Zeremi 1 - Bibeli do fee

¹ Idei Zeremi amai Hilikiya inɛ akãi woo weei ilui Anatɔti ŋa iyi í wa ilɛi Bɛnzamɛɛu.

² Aɔ̃ Lafɛ̃ɛ í baa ide ku fɔ si adɔ̃ maatɛtasiai bomma ku jɛi Zoziasi amai Amɔɔ ilaalui Zudaau.

³ Nɔ í nyi í baa ide ku fɔ má si waati iyi Zoakimu amai Zoziasi í jɛ bomma si ilɛi Zudaa, hee ku bɔ si kɔɔi adɔ̃ maatakãsiai bomma ku jɛi Sedesiasi amai Zoziasi si ilɛi Zudaa si cukpa miiusiaɛ. Waati bɛɛbɛi à mu inɛi Zeruzalɛmu ŋa aru à nɛò ŋa.

Ilaaɔ̃ í kpe Zeremi ku jɛ woo fɔaa ide

⁴ Ŋɔi Aɔ̃ Lafɛ̃ɛ í bam ide ku fɔ í ni,

⁵ hee n maa n ceɛ si inɔi iyeɛ, ǹ màɛ tã. Hai waati iyi a kù bíɛ, ǹ cicaɛ nɔ ǹ jilɛɛ i jɛ waliii inɛi ilɛ ŋa.

⁶ Ŋɔi ǹ jɛaa ǹ ni, Aɔ̃ Lafɛ̃ɛ, amu wee n kù mà ide ku fɔ, domi amu ama keekei.

⁷ Nɔ Aɔ̃ Lafɛ̃ɛ í sɔ̃m í ni, maà ti i ni awɔ ama keekei, domi awɔi aa bɔ bi inɛ ŋa iyi an bɛɛ ŋau bɛ fei, nɔ i fɔ iyi an sɔ̃ɛ fei.

⁸ Ŋɔi Aɔ̃ Lafɛ̃ɛ í sɔ̃m má í ni, maà ce njo nŋa, domi ǹ wɛɛ do awɔ nɔ an faabaɛ.

⁹ Ŋɔi Aɔ̃ Lafɛ̃ɛ í yɔ awɔ í lu gɛlɛm, nɔ í sɔ̃m í ni, wee ǹ daaɛ idem ŋa si gɛlɛɛ.

¹⁰ Cɔ, hai nnyi ǹ soɛi i jɛ inɛ ngbo si ilɛ ŋa do si bomma ŋa ku ba i tu ŋa nɔ i kɛkɛ ŋa, ku ba i bɛjɛ ŋa nɔ i kpa ŋa, ku ba i teese i ma ŋa, nɔ i lɔ ŋa.

Amaawɔi jĩi ndii amandi do ama caka iyi wa gba

¹¹ Ŋɔi Aɔ̃ Lafɛ̃ɛ í nyi í sɔ̃m má í ni, mii ì waa yɛ, Zeremi. Ŋɔi ǹ jɛaa ǹ ni, ǹ wa n yɛ amaawɔi jĩi ndii amandi.

¹² Nɔ í sɔ̃m í ni, ì yɛi dee dee. Ntɔ ntɔ, ǹ wa n wɔ njoo si idem nii, nɔ iyi ǹ fɔ, ǹ ya n cooi.

¹³ Ŋɔi Aɔ̃ Lafɛ̃ɛ í beem isɛ gbeejisia í ni, mii ì waa yɛ. Ŋɔi ǹ jɛaa ǹ ni, ǹ yɛ caka gɔ wa gba do cingaai awɔ njɛi kpãai inunu.

¹⁴ Nɔ í sɔ̃m í ni, hai do ikpa bɛi laalɔ á naa si ilɛu si inɛ ŋa fei,

¹⁵ domi wee an kpe zamaai bommai awɔ njɛi kpãai inunu ŋau wa fei. Aa naai nɔ a jilɛ kitãi bomma nŋa ŋa si anu koofai Zeruzalɛmu ŋau, a kaakoò bindiu fei, do ilui Zudaa ŋau fei.

¹⁶ An jɔ̀ ide iyi ǹ fɔ si gãmɛi inɛm ŋau fei ku ba ŋai na laalɔ ku ce nŋau, si na iyi í jɔ̀ à kɔ̀sim nɔ à waa cea iwɛ̃ ŋa kuwee do tuae, do si na iyi í jɔ̀ à ya maa sɛɛbata si wajui icɛi awɔ nŋa ŋa.

¹⁷ Awɔ Zeremi, dede i ce sɔɔlu i koo i sɔ̃ ŋa iyi an sɔ̃ɛ fei. Maà ti i ce njo si waju nŋa i maa yaya, ku ba amu takam n maà n na n jɔ̀ i maa yaya si waju nŋa.

¹⁸ Hai nnyi an jɔ̀ i yɛi bɛi ilu ku nɛ gbugbã, do bɛi sɔbei isɔ, do bɛi bindii isɔ danya si ilɛu fei, si wajui ilaalui Zudaa ŋa do akaweɛ ŋa do woo weeɛ ŋa do zamaai ilɛu.

¹⁹ Aa ce igũ do awɔ, amma a kaa kãmiaɛ, domi ǹ wɛɛ do awɔ ku ba n faabaɛ. Ide iyi amu Aɔ̃ Lafɛ̃ɛi ǹ fɔ mbɛ.