Zakari 11 - Bibeli do fee

Aɔ̃ Lafɛ̃ɛ á kiiti woo degbe inɛɛ ŋa

¹ Iŋɛ inɛi ilɛi Libãa ŋa i ce sɔɔlui kiiti nŋɛ, domi Aɔ̃ Lafɛ̃ɛ á jɔ̀ ina kú jo jĩi jiida nŋɛ ŋa iyi à ya kpe sɛɛdi.

² Awɔ jĩi iyi à ya kpe sipɛrɛɛsi, kpata, domi jĩi ndii sɛɛdi í cuku. Nɔ jĩi nla kusĩa ŋau fei à kpa iri. Awɔ jĩi ndii sɛni iyi ì wa ilɛi Basãa, kpata, domi agbo nla iyi ci ya jɛ kú lɔu, à kɛkɛ fei ndɛɛ.

³ À ya ka maa gbɔ anu ku dɔ̃i woo degbe zamaa ŋau, domi jirima nŋa fei í tã. Anu ku dɔ̃i muusu nla ŋai à ya ka maa gbɔ, domi agbo nla jiida iyi í wa itĩi idoi Zuudɛ̃ɛ fei í kpa iri.

Woo degbe jiida do woo degbe laalɔ ŋa

⁴ Ajɔ nŋu gɔ, Aɔ̃ Lafɛ̃ɛm í sɔ̃m í ni n gbã inɛi nŋu ŋa, aŋa iyi à yɛ bɛi angudã ŋa iyi à waa bɔò bi ku kpa mɛɛmu ŋa.

⁵ Inɛ ŋa iyi à ra ŋa à ya koo à saka ŋai nɔ a ci ya yɛ taalei ara nŋa. Inɛ ŋa mɔ iyi à ta ŋa à ya maa nii, ka saabu Aɔ̃ Lafɛ̃ɛ, domi à ba riba nla nla. Woo degbe nŋa ŋa taka nŋa a kù nɛ baa araare.

⁶ Amu Aɔ̃ Lafɛ̃ɛ n kaa n nɛ araarei inɛi ilɛ ŋau ihɛ̃ má. An fũsi ŋa awɔi n jɔ̀ ŋa aŋa duusɔ̃ɔ nɔ n so ŋa n daa ilaalu nŋa ŋa si awɔ. Ilaalu ŋau aa naa a kpa ilɛu nɔ n kaa n nya inɛ gɔ hai si awɔ nŋa.

⁷ Ŋɔi ǹ lɔsi ku gbã inɛ ŋa iyi à yɛ bɛi angudã ŋa iyi à gbã ŋa à waa bɔò bi ku kpa mɛɛmu ŋa. Iyi í re mɔm, aŋa iyi inɔ kufɔ nŋa í re ti kpaasi ŋa. Goloi degbe minjii ǹ nɛ, ǹ kpe akã Kurɔ, akã mɔ Gɛlɛ Akã, nɔ n maa n cɔ baanii angudã ŋau.

⁸ Si cukpa akã ǹ lele woo degbe mɛɛta ŋau fei. Nɔ amu takam ǹ wa n degbe angudã ŋau, amma kuce nŋa í jɔ̀ ǹ mɔngɔ temua. Nɔ aŋa taka nŋa à cém.

⁹ Nɔ ǹ sɔ̃ ŋa ǹ ni, n kaa n degbe ŋɛ má. Inɛ ŋa iyi aa ku a ku. Inɛ ŋa iyi aa kpa a kpa ŋa. Nɔ inɛ ŋa iyi à gbe a maa kpã njɛ iju.

¹⁰ Nɔ ǹ so golo iyi ǹ kpe Kurɔu ǹ cɔɔ ǹ nyisiò iyi Aɔ̃ Lafɛ̃ɛ í kpa irii akabuu iyi í tako í dĩ wo do inɛ ŋau fei.

¹¹ Bɛɛbɛi, akabuuu í kpa iri ajɔ nŋu, nɔ angudã ŋa iyi inɔ kufɔ nŋa í re ti kpaasi ŋau, à waa cɔm, à mà iyi idei Aɔ̃ Lafɛ̃ɛ mbɛ.

¹² Nɔ ǹ sɔ̃ ŋa ǹ ni, bii ì bi ŋa, i sãam fiai icɛm. Bii i kù bi ŋa mɔ, baam kù wa si. Nɔ à ka sikilii isɔ fũfũ ara kuntaa à nam kú jɛ fiam.

¹³ Nɔ Aɔ̃ Lafɛ̃ɛ í sɔ̃m í ni, à ni n kù re bɛɛbɛ. So fia keekeu i sɔa woo ce cakau. Nɔ ǹ so isɔ fũfũ kpɛkɛlɛ kuntaau ǹ sɔa woo ce cakau si kpasɛ̃i Aɔ̃ Lafɛ̃ɛ.

¹⁴ Nɔ ǹ cɛ golo minjisia iyi ǹ kpe Gɛlɛ Akãu ǹ nyisiò iyi anu akã iyi í wa si gãmɛi inɛi Zudaa ŋa do inɛi Izirɛli ŋa í kpa iri.

¹⁵ Nɔ Aɔ̃ Lafɛ̃ɛ í sɔ̃m má í ni n ce aram bɛi woo degbe iyi í ce nnyɛi,

¹⁶ domi nŋu á jɔ̀ woo degbe gɔ ku naa si ilɛu. Woo degbeu kaa gbɔa angudã ŋa iyi à waa bɔ ku ku. Kaa bɔ ama angudã ŋa iyi à nyɔu ku dɛdɛ. Baaɛ kaa wa si do inɛ ŋa iyi à mɛɛ, nɔ kaa cɔ ilu baani ŋa mɔ. Amma iyi à nɛ ikpo ŋau, á ya maa ŋɔ ŋai hee do kɔwei kɔbisi nŋa ŋau fei.

¹⁷ Inɔ kufɔi á jɛ ti woo degbe iyi í ce nnyɛi, iyi í ya fũsi angudã ŋa awɔ. Taakuba á mɛɛ ikpaɛ do iju njɛɛ. Nɔ ikpaɛu ku gbɛ mam mam, nɔ ijuɛu mɔ ku ku.