Zakari 2 - Bibeli do fee

Kuyɛ minjisia - ngo do gbɛdɛ ŋa

¹ Ŋɔi ǹ ce kuyɛ minjisia má, nɔ ǹ yɛ ngo mɛɛ.

² Nɔ ǹ bee amaleka iyi wa bam ide ku fɔu, ǹ ni, yoomai í jɛ yaasei ngo ŋau bɛ. Nɔ í jɛɛm í ni, ngo ŋau à yɛi bɛi dimi ilu gbugbã ŋa iyi à fangaa inɛi Zudaa ŋa do inɛi Izirɛli do Zeruzalɛmu ŋa.

³ Nɔ Aɔ̃ Lafɛ̃ɛ í nyisim gbɛdɛ mɛɛ.

⁴ Nɔ ǹ bee ǹ ni, mii à naa ku ce. Nɔ í jɛɛm í ni, à naa ku kɛkɛ dimi ilu gbugbã ŋaui nɔ a jɔ̀ a ce njo. Dimi ŋau aŋai à tako à dede si inɛi Zudaa ŋa à fangaa ŋa wo.

Kuyɛ mɛɛtasia - ikũ ku wã ilɛ

⁵ Si kuyɛ mmuɛ má, ǹ yɛ inɛ gɔ wa mu ikũ ku wã ilɛ.

⁶ Nɔ ǹ beeɛ ǹ ni, iwoi ì waa bɔ. Nɔ í jɛɛm í ni, ǹ wa n bɔ Zeruzalɛmuui n koo n wã kusɔɛ do kucĩɛ.

⁷ Waati iyi amaleka iyi wa bam ide ku fɔu wa nɛ, ŋɔi amaleka mmu gɔ í naa í kòo,

⁸ nɔ í sɔ̃ɔ í ni, sɛi i koo i sɔ̃ awaasũ iyi wa mu ikũu i ni a maà ma idĩ a kaakoò Zeruzalɛmu, domi amanɛ ŋa do mɛɛmu ŋa iyi aa na a wa bɛ aa kpɔ a caa.

⁹ Nɔ Aɔ̃ Lafɛ̃ɛ í fɔ í ni, amu takam an kaakoò iluu n degbeɛ bɛi bindii ina, nɔ n nyisi amboem si aninii inɛɛ ŋa.

Aɔ̃ Lafɛ̃ɛ wa ye gigii inɛ ŋa iyi à fangaa

¹⁰ Zakari í ni, Aɔ̃ Lafɛ̃ɛ wa sɔ̃ inɛɛ ŋa í ni, i ce ńya ńya i dede i sa hai ilɛ iyi í wa ikpa awɔ njɛi kpãai inunuu, iŋɛ iyi ǹ fangaa si andunya gonta mɛɛu fei.

¹¹ Iŋɛ inɛi Zeruzalɛmu ŋa iyi ì wa si ilɛi Babilɔni, i kookaai i sa ŋa.

¹² Aɔ̃ Lafɛ̃ɛi lele do ilɛ, nŋu iyi í bɛm wa do amboe si dimi ŋa iyi à ko mii du ŋɛ ŋa, í ni má, inɛ iyi í dasi ŋɛ awɔ, ijum nii í lu.

¹³ Ijuukpãm á naa si ŋa, nɔ inɛ ŋa iyi à waa ce nŋa icɛu wo aa sinda a ko mii du ŋa ŋa. Nɔ Zakari í ni, bii ajɔu í to wa aa mà ŋa iyi Aɔ̃ Lafɛ̃ɛi lele do ilɛi í bɛm wa.

¹⁴ Nɔ Aɔ̃ Lafɛ̃ɛ í ni má, iŋɛ inɛi Zeruzalɛmu ŋa, i wɛɛò inɔ didɔ̃ i ya maa kɔ̃ iri ŋa, domi ǹ wa n naa, nɔ si inɔ nŋɛi an maa n wa.

¹⁵ [Nɔ Zakari í ni má,] ajɔ nŋu, dimi ikã ikã nkpɔ nkpɔi á na ku jɛ ti Aɔ̃ Lafɛ̃ɛ, nɔ a baa a jɛ zamaaɛ ŋa. Waati bɛɛbɛ inɔ nŋɛi á na ku wa. Bii ajɔu í to aa mà ŋa iyi Aɔ̃ Lafɛ̃ɛi lele do ilɛi í bɛm wa bi tu ŋɛ.

¹⁶ Ilɛi Zudaa á sisi ku jɛ ti Aɔ̃ Lafɛ̃ɛ má. Á jɛ ilɛ iyi í cica ku jɛ tɛɛ, nɔ Zeruzalɛmu ku jɛ ilu iyi í cica má.

¹⁷ Inɛ fei ku coko si wajui Aɔ̃ Lafɛ̃ɛ domi anu akãi á na ku fita hai bi kuwa iyi í cica í jɛ tɛɛ.