Zakari 9 - Bibeli do fee

Ilaaɔ̃ á kiiti dimi ŋa iyi à kaako ilɛi Izirɛli

¹ Ide iyi Aɔ̃ Lafɛ̃ɛ í fɔ si gãmɛi inɛi Hadaraki ŋa wee. Í ni, idɔɔkɔ̃m á na ku to si ilui Damasi, domi ijum wa kãsi inɛ fei, kù jɛ si inɛi Izirɛli ŋa aŋa akã.

² Á to si ilui Amati mɔ má, iyi í wa akonkoi Damasi, do si ilu nlai Tii do Sidɔ̃ɔ baa do iyi à nɛ bisi fei.

³ Inɛi Tii ŋa à ma bindi ku nɛ gbugbã gɔ. Nɔ à kosi isɔ fũfũ bɛi sãai acĩ do wura nkpɔ nkpɔ à singaɛ bɛ.

⁴ Amma amu Lafɛ̃ɛ an soo n nyɔɔ si tenku do amaniɛ fei, nɔ n jo iluu do ina.

⁵ Inɛi Asikalɔ̃ɔ ŋa aa yɔɔ nɔ aa wɛɛò njo, nɔ inɛi Gaza ŋa mɔ a maa yaya do njo. Bɛɛbɛ mɔi inɛi Ekorɔ̃ɔ ŋa mɔ aa wɛɛò njo, domi kpãa ku cɔ nŋa í jɛ ngbɛ. Nɔ Gaza kaa na ku nɛ ilaalu má, bɛɛbɛ mɔi Asikalɔ̃ɔ á kpɔò bomma.

⁶ Inɛ njoo ŋai aa naa a buba si ilui Asidodi. Bɛɛbɛi amu Aɔ̃ Lafɛ̃ɛ an kpa irii faau ku cei inɛi Filisi ŋa.

⁷ A kaa ya ŋɔ iŋai kuwee do njɛ ajɔ, ti amu Ilaaɔ̃i aa jɛ. Aa jɛ bɛi akãi dimii inɛi Zudaa ŋa. Inɛi Ekorɔ̃ɔ ŋa aa na a lɔ si zamaam bɛi inɛi Zebusi ŋa à ce wo.

⁸ An maa n degbe ilɛi idem ku ba mbɛɛ kãma ku maà naa siɛ igũ. Nɔ inɛ gɔ kaa naa ku kpã zamaam iju má, domi bɛbɛi si ŋai laakaim í wa.

Ilaalu iyi á naaò laakai ku sũ wa

⁹ Iŋɛ inɛi Siɔ̃ɔ ŋa i wɛɛò inɔ didɔ̃ ŋa. Nɔ iŋɛ inɛi Zeruzalɛmu ŋa, i dɔ̃ anu do inɔ didɔ̃ ŋa. I cɔ, ilaalu nŋɛ wa naa bi tu ŋɛ. Í jɛ dee dee, nɔ í jɛ woo jɛ igũ. Á naai do ara ku kaye, ku maa gũ gbankɛlɛ. Gbankɛlɛu, ama gbankɛlɛi.

¹⁰ Á jɔ̀ sarɛtii igũ ku kpa iri si ilɛi Efaraimu, nɔ baa acĩ ku ja igũ ŋa a kaa wa Zeruzalɛmu má. Á cɛ bioo ŋa iyi à ya ceò igũ. Ilaaluu á jɔ̀ laakai ku sũ ku wa si dimi ŋau, nɔ ku jɛ bomma hai si tenku ihɛ̃ ku bɔ si tenku ihɔ̃, hai ido iyi à ya kpe Efarata hee ku bɔ si kɔɔi andunya.

Kujɔ̀i inɛi piisɔ̃ɔ ŋa

¹¹ Aɔ̃ Lafɛ̃ɛ í ni má, iŋɛ inɛi Zeruzalɛmu ŋa, an nya ŋɛ si aru ku jɛ nŋɛ, iŋɛ iyi ì yɛ bɛi inɛi piisɔ̃ɔ ŋa iyi à cĩmbo si lɔgɔ hai nɛ inyi. An nya ŋɛ na akabuum iyi ǹ dĩ do iŋɛ si njɛi kuwee.

¹² Iŋɛ inɛi piisɔ̃ɔ ŋa iyi ì wɛɛ do kpãa ku cɔ ŋa, i nyi ilu nŋɛ si bɛi à teese à ma bindiɛu má. Iŋɛi ǹ wa n sɔ̃ bɛbɛi, an nya ŋɛ hai si wahala nŋɛ nɔ n ce nŋɛ jiida iyi í re zaka bɛɛbɛ ikɔ minji.

¹³ An so dimii inɛi Zudaa ŋa a jɛ bɛi biooi igũ, nɔ dimii inɛi Efaraimu ŋa mɔ a jɛ bɛi afa. Nɔ n samba inɛi Siɔ̃ɔ ŋa a koo a ce igũ do inɛi Gɛrɛsi ŋa. Nɔ aa jɛ bɛi taakubai sooge ŋa.

¹⁴ Aa yɛ amu Aɔ̃ Lafɛ̃ɛ ikpa lele, n ta afa bɛi kulai ijĩ. Nɔ n fã kuu nɔ n naa do fufui ijĩ iyi wa naa hai ikpa awɔ cangai kpãai inunu.

¹⁵ Amu Aɔ̃ Lafɛ̃ɛi lele do ilɛ, an degbe inɛm ŋa. Aa jɛ sɔnda nɔ aa tɛɛsɛ kuta iyi à ta í haata. Aa mɔ atɛ̃ vɛ̃ɛ nɔ a maa dɔ̃ anu. Atɛ̃ vɛ̃ɛu á kpɔ bɛi kukpɔi njɛi kuwee iyi í wa si jɛɛi kuwee do si antaii gontai bi kuweeu.

¹⁶ Waati bɛɛbɛ, amu Aɔ̃ Lafɛ̃ɛ an faaba ŋɛ iŋɛ inɛm ŋa bɛi woo degbe í ya faaba mɛɛmuɛ ŋa. Nɔ aa yɛ ŋai si ilɛm bɛi kuta jiida ilu bɛɛrɛ ku daana iyi à ya dasi si fulai ilaalu.

¹⁷ Ilɛu á jɛ jiida nɔ á sĩa. Sɔnda do atɛ̃ jiida á muaa awaasũ do mudɛ̃ɛ ŋa gbugbã.