Zãa 3, 1 - Bibeli do fee

Fɔɔ

¹ Amu inɛ ngboi igbɛi inɛi Jesu ŋa, ǹ ceɛ fɔɔ Gayusi, awɔ iyi ǹ bi jiida si kpãai ntɔ.

² Awɔ baakɔɔm, ǹ wa n tɔɔ fei ndɛɛ ku maa nɛɛ dee dee, nɔ araɛ ku maa nɛ baani si bɛi hundeɛ í yɛ.

³ Inɔm í dɔ̃ ntɔ ntɔ si waati iyi kpaasi woo dasi Jesu naanɛ gɔ ŋa à naa nɔ à jɛ sɛɛda si bɛi ntɔ í wa siɛ do si bɛi ì waa nɛ si ntɔu.

⁴ N kù nɛ inɔ didɔ̃ gɔ iyi í la í re iyi ǹ gbɔ à ni amam ŋa à waa nɛ si kpãai ntɔ.

Gayusi ilu naanɛ

⁵ Awɔ baakɔɔm, ì jɛ ilu naanɛ si mii ŋa iyi ì waa cea kpaasi woo dasi Jesu naanɛ ŋa hee do kpaasi woo dasi naanɛ inɛ njoo ŋau fei.

⁶ Inɛ ŋau fei à waa jɛ sɛɛdai kubiɛ si wajui igbɛi inɛi Jesu ŋa. Ce nŋa kosĩa si isɛɛnɛ nŋau si bɛi í sĩa inɛi Ilaaɔ̃ ku ce,

⁷ domi na irii Jesu Kirisii à waa ce isɛɛnɛu, a kù nɔ a kù gba nkãma bi hai dasi naanɛ ŋa.

⁸ Na nŋu, í sĩa ka sobi amanɛ dimi bɛɛbɛ ŋa, ku ba awa taka nwa ka nɛ ikpɛ̃ awaò ŋa si icɛi ntɔu ku sisiɛ.

Diotɛɛfu do Demɛtiusi

⁹ Ǹ kɔa inɛi igbɛi Jesu ŋa tia keeke gɔ, amma Diotɛɛfu, nŋu iyi í bi ku jɛ woo cua nŋa, kù jɛsi idem.

¹⁰ Na nŋu, bii ǹ naa, an fɔ daa ŋa iyi í nɛ, do bɛi wa má wa ide laalɔ. Kù jɛ baa iyi bɛ nŋu akã, ci ya gba inɛ njoo woo dasi naanɛ ŋa. Bii inɛ gɔ ŋa à bi à gba ŋa mɔm í ya kɔ̀i, nɔ ku lele ŋa hai si igbɛi inɛi Jesu ŋa.

¹¹ Awɔ baakɔɔm, maà too kuce laalɔ, í gbe kuce jiida. Inɛ iyi wa ce jiida, ti Ilaaɔ̃i, amma inɛ iyi wa ce laalɔ kù mà Ilaaɔ̃.

¹² Inɛ fei, hee do ntɔ takaɛ fei à waa jɛ sɛɛdai jiida ku jɛi Demɛtiusi. Nɔ awa taka nwa mɔ à waa jɛ sɛɛdai jiida ku jɛɛu, ì nɔ ì mà iyi sɛɛda nwa í jɛ ntɔ.

Fɔɔi ankãanyi

¹³ Ǹ nɛ mii nkpɔ ku sɔ̃ɛ, amma n kù bi n kɔ fei ndɛɛ si tia.

¹⁴ Ǹ wa n bi ka yɛ njɛ bii í ce ajɔ minji ka fɔ ide gɛlɛò gɛlɛ.

¹⁵ Laakai ku sũ ku wɛɛ do awɔ. Kpaasiɛ ŋa fei à ceɛ fɔɔ. Nɔ i ce kpaasi nwa ŋau fei fɔɔ akã akã.