Zakari 4 - Bibeli do fee

Kuyɛ miiusia - bi ku lesi fitila do jĩi ndii olivi

¹ Amaleka iyi wa bam ide ku fɔu í naa í jĩ laakaim nii bɛi à ya jĩ inɛ si iri njoo.

² Nɔ í beem í ni, mii ì waa yɛ. Nɔ ǹ jɛaa ǹ ni, ǹ yɛ bi ku lesi fitila iyi à ce do wura do bi ku dasi ikpoɛ lele. À lesi fitila mɛɛje, nɔ fitila ŋau akã fei í nɛ gɛlɛ do ikũ iyi í ya kooò ikpo.

³ Nɔ jĩi ndii olivi minji í wa kɔkɔi bi ku dasi ikpou, akã í wa awɔ njɛ, akã mɔ í wa awɔ canga.

⁴ Nɔ ǹ bee amaleka iyi wa bam ide ku fɔu ide ǹ ni, lafɛ̃ɛm, yoomai í jɛ yaasei mii ŋau bɛ fei.

⁵ Nɔ í beem í ni, i kù mà? Nɔ ǹ jɛaa ǹ ni, aawo.

⁶ Nɔ í jɛɛm í ni, ide iyi Aɔ̃ Lafɛ̃ɛi lele do ilɛ í sɔ̃ Zorobabɛli, nŋu iyi wa ma kpasɛ̃ɛ wee. Í ni, kù jɛ do yiikoi amanɛ, kù nɔ kù jɛ do gbugbãɛi aa ceò icɛɛu. Amma do saabui hundem nii.

⁷ Nɔ í fɔ má í ni, iri kuta nlau ihɛ̃i á ganji Zorobabɛli si icɛu? Aawo, á lɛgɛɛ ku munga anuɛ. Hai bɛ mɔi á ba kuta ku nɛ gbugbã iyi á jilɛò icui ileu. Waati bɛɛbɛi, inɛ ŋa aa dɔ̃ anu do inɔ didɔ̃ a maa ni, ka saabu Ilaaɔ̃.

⁸ Nɔ Aɔ̃ Lafɛ̃ɛ í sɔ̃m má í ni,

⁹ awɔi Zorobabɛlii í nyɔ icui ileu ihɛ̃, nɔ awɔɛ mɔi á na ku kpa iriɛ. Bii nŋu ŋau bɛ í na í to wa, aa mà ŋa iyi Aɔ̃ Lafɛ̃ɛi lele do ilɛi í bɛm wa bi tu ŋɛ.

¹⁰ Maà ti i donda icɛ ku sinti i maa ni, icɛu kù bɔ bii kãma titã. Á sĩa i nɛ inɔ didɔ̃ wo si waati iyi ì waa yɛ jĩnɛi icɛ si awɔi Zorobabɛli. Nɔ amalekau í sɔ̃m má í ni, fitila mɛɛje ŋa iyi ì yɛ si kuyɛɛu, à yɛi bɛi ijui Aɔ̃ Lafɛ̃ɛ iyi wa cɔ mii iyi wa ce si ilɛu ihɛ̃ fei.

¹¹ Nɔ ǹ beeɛ má ǹ ni, yoomai í jɛ yaasei jĩi ndii olivi minji ŋa iyi í wa canga do njɛi bi ku lesi fitilau.

¹² Nɔ ǹ sisi ǹ beeɛ ideu ihɛ̃ má ǹ ni, yoomai í jɛ yaasei amaawɔi jĩi ndii olivi minji ŋa iyi à wa kɔkɔi ikũi wura minji iyi wa kooò ikpo iyi í nɛ ilai wurau.

¹³ Ŋɔi í beem í ni, i kù mà? Nɔ ǹ jɛaa ǹ ni, aawo, lafɛ̃ɛm.

¹⁴ Nɔ í sisiim í ni, aŋai à jɛ amanɛ minji ŋa iyi Aɔ̃ Lafɛ̃ɛ í cica í nya ikã a cea nŋu icɛ, nŋu iyi í jɛ Lafɛ̃ɛi andunya fei.