Zakari 3 - Bibeli do fee

Kuyɛ mɛɛsia - woo wee nla

¹ Si anyiɛ ǹ ce kuyɛ má. Si kuyɛu ǹ yɛ Zozue woo wee nlau. Ǹ yɛ wa leekĩ si wajui amalekai Aɔ̃ Lafɛ̃ɛ, nɔ Seetam wa leekĩ ikpa awɔ njɛɛ, wa yɛ taaleɛ.

² Aɔ̃ Lafɛ̃ɛ í sɔ̃ Seetam í ni, awɔ woo yɛ taalei inɛ ŋai awɔ Seetam. Amu Aɔ̃ Lafɛ̃ɛ an la siɛ ntɔ ntɔ, amu iyi ǹ cica Zeruzalɛmu. Inɛi Zeruzalɛmu ŋa à yɛi bɛi sɔmbɔ iyi à nya wa hai inɔ ina.

³ Nɔ Zozue wa leekĩ si wajui amalekau wa dasi ibɔ riisi gɔ.

⁴ Nɔ amalekau í sɔ̃ inɛ ŋa iyi à waa leekĩ si wajuɛ í ni a bɔaa ibɔ riisi ŋau. Nɔ í sɔ̃ Zozue í ni, wee ǹ nya laalɔ ku jɛɛ, nɔ ǹ daɛ si ibɔi jingau.

⁵ Nɔ ǹ ni a dĩaa bɔngɔtɔbɛɛ kumaaju si iriɛ. Ŋɔi à dĩaa bɔngɔtɔbɛɛu do ibɔ sisɔ kumaaju. Waati bɛɛbɛ amalekau wa leekĩ bɛ.

⁶ Nɔ í sɔ̃ Zozue ide ŋa iyi Aɔ̃ Lafɛ̃ɛ í fɔu í ni,

⁷ ide iyi Aɔ̃ Lafɛ̃ɛi lele do ilɛ í wãu wee. Í ni, bii ì waa nɛ si kpãam ŋa, nɔ ì waa ceem icɛ dee dee, awɔi aa jɛ inɛ ngboi kpasɛ̃m, nɔ aa kiiti inɛm ŋa, nɔ n jɔ̀ i maa ceem icɛ bɛi amaleka ŋa iyi à waa toom nɔu ihɛ̃.

Aɔ̃ Lafɛ̃ɛ á jɔ̀ woo ce icɛɛ ku naa

⁸ Na nŋu, awɔ Zozue, gbɔ ideu ihɛ̃, awɔ iyi ì jɛ woo wee nla, do kpaasi woo wee ŋa iyi à waa buba si wajuɛu, iŋɛ fei i gbɔ. Iŋɛi ì jɛ nyindai mii iyi á na ku naau. An bɛ woo ce icɛm wa, nŋu iyi í yɛ bɛi ijui dimi ku gbɛ̃ iyi wa fita wa.

⁹ Nɔ ǹ jilɛ kuta gɔ si wajui Zozue. Kuta akãu í nɛ waju mɛɛje. Amu takam an kɔ ide gɔ siɛ. Nɔ an naa n nya dulum dii inɛi ilɛ ŋau ihɛ̃ ajɔ akã. Amu Aɔ̃ Lafɛ̃ɛi lele do ilɛ, amui ǹ fɔ ideu.

¹⁰ Bii ajɔu í na í to, laakai ku sũ á wɛɛ nŋɛ hee inɛ fei ku ya kpe kpaasiɛ ŋa a naa a buba a maa nya faaji si jĩjĩi jĩi ndii rezɛ̃ɛ do jĩi ndii figi ŋa.