Zakari 13 - Bibeli do fee

¹ Ajɔ nŋu, isɔ̃ gɔ á sɔ̃ inyi nɔ ku wɔ dulum do riisii kpasɛ̃i Davidi do inɛi Zeruzalɛmu ŋa fei.

Aɔ̃ Lafɛ̃ɛi á kpa irii iwɛ̃ do walii ilu ibo ŋau

² Aɔ̃ Lafɛ̃ɛi lele do ilɛ í ni, an nya iwɛ̃ ŋau hai si ilɛu nɔ inɛ gɔ kaa ye gigi nŋa má hee a maà kpe iri nŋa. An nya walii ilu ibo ŋau mɔ nɔ n nya lasabu sãmi hai si idɔ nŋa.

³ Si anyiɛ nɔ inɛ gɔ í na wa ce walii si ibo, baa iyeò baaɛ ŋa aa sɔ̃ɔ a ni, aa ku mbɛ, domi ì waa sɔ ibo do irii Aɔ̃ Lafɛ̃ɛ. Nɔ iyeò baaɛ ŋa iyi à búu, bii í na wa ce waliiu, aŋai aa gũu taakuba a kpaa.

⁴ Ajɔ nŋu, anyɔ á mu walii ilu ibo ŋau fei akã akã na kuyɛ nŋa ŋa. Njo kaa jɔ̀ ŋa a maa dasi ibɔ ilu ntoi walii ŋau má a maa dĩò ijui inɛ ŋa.

⁵ Aŋa fei aa fɔ a ni, n kù jɛ walii, amu woo logooi. Icɛm nii hai keekem.

⁶ Nɔ bii inɛ gɔ í beeɛ í ni, dala yoomai í wa si gɛndɛɛ bɛ, á jɛaa ku ni hai bi kpaasi ŋai nŋu í baa.

Aa mà iyi Aɔ̃ Lafɛ̃ɛ nŋui í jɛ Ilaaɔ̃

⁷ Aɔ̃ Lafɛ̃ɛi lele do ilɛ í ni, taakuba, cuku si woo degbe inɛm ŋa, nŋu iyi ǹ jɔ̀ í jɛ minjisiam. Kpa woo degbeu nɔ angudã ŋau a fangaa bii fei, nɔ n cuku si iyi a kù nɛ gbugbã ŋau mɔ.

⁸ Nɔ í ni má, si ilɛu fei, bii à kpɛ̃ kukpɔi amanɛ ŋa ikɔ mɛɛta ikɔ minjii á ku, ku jɔ̀ ikɔ akã.

⁹ Ikɔ akã iyi í gbeu an dasi ŋa ina n yɔɔ bɛi à ya yɔ isɔ fũfũ do wura si ina a nya jiidaɛ. Amui aa ya tɔɔ nɔ an ya n gbɔ kutɔɔ nŋa. An kpe ŋa zamaam nɔ aŋa mɔ aa ni, Aɔ̃ Lafɛ̃ɛi í jɛ Lafɛ̃ɛ nwa.