Zãa 1, 5 - Bibeli do fee

Andunya ku kãmia

¹ Inɛ iyi í dasi naanɛ iyi Jesui í jɛ Kirisi, lafɛ̃ɛ amai Ilaaɔ̃i, nɔ inɛ iyi í bi Baa í bi amai Baa ŋau mɔi.

² Bii à bi Ilaaɔ̃ nɔ à waa jirima woodaɛ ŋa, nŋui á jɔ̀ ka mà iyi à bi amai Ilaaɔ̃ ŋa mɔ.

³ Ilaaɔ̃ ku bii í jɛ woodaɛ ŋa ku jirima. Woodaɛ ŋau a kù nɔ a kù gaabu.

⁴ Ntɔ ntɔ, amai Ilaaɔ̃ baa yooma fei í ya kãmia andunyai. Naanɛ ku dasi nwai á jɔ̀ ka kãmiaò andunya.

⁵ Yooi í kãmia andunya bii kù jɛ inɛ iyi í dasi naanɛ iyi Jesu í jɛ Amai Ilaaɔ̃.

Sɛɛda iyi à jɛa Jesu Kirisi*

⁶ Jesu Kirisii í jɛ inɛ iyi í naa do inyi do njɛ. Kù naa do inyi nŋu akã, amma do njɛi ajɔ. Hundei Ilaaɔ̃ takaɛ wa jɛ sɛɛdaɛ, domi Hundeui í jɛ ntɔ.

⁷ Woo jɛ sɛɛda ŋau aŋa mɛɛtai à wɛɛ.

⁸ Aŋa wee. Hundei Ilaaɔ̃, do inyi, do njɛ. Aŋa mɛɛta ŋau à ce anu akã.

⁹ Awa, à ya ka jɛsi sɛɛdai amanɛ ŋa, amma sɛɛdai Ilaaɔ̃ í la í re bɛɛbɛ, nɔ nŋu mɔi í jɛ sɛɛda iyi í jɛa Amaɛ.

¹⁰ Inɛ iyi í dasi Amai Ilaaɔ̃ naanɛ, í nɛ sɛɛdau si idɔɛ. Inɛ iyi kù dasi naanɛ, í ce Ilaaɔ̃ ilu iboi, domi kù jɛsi sɛɛda iyi Ilaaɔ̃ í jɛa Amaɛ.

¹¹ Sɛɛdau wee. Ilaaɔ̃ í mu nwa kuwɛɛ hai tã. Kuwɛɛu, í wa si Amaɛ.

¹² Inɛ iyi í nɛ Amai Ilaaɔ̃, í nɛ kuwɛɛ. Inɛ iyi kù nɛ Amau kù nɛ kuwɛɛu.

Kuwɛɛ hai tã

¹³ Ǹ kɔ nŋɛ iyi ihɛ̃ wai, iŋɛ iyi ì dasi Amai Ilaaɔ̃ naanɛ, ku ba i mà iyi ì nɛ kuwɛɛ hai tã ŋa.

¹⁴ À nɔ à nɛ naanɛ iyi bii à tɔɔɛ ngɔgɔ iyi í jɛ ti idɔɔbiɛ, á gbɔ nwa.

¹⁵ Nɔ si bɛi à mà iyi wa gbɔ kutɔɔ nwa, à mà kãm kãm iyi mii iyi à tɔɔɛ fei, tu wai tã.

¹⁶ Bii inɛ gɔ í yɛ kpaasiɛ wa ce dulum iyi kù jɛ ti iku, kú ce kutɔɔ nɔ Ilaaɔ̃ á muaa kuwɛɛ. Amma dulum gɔ í wɛɛ iyi í ya bí iku. N kù ni inɛ gɔ ku ce kutɔɔ na nŋu.

¹⁷ Iyi kù jɛ dee dee fei dulum nii, amma kù jɛ fei ndɛɛi í jɛ ti iku.

¹⁸ À mà inɛ iyi í jɛ amai Ilaaɔ̃ fei ci ya ce dulum ku maa mɔsi, domi Amai Ilaaɔ̃ wa degbeɛ, nɔ Seetam, inɛ laalɔu, kaa yɔkɔ ku ceaa ngɔgɔ.

¹⁹ À mà iyi à jɛ amai Ilaaɔ̃ ŋa, nɔ andunyau fei í wa si gbugbãi inɛ laalɔu.

²⁰ À nɔ à mà iyi Amai Ilaaɔ̃ í naa, nɔ í mu nwa bisi ka mà Ilaaɔ̃ ilu ntɔu. Nɔ à wɛɛ do ilu ntɔu do saabui Amaɛ Jesu Kirisi. Jesu Kirisiui í jɛ Ilaaɔ̃ ilu ntɔ, nɔ í jɛ kuwɛɛ hai tã.

²¹ Iŋɛ amam ŋa, i fɛò iwɛ̃ ku tɔɔ ŋa.