Zakari 1 - Bibeli do fee

Aɔ̃ Lafɛ̃ɛ í kpe inɛi Izirɛli ŋa

¹ Si adɔ̃ minjisiai bomma ku jɛi Dariusi, si cukpa mɛɛjɔsiau, Aɔ̃ Lafɛ̃ɛ í ba Zakari waliiɛ ide ku fɔ, nŋu iyi í jɛ amai Berekia, tɔkui Ido.

² Í sɔ̃ɔ í ni, amu Aɔ̃ Lafɛ̃ɛ, ǹ wɛɛò idɔɔkɔ̃ ntɔ ntɔ do bala nŋɛ ŋa.

³ Na nŋu, sɔ̃ inɛ ŋau i ni, amu Aɔ̃ Lafɛ̃ɛi lele do ilɛ, ǹ sɔ̃ ŋɛ ǹ ni i nyi wa sim má ŋa, amu mɔ an nyi wa si ŋɛ.

⁴ Ǹ wa n tɔɔ ŋɛ, i maà ti i sisi bala nŋɛ ŋa. Hai kukpɛi waliim ŋa à sɔ̃ ŋa idem, à ni a jɔ̀ kuwɛɛ laalɔ do kookoosu laalɔ nŋa ŋa iyi à waa ceu, amma a kù bi ku gbɔ mɔm hee a jirimam.

⁵ Hee iwoi bala nŋɛ ŋau à wa nsɛi. Walii ŋau mɔ à wɛɛ baa nsɛi? Aawo, aŋa fei à ku.

⁶ Do nŋu fei, idem ŋa do wooda ŋa iyi ǹ sɔ̃ walii woo ce icɛm ŋa a sɔ̃ ŋa à to si ŋa nɔ à ce si ŋa icɛ. À jɔ à kpaasi idɔ à mà iyi kuce laalɔ nŋa í to amu Aɔ̃ Lafɛ̃ɛi lele do ilɛ ǹ jɔ̀ ijuukpã ku naa si ŋa bɛi ǹ tako ǹ sɔ̃ ŋau.

Kuyɛ sinte - acĩ ŋa

⁷ Si adɔ̃ minjisiai bomma ku jɛi Dariusi, si cukpa iyi à ya kpe Seba, cukpa maatakãsiau, si ajɔ kɔnfia do mɛɛsiaɛ, Aɔ̃ Lafɛ̃ɛ í ba Zakari waliiɛ ide ku fɔ si kuyɛ, nŋu iyi í jɛ amai Berekia, tɔkui Ido. Ide iyi í yɛ wee.

⁸ Í ni, idũ ajɔ nŋu ǹ ce kuyɛ. Ǹ yɛ masa gɔ wa gũ acĩ nkpa wa leekĩ si lɔɔma gɔ si inɔ jĩi ndii miitu ŋa. Nɔ acĩ gɔ ŋa mɔ à waa leekĩ do anyiɛ. Acĩ nkpa ŋa, do nkpa nkpa ŋa do fũfũ ŋa.

⁹ Nɔ ǹ bee ǹ ni, lafɛ̃ɛm, yoomai í jɛ yaasei acĩ ŋau bɛ. Ŋɔi amaleka iyi wa bam ide ku fɔu í jɛɛm í ni, an sisiɛ yaaseɛ.

¹⁰ Inɛ iyi wa leekĩ si aninii miitu ŋau í sɔ̃m í ni, Aɔ̃ Lafɛ̃ɛi í bɛ ŋa wa a naa a kaako andunya.

¹¹ Nɔ masa ŋau à sisia amalekai Aɔ̃ Lafɛ̃ɛ iyi wa leekĩ si aninii miitu ŋau ide nŋa. À ni aŋa à kaako andunya fei tã, ilɛu fei í cokoi kilim, inɛ ŋa à wasi ku sĩmi.

¹² Ŋɔi amalekau í sɔ̃ɔ í ni, Aɔ̃ Lafɛ̃ɛi lele do ilɛ, adɔ̃ kitaò fɛɛwai ihɛ̃ iyi idɔɛ í kɔ̃ò inɛi Zeruzalɛmu ŋa, do ilu fiti mbɔ iyi í wa ilɛi Zudaa. Hee waati yoomai aa naa i ce araare nŋa má ya.

¹³ Nɔ Aɔ̃ Lafɛ̃ɛ í jɛa amalekau do ide didɔ̃ iyi í tũ idɔɛ.

Aɔ̃ Lafɛ̃ɛ á sisi ku cica Zeruzalɛmu má

¹⁴ Amaleka iyi wa bam ide ku fɔ nŋui í sɔ̃m í ni n sɔ̃ inɛ ŋa ideu ihɛ̃. Aɔ̃ Lafɛ̃ɛi lele do ilɛ í ni, ǹ nɛ kubii inɛi Zeruzalɛmu ŋa jiida jiida do inɛi Siɔ̃ɔ ŋa, nɔ kubi nŋau wa mum ntɔ ntɔ.

¹⁵ Amma ǹ wɛɛ do idɔɔkɔ̃ jiida si dimi ŋa iyi à waa tɔɔ fufu si ŋa. Tako wo idɔɔkɔ̃m kù la si inɛi Izirɛli ŋa, amma aŋai à kɔ̃ɔsi ijuukpã nŋa à kpa iluu.

¹⁶ Ŋɔi í jɔ̀ ǹ wa n sɔ̃ ŋɛ, amu Aɔ̃ Lafɛ̃ɛi lele do ilɛ, an nyi wa Zeruzalɛmu bɛ má nɔ n nyisi inɛɛ ŋa jiida ku jɛm. Aa nyi a ma ile bi kutɔɔm, nɔ a ma iluu má.

¹⁷ Amu Aɔ̃ Lafɛ̃ɛi lele do ilɛ ǹ ni, ilum ŋau aa kɔ̃ do amani nkpɔ nkpɔ má. An sisi n cica Zeruzalɛmu má, nɔ n naa n tũ idɔi inɛi Siɔ̃ɔ ŋa.