Zakari 5 - Bibeli do fee

Kuyɛ mɛɛfasia - tiai ikpe

¹ Nɔ ǹ ce kuyɛ má ǹ yɛ tia gɔ iyi à ká, wa fo lele.

² Nɔ amalekau í beem í ni, mii ì yɛ. Nɔ ǹ jɛaa ǹ ni, ǹ yɛ tia gɔ iyi à ká, wa fo lele bɛ, kusɔɛ í to agbãawɔ kɔnfia, kucĩɛ mɔ agbãawɔ mɛɛwa.

³ Ŋɔi í sɔ̃m í ni, idei ikpei iyi wa fangaa si ilɛ fei. Nɔ si ikpa akãi tiau à kɔ si à ni woo ce ile ŋa iyi à wa si ilɛu fei aa lele ŋa, si ikpa akã má à kɔ si à ni woo gbasi si ibo ŋa mɔ fei, aa lele ŋa.

⁴ Aɔ̃ Lafɛ̃ɛi lele do ilɛi í ni nŋu á samba ikpeu wa. Ikpeu á na ku bubai si kpasɛ̃i woo ce ile ŋa do woo gbasi do irii Aɔ̃ Lafɛ̃ɛ si ibo ŋa. Hai jĩi ndii ile nŋa do kutaɛ ŋa fei á kpa iri.

Kuyɛ mɛɛjesia - abo iyi í jɛ dulum

⁵ Amaleka iyi wa sɔ̃m ideu í ni, wu iju i cɔ mii iyi wa fitau ihɔ̃.

⁶ Nɔ ǹ beeɛ ǹ ni, mii mbɛ. Nɔ í sɔ̃m í ni, kɔlɔ mbɛ si bii dulum dii inɛi ilɛu ihɛ̃ fei í wa.

⁷ Kɔlɔu í nɛ ama ambii iyi à ce do isɔ gɔ. Waati bɛɛbɛ ama ambiiu í cĩ, nɔ ǹ yɛ inaabo gɔ wa buba inɔɛ.

⁸ Nɔ amalekau í sɔ̃m í ni, aboui í jɛ dulum. Nɔ í talesiɛ inɔ kɔlɔu í biiɛ.

⁹ Iyi ǹ wu iju lele nɔ ǹ yɛ inaabo minji gɔ ŋa. Inaabo ŋau à nɛ ikpa bɛi kungbã. À waa fo lele, fufu wa tale ŋa. Nɔ à so kɔlɔu à nɛò lele bɛ.

¹⁰ Nɔ ǹ bee amalekau ǹ ni, iwoi à waa bɔòɛ.

¹¹ Nɔ í jɛɛm í ni, ilɛi Babilɔnii. Bɛi aa maa ile do timtim bii aa lesiɛ.