɔɔ na iri nŋa má, domi n kaa n gbɔ nŋa má bii à waa tɔɔm na laalɔ iyi í naa si ŋa.

Izirɛli, jĩi ndii olivii Aɔ̃ Lafɛ̃ɛ

¹⁵ Aɔ̃ Lafɛ̃ɛ í ni, zamaam iyi ǹ bi jiidau wa ce daa sãmi iyi kù nɛ baa jia. Mii wa naa ku ce si inɔ kpasɛ̃m ihɛ̃ má. Wa tamaa bɛi kuwã ŋa walakɔ kuwee ŋa iyi wa ceem ŋaui aa nyaa si wahalau nɔ a jɔ̀ ku ba ku fita si?

¹⁶ Awɔ zamaam ì yɛi bɛi jĩi ndii olivi tũtũ iyi kù nɛ ku singa na saabui kusĩai isoɛ. Iri iyi Aɔ̃ Lafɛ̃ɛ í tako í sɔɛ mbɛ wo. Amma waati iyi iba nla nla í ce, á dasiɛ inai, nɔ waati bɛɛbɛ, amaawɔɛ ŋau a kaa jɛ nkãma má.

¹⁷ Amu Aɔ̃ Lafɛ̃ɛi lele do ilɛ, amu iyi ǹ lɔ jĩi nɔu, amui an jɔ̀ laalɔ ku naa siɛ wa na laalɔ iyi iŋɛ kpasɛ̃i Izirɛli do Zudaa ì cea ara nŋɛ ŋa waati iyi ì dede idɔɔkɔ̃m ŋa na kuweei tuae ku dɔ̃ inunu iyi ì koo ì waa cea iwɛ̃ iyi à ya kpe Baaliu ŋa.

Zeremi wa ba bitandi hai si inɔ kpasɛ̃i nŋu takaɛ

¹⁸ Aɔ̃ Lafɛ̃ɛi í sɔ̃m, nɔ nŋui í jɔ̀ ǹ mà. Nŋui í jɔ̀ ǹ yɛ kuce nŋa ŋa.

¹⁹ Ǹ yɛi bɛi ama angudã kurɔ iyi à gbã à waa bɔò bi ku kpa mɛɛmu ŋa, nɔ n kù mà lasabu iyi à waa ce na irim. À waa ni, ka kpa jĩi nɔu do isoɛ fei. Ka nyaa hai si ilɛ ihɛ̃ bii ilu hunde ŋa à wa, nɔ a maà ye gigii iriɛ má.

²⁰ Amma Aɔ̃ Lafɛ̃ɛi lele do ilɛi í jɛ woo kiiti dee dee, nɔ nŋui í mà mii iyi í wa si idɔi amanɛ ŋa do lasabu nŋa fei. An maa n cɔ do yaase bɛi a kɔ̀ɔm, domi nŋui ǹ so idem nɔu ǹ daa si awɔ.

²¹ Na nŋu, Aɔ̃ Lafɛ̃ɛ í fɔ ide si gãmɛi inɛi Anatɔti ŋa, aŋa iyi à waa bi ikum nɔ à waa ni, maà ce walii do irii Aɔ̃ Lafɛ̃ɛ, bii kù jɛ bɛɛbɛ, aa ka kpaɛ.

²² Ŋɔi Aɔ̃ Lafɛ̃ɛi lele do ilɛ í ni, an naa si ŋa, nɔ waati bɛɛbɛ taakuba á kpa awaasũ nŋa ŋa, nɔ ama inɛmɔkɔ nŋa ŋa do ama inaabo nŋa ŋa aa kui do ari.

²³ Kãma nŋa ŋa kaa gbe, domi an jɔ̀ laalɔ ku naa si inɛi Anatɔti ŋa adɔ̃ iyi an kiiti ŋa.