Zãa 2, 1 - Bibeli do fee

Fɔɔ

¹ Amu inɛ ngboi igbɛi inɛi Jesu ŋa, ǹ ceɛ fɔɔ, awɔ abo iyi Ilaaɔ̃ í cica. Nɔ ǹ ce amaɛ ŋa mɔ fɔɔ, aŋa iyi ǹ bi si kpãai ntɔu. Nɔ kù jɛ amu akãi ǹ bi ŋa, amma hee do inɛ ŋa iyi à mà ntɔu fei à bi ŋai.

² À bi ŋai si na iyi í jɔ̀ ntɔu í wa si idɔ nwa, á nɔ ku maa wɛɛi do awa do ajɔ fei.

³ Ilaaɔ̃ Baaba do Jesu Kirisi Amaɛ a mu nwa didɔ̃ do laakai ku sũ nɔ a ce araare nwa ku ba ka wɛɛ do ntɔ do si kubi.

Ntɔ do kubi

⁴ Ǹ nɛ inɔ didɔ̃ ntɔ ntɔ do iyi ǹ gbɔ amaɛ gɔ ŋa à waa nɛ si kpãai ntɔ, si bɛi Ilaaɔ̃ Baaba í jilɛ nwa.

⁵ Nsɛi abooyi, ide iyi ǹ wa n kɔɛ wau ihɛ̃ kù jɛ wooda titɔ̃, amma iyi à nɛ hai sintei. Ǹ wa n tɔɔɛi, ka nɛ kubii njɛ awa duusɔ̃ɔ ŋa.

⁶ Kubii í jɛ woodai Ilaaɔ̃ ŋa ku jirima. Nŋui í jɛ wooda iyi ì gbɔ hai sinteɛ ŋa, si nŋui ì nɛ i maa nɛ ŋa.

⁷ Woo wa inyii itĩ nkpɔi í fangaa si andunya, inɛ ŋa iyi a kù jɛsi iyi Jesu Kirisi í baa í jɛ amanɛ. Inɛ iyi wa ce bɛɛbɛ, woo wa inyii itĩi inɛi do mbɛɛi Kirisi.

⁸ Na nŋu, i ce laakai ŋa i maà ti i nyɔ ribai icɛ nwa ŋa, i jɔ̀ i jɛ baakaɛ ŋa.

⁹ Inɛ iyi kù leekĩ si kukɔsii Kirisi, nɔ í kɔ̃ɔsi tɛɛ, kù nɛ Ilaaɔ̃. Amma inɛ iyi wa leekĩ si, í nɛ Baaba do Ama.

¹⁰ Bii inɛ gɔ í naa bi tu ŋɛ, nɔ kù jɛ do kukɔsiu ihɛ̃, i maà gba lafɛ̃ɛ, nɔ i maà coo cenkã,

¹¹ domi inɛ iyi í coo cenkã, í nɛ ikpɛ̃ si kuce laalɔɛu bɛi.

Idei ankãanyi

¹² Ǹ nɛ mii nkpɔ ku sɔ̃ ŋɛ, amma n kù bi n kɔ fei ndɛɛ si tia. Ǹ bi n naa n yɛ ŋɛi awaɛ ŋa ka fɔ ide gɛlɛò gɛlɛ, ku ba inɔ didɔ̃ nwa ku kɔ̃.

¹³ Ifɔɛ iyi Ilaaɔ̃ í cicau, amaɛ ŋa à ceɛ fɔɔ wa.