Zakari 6 - Bibeli do fee

Kuyɛ mɛɛjɔsia - sarɛtii igũ mɛɛ

¹ Ŋɔi ǹ ce kuyɛ má nɔ ǹ yɛ sarɛtii igũ mɛɛ gɔ ŋa iyi acĩ ŋa à waa fa à faata wa hai si afei iri kuta minji gɔ ŋa. Iri kuta ŋau iri kutai isɔ nkpai.

² Acĩ nkpa gɔ ŋai à waa fa sarɛti sinteu. Nɔ acĩ dũdũ gɔ ŋa mɔ à waa fa minjisiau,

³ nɔ acĩ fũfũ gɔ ŋa mɔ à waa fa mɛɛtasiau, nɔ acĩ bati bati gɔ ŋa mɔ à waa fa mɛɛsiau.

⁴ Nɔ ǹ bee amaleka iyi wa bam ide ku fɔu ǹ ni, lafɛ̃ɛm, yoomai í jɛ yaasei acĩ do sarɛti ŋau.

⁵ Nɔ í jɛɛm í ni, fufu mɛɛ ŋau mbɛ. Bi Lafɛ̃ɛi andunya feii à bɔ wo, amma bɛbɛi à fita à waa nɛ.

⁶ Nɔ í ni má, acĩ dũdũ ŋau à waa fa sarɛti akãi à waa bɔò ikpa awɔ njɛi kpãai inunu, acĩ fũfũ ŋau à waa too ŋa, nɔ acĩ bati bati ŋau mɔ à waa bɔ ikpa awɔ cangai kpãai inunu.

⁷ Nɔ acĩ ku nɛ gbugbã ŋau à waa saasa a koo a kaako andunyau. Nɔ [amalekau] í sɔ̃ ŋa í ni, i koo i kaako andunyau ŋa. Bɛɛbɛi à nɔ à ce.

⁸ Nɔ amalekau í kpem í sɔ̃m í ni, cɔ inɛ ŋa iyi à waa nɛ ikpa awɔ njɛi kpãai inunuu à jɔ̀ idɔɔkɔ̃m í sũ ikpa bɛ.

À daa Zozue woo wee nlau si fulai ilaalu

⁹ Aɔ̃ Lafɛ̃ɛ í sɔ̃m má í ni,

¹⁰ koo i gba amuai Hɛlidai do Tobiya do Yedaya, inɛ ŋa iyi à baa hai ilɛi Babilɔniu wa. Nnyi, bɔ kpasɛ̃i Zoziasi, amai Sofoni i gba amua ŋau wa.

¹¹ Gba isɔ fũfũ do wura i ceò fulai ilaalu iyi aa lesi irii Zozue woo wee nla amai Yosadakiu.

¹² Nɔ i sɔ̃ Zozue i ni, Aɔ̃ Lafɛ̃ɛi lele do ilɛ í ni, inɛ gɔ wee í wɛɛ iyi à ya kpe ijui dimi ku gbɛ̃ iyi wa fita wa. Á fitai tengi bii í wau. Nŋui á ma kpasɛ̃m.

¹³ Ntɔ ntɔ nŋui á maa. Á nɛ bɛɛrɛ nɔ kú buba si batai bommaɛ ku maa gbã inɛ ŋa. Woo wee gɔ mɔ á buba si batai bommaɛ, nɔ aŋa minji fei aa maa gbã inɛ ŋa ajɔ do laakai ku sũ.

¹⁴ Si anyiɛ, nɔ i nya fulau i jilɔɔ kpasɛ̃m ku ba a maa yeò gigii amua jiida iyi Hɛlidai do Tobiya do Yedaya do amai Sofoni ŋa à ce.

¹⁵ [Nɔ Zakari í ni,] inɛ ŋa aa naa hai jĩijĩ a na a sobi inɛ ŋa si kpasɛ̃i Aɔ̃ Lafɛ̃ɛu ku ma. Waati bɛɛbɛi aa mà ŋa iyi Aɔ̃ Lafɛ̃ɛi lele do ilɛ í bɛm wa bi tu ŋɛ. Nŋu ŋau bɛ fei á ce bii ì waa jirima Aɔ̃ Lafɛ̃ɛ nŋɛ mam mam.