Zeremi 10 - Bibeli do fee

Aɔ̃ Lafɛ̃ɛ woo taka do iwɛ̃ ŋa

¹ Iŋɛ inɛi Izirɛli ŋa, i gbɔ ide iyi Aɔ̃ Lafɛ̃ɛ wa fɔ si ŋɛ.

² Aɔ̃ Lafɛ̃ɛ í ni, i maà too si isɛɛnɛi dimi mmu ŋa, nɔ i maà jɔ̀ nyindai lelei Aɔ̃ ŋau bɛ a da zigi nŋɛ, bɛi wa da zigii dimi mmu ŋau.

³ Kpãai iwɛ̃ ŋa ku tɔɔi dimi mmu ŋau, inya ngbɛi, nkãma kù wa si. À ya koo a da jĩi wai hai inɔ sako nɔ woo gbe jĩi ku gboo do amaanya ku ceò iwɛ̃.

⁴ À ya biiɛi do isɔ fũfũ do wura. À ya kpakpa si pɔ̃ɔtii do mataaka ku ba ku maà yaga.

⁵ Iwɛ̃ ŋau à yɛi bɛi ama dekĩ ŋa iyi à ya ce si iko a leleò yɛi ŋa. Iwɛ̃ ŋau a ci ya fɔ ide, nɔ à ya maa so ŋai, domi a kaa yɔkɔ a wu baa isɛ akã. Na nŋu, i maà ce njo nŋa ŋa, domi a kaa yɔkɔ a ce nŋɛ laalɔ kãma. Nɔ bɛɛbɛ mɔi a kaa yɔkɔ a ce mii jiida kãma.

⁶ Aɔ̃ Lafɛ̃ɛ, inɛ kãma kù yɛ bɛi awɔ. Ì la, nɔ iriɛ í bɔ bii fei na gbugbãɛ.

⁷ Yooi kaa ce njoɛ, awɔ ilaalui ilɛ ŋa. Awɔi inɛ ŋa à nɛ a jirima, domi si ilu laakaii inɛi ilɛ ŋa fei, do si bomma ŋa fei, inɛ kãma kù yɛ bɛi awɔ.

⁸ Aŋa fei mam mam à ce nnyɛii nɔ a kù nɛ yaase. Kpãai iwɛ̃ ku tɔɔ nŋau bɛ, cioi inya ngbɛi.

⁹ À ya cea iwɛ̃ nŋa ŋau boodai do isɔ jiida iyi à baaò wa hai ilɛi Taasi, walakɔ do wura iyi wa naa hai Ufaazi. Woo ce icɛi awɔ ŋau, aŋai à ya rɔɔ, nɔ woo ce icɛi wura ŋai à ya ce icɛɛ. Jĩnɛ jiida nkpa ku nɛ fia ŋai à ya daa si, walakɔ bulam bulam. Iwɛ̃ ŋau bɛ fei, inɛ ŋa iyi à nɛ kumà, icɛi awɔ nŋa mbɛ.

¹⁰ Amma Aɔ̃ Lafɛ̃ɛi í jɛ Ilaaɔ̃ do ntɔ. Nŋui í jɛ ilu hunde, nɔ nŋui í jɛ ilaalu hee do ajɔ fei. Si idɔɔkɔ̃ɛ, ilɛ í ya yayai, nɔ inɛi andunya ŋa à ya kua gbugbãi si idɔɔkɔ̃ɛu.

¹¹ Ide iyi aa sɔ̃ ŋa ŋa wee. I sɔ̃ ŋa i ni, iwɛ̃ ŋau bɛ, kù jɛ aŋai à taka lele do ilɛ. Na nŋu, aa ce nfe nŋai mam mam.

¹² Aɔ̃ Lafɛ̃ɛ í ce ilɛi do gbugbãɛ. Í jilɛ andunyai si kumàɛ, nɔ í tɛ lelei do bisiɛ.

¹³ Bii í naa wooda, inyi í ya tɔtɔɔi lele, nɔ inɛ ŋa à ya yɛ kudũi ijĩ ŋai hee jĩijĩ. Ijĩu í ya maa ŋɔi nɔ í ya jɔ̀ fufu ku dede wai hai bi kuwaɛ.

¹⁴ Inɛ ŋau fei nnyɛi ŋai, a ci ya gbɔ yaasei nkãma. Woo ce icɛi wura ŋau fei, anyɔ í ya baa ku mu ŋai si mii ŋa iyi à ceu, domi iwɛ̃ ŋau ibo ŋai, a kù jɛ ilu hunde ŋa.

¹⁵ Inya ngbɛ ŋai, nɔ dɔ̃anyi ŋai. Aŋa fei aa lɔi waati iyi ijuukpã á to wa.

¹⁶ Lafɛ̃ɛi inɛi Zakɔbu ŋa kù yɛ bɛi aŋa, domi nŋui í taka mii fei. Nɔ dimii Izirɛliu nŋui í nɔɔ. Iriɛi í jɛ Aɔ̃ Lafɛ̃ɛi lele do ilɛ.

Nfe ku ceu kù nɛ sika kãma

¹⁷ Zeremi í ni, iŋɛ inɛi Zeruzalɛmu ŋa, inɛ ŋa wee à bu ilu nŋɛ koe. I dede i ko jĩnɛ nŋɛ ŋa hai ilɛ nŋɛ.

¹⁸ Ide iyi Aɔ̃ Lafɛ̃ɛ í fɔ wee. Í ni, si tuubau ihɛ̃, an so inɛi ilɛ ŋaui n ta ŋa bɛi à ya ta atavim. An mante ŋai ntɔ ntɔ ku ba inɛ ŋa a to ŋa awɔ.

¹⁹ Ŋɔi inɛi Zeruzalɛmu ŋa à ni, irei í gbɔ inɔ kufɔ. Kumɛɛ nwau kaa tã. Awa iyi à fɔ wo à ni, kù jɛ taale, aa ka temuaò wahala nwa.

²⁰ À kɛkɛ ilei acɔm nɔu. Ikũɛ ŋau fei à dá. Nɔ ama inɛmɔkɔm ŋau fei à nɛ à jɔ̀m. N kù nɛ inɛ kãma iyi á teese ku gũ ilei acɔm nɔu do bi kuwam nɔu má.

²¹ Ŋɔi Zeremi í ni, woo degbe ŋaui à ce nnyɛi, domi aŋai a kù dɛdɛ Aɔ̃ Lafɛ̃ɛ. Na ŋɔi í jɔ̀ a kù nɛ lasabu jiida, nɔ inɛ ŋa iyi à waa gbã ŋau à fangaa fei.

²² Wee à waa gbɔ iba nla nla gɔ wa naa. À waa gbɔ wakata nla nla gɔ wa hai ikpa ilɛi awɔ njɛi kpãai inunu iyi wa naa ku ce nfei ilui Zudaa ŋa nɔ ku jɔ̀ a baa a kpɔò bomma, nɔ a baa a jɛ bi kuwai ajaako ŋa.

Zeremi wa ce kutɔɔ na inɛɛ ŋa

²³ Aɔ̃ Lafɛ̃ɛ, ǹ mà iyi amanɛ kaa yɔkɔ ku maa nɛ dee dee si bɛi í jɔ. Inɛ gɔ kù wɛɛ iyi á yɔkɔ ku maa ce isɛɛnɛ si yaase jiida do araɛ.

²⁴ Aɔ̃ Lafɛ̃ɛ, kpãm iju. Amma, coo ku nɛ zaka, nɔ ku maà jɛ do idɔɔkɔ̃. Bii kù jɛ bɛɛbɛ, aa ce nfem nii mam mam.

²⁵ Nyisi idɔɔkɔ̃ɛ si dimi ŋa iyi a kù màɛ ŋau bɛ, do si dimi ŋa iyi a ci ya kpe iriɛ ŋau bɛ, domi aŋai à waa ce nfei inɛi Zakɔbu ŋau. À waa kpa ŋai, aa kpa ŋai mam mam. Aa jɔ̀ bi kuwa nŋau ku kpɔò bommai.