Zakari 14 - Bibeli do fee

Igũi ankãanyi do kunaai Aɔ̃ Lafɛ̃ɛ wa

¹ Iŋɛ inɛi Zeruzalɛmu ŋa, ajɔi Aɔ̃ Lafɛ̃ɛ í maai wa si bii inɛ ŋa aa ko amani nŋɛ ŋa a kpɔ̃ɔ si waju nŋɛ.

² Si ajɔ nŋu, Aɔ̃ Lafɛ̃ɛ á tɔtɔɔ dimi ŋa a koo a ce igũ si ilui Zeruzalɛmu. Aa jɛ iluu igũ, nɔ a bɛjɛ kpasɛ̃ nŋa ŋau. Aa sũò inaabo nŋa ŋa do gbugbã. Nɔ a mu inɛ bubu ŋa a koo a jɛ aru. Amma inɛ mbɔ ŋa aa gbe si iluu.

³ Si anyii nŋu, Aɔ̃ Lafɛ̃ɛ á dede si dimi ŋau bɛi í ya ce si waatii igũ ŋau.

⁴ Waati bɛɛbɛ á leekĩi si geetei Olivie iyi í wa kɔkɔi Zeruzalɛmu ikpa nunui daakɔi iluu. Nɔ ku kpalɔɛ geeteu minji hai nunui daakɔ hee ku bɔ nunui alɛ. Ikpa akã ku nɛ ikpa awɔ njɛi kpãai inunu, nɔ akã mɔ ku nɛ ikpa awɔ cangai kpãai inunu, nɔ angbɔɔ nla ku ce si afei iri kuta minjiu.

⁵ Angbɔɔu á bɔi hee Asali. Bɛi aa too i saò ŋa. Aa sa ŋai bɛi bala nŋɛ ŋa mɔ à saa kuyayai ilɛ wo, si waatii Oziasi ilaalui Zudaa. Waati bɛɛbɛi Aɔ̃ Lafɛ̃ɛm á naa do amalekaɛ ŋa fei.

⁶ Ajɔ nŋu, inya kumá kaa ce, nɔ tũtũ á ce hee inyi ku kpaasi bɛi kuta.

⁷ Ajɔ nŋu á jɛ ajɔ ikã iyi Aɔ̃ Lafɛ̃ɛ nŋu akãi í mà waatiɛ do yaaseɛ. Kaa jɛ dasã, kaa nɔ ku jɛ idũ, amma alɛ, inya kumá á ce.

⁸ Waati bɛɛbɛ inyii kuwɛɛ á maa cãi hai Zeruzalɛmu. Bubuɛ á cã ku maa bɔ ikpa nunui daakɔ si Tenku ku da Imu, bubuɛ iyi ihɔ̃ mɔ á cãi ku maa bɔ ikpa nunui alɛ si tenku iyi à ya kpe Tenku Nla. Bɛɛbɛi á maa ce ayɛ do atɛ fei.

⁹ Waati bɛɛbɛ Aɔ̃ Lafɛ̃ɛ nŋu akãi á jɛ ilaalui andunyau fei. Nŋui á jɛ Lafɛ̃ɛi inɛ fei, nɔ do irii nŋu akãi inɛ fei á ya ceò kutɔɔ.

¹⁰ Ilɛu fei á baa ku yɛi bɛi Araba. Hai Geba hee ku bɔ Rimɔɔ. Zeruzalɛmu nŋu akãi á maa wa si agbɛɛ si antaii iri kutau. Á na isɛi hai anu koofai Bɛnzamɛɛ ku bɔ anu koofa sinteu hee ku bɔ si anu koofa iyi í wa si gontau. Nɔ á na isɛi má hai bi ku degbei Hananeɛli hee ku bɔ bi ku fɔ̃ inyii rezɛ̃ɛi ilaalu.

¹¹ Inɛ ŋa aa wa si iluu má, domi inɛ gɔ kaa na ku lɛgɛɛ má. Inɛi Zeruzalɛmu ŋa aa maa wɛɛ si laakai nŋa.

¹² Dimi ŋa iyi à koo si Zeruzalɛmu igũ, mii iyi Aɔ̃ Lafɛ̃ɛ á ce nŋa wee. Ara nŋa á sãmi baa bii à wɛɛ si hunde, iju nŋa mɔ á sãmi si tokoɛ. Bɛɛbɛ mɔi amɛ nŋa á sãmi si gɛlɛ nŋa ŋa.

¹³ Waati bɛɛbɛ Aɔ̃ Lafɛ̃ɛ á dasi ŋa zigiida nla nla. Nɔ aa maa jaò njɛ, inɛ fei do kpaasiɛ.

¹⁴ Inɛi Zudaa ŋa aa ce igũ ku ba a faaba inɛi Zeruzalɛmu ŋa nɔ a gba amanii dimi mmu ŋau fei, aa ko wura do isɔ fũfũ do ibɔ nŋa ŋa nkpɔ nkpɔ.

¹⁵ Acĩ nŋa ŋa do mulee nŋa ŋa, do kpookpo nŋa ŋa do gbankɛlɛ nŋa ŋa, hee do mɛɛmu nŋa ŋa iyi à gbe fei, bɔ̃ɔ iyi í ba amanɛ ŋau nŋui á ba aŋa mɔ.

¹⁶ Waati bɛɛbɛ inɛ ŋa iyi à jɛ Zeruzalɛmu igũu, inɛ nŋa ŋa iyi à wɛɛ si hunde adɔ̃ fei aa ya naa a tɔɔ Aɔ̃ Lafɛ̃ɛi Zeruzalɛmu bɛ, nŋu iyi wa jɛ ilu gbugbã fei, nɔ a jɛ jingaui Kusu ŋa.

¹⁷ Bii dimi akã gɔ si ilɛu ihɛ̃ kù bɔ Zeruzalɛmu koo tɔɔ Aɔ̃ Lafɛ̃ɛ ilu gbugbã fei, ijĩ kaa wɔ si ilɛi ideɛ.

¹⁸ Baa inɛi Ezibiti ŋa bii à kɔ̀ ku bɔ Zeruzalɛmuu a koo a jɛ jingaui Kusu ŋa, ijĩ kaa wɔ si ilɛi ide nŋa. Aɔ̃ Lafɛ̃ɛ á ce nŋai bɛi á cea dimi mmu ŋa iyi a kù koo jingauu ku jɛ.

¹⁹ Si bɛɛbɛ inɛi Ezibiti ŋa do dimi ŋa iyi a kù koo jingauu ku jɛ fei, aa ba ijuukpãi.

²⁰ Waati bɛɛbɛ baa si londii acĩ ŋa aa kɔɔ a ni, ti Aɔ̃ Lafɛ̃ɛi. Hee do caka ŋa iyi à wa kpasɛ̃i Aɔ̃ Lafɛ̃ɛ fei aa mái sãa sãa bɛi jɛɛ ŋa si bii à ya dasi njɛ à fãsi bi kuweeu.

²¹ Caka ŋa iyi à wa Zeruzalɛmu do Zudaa fei ti Aɔ̃ Lafɛ̃ɛi lele do ilɛi aa jɛ. Inɛ ŋa iyi aa naa kuwee ku ce aa ya so caka ŋaui a tɛkɛò iŋai kuwee nŋa. Bii waati nŋu í to wa, woo nya sĩa ŋa a kaa wa inɔ kpasɛ̃i Aɔ̃ Lafɛ̃ɛ a maa ta iwo má.