Zãa 1, 4 - Bibeli do fee

Hundei Ilaaɔ̃ do hundei mbɛɛ

¹ Iŋɛ baakɔɔm ŋa, i maà ya naanɛ inɛ ŋa iyi à ya ni aŋa à nɛ Hundei Ilaaɔ̃ fei, amma i cɔ yaase nŋa mà à jɛ ti Ilaaɔ̃ ntɔ ntɔ, domi walii ilu ibo ŋa à waa kɔ̃i si andunyau ihɛ̃.

² Yaase bɛi aa yɔkɔ i mà inɛ ŋa iyi à nɛ Hundei Ilaaɔ̃ ŋa wee. Inɛ iyi í jɛsi iyi Jesu Kirisi í baa í jɛ amanɛ do ntɔ fei, lafɛ̃ɛi í jɛ ti Ilaaɔ̃.

³ Inɛ iyi kù jɛsi iyi Jesu í baa í jɛ amanɛ do ntɔ, lafɛ̃ɛ kù jɛ ti Ilaaɔ̃, ti mbɛɛi Kirisii. Mbɛɛi Kirisiui ì gbɔ à ni wa naau ŋa, wee í to wa si andunya tã mɔm.

⁴ Iŋɛ amam ŋa, ì jɛ ti Ilaaɔ̃ ŋa, ì nɔ ì kãmia walii ilu ibo ŋau tã ŋa, domi inɛ iyi í wa si ŋɛ í nɛ gbugbã í re inɛ iyi í wa si andunyau.

⁵ Inɛ nŋu ŋa ti andunyai à jɛ, ŋɔi í jɔ̀ à waa fɔ ide do bisii andunya, nɔ inɛi andunya ŋa à waa gbɔ ide nŋa.

⁶ Amma awa ti Ilaaɔ̃i à jɛ. Inɛ iyi í mà Ilaaɔ̃ fei í ya gbɔ ide nwai, amma inɛ iyi kù jɛ ti Ilaaɔ̃ ci ya gbɔ ide nwa. Si bɛɛbɛi aa ka yɔkɔ ka wũa ntɔ do ibo.

Ilaaɔ̃i í jɛ kubi

⁷ Iŋɛ baakɔɔm ŋa, i jɔ̀ ka bi njɛ, domi kubi wa naai hai bi Ilaaɔ̃. Inɛ iyi í nɛ kubi, lafɛ̃ɛ amai Ilaaɔ̃i, í nɔ í mà Ilaaɔ̃.

⁸ Inɛ iyi kù nɛ kubi, lafɛ̃ɛ kù mà Ilaaɔ̃, domi Ilaaɔ̃i í jɛ kubi.

⁹ I cɔ bɛi Ilaaɔ̃ í nyisi wa kubiɛ. Í bɛ Ama akãɛ wa si andunya ku ba ka ba kuwɛɛ na iriɛ.

¹⁰ Kù jɛ awai à tako à bi Ilaaɔ̃ amma nŋui í bi wa, nɔ í bɛ Amaɛ wa ku ba ku jɛ kuwee iyi á kpa dulum du wa.

¹¹ Iŋɛ baakɔɔm ŋa, bii bɛɛbɛi Ilaaɔ̃ í bi wa, í sĩa awa mɔ ka bi njɛ.

¹² Inɛ gɔ kù yɛ Ilaaɔ̃ ajɔ gɔ, amma bii à bi njɛ, Ilaaɔ̃ í wa si wa, nɔ kubiɛ á kɔ̃ si idɔ nwa.

¹³ À mà iyi à wa siɛ nɔ nŋu takaɛ í wa si wa, si na iyi í jɔ̀ í mu nwa Hundeɛ.

¹⁴ Awa mɔ à yɛ iyi Ilaaɔ̃ Baaba í bɛ Amaɛ wa ku jɛ woo faabai inɛi andunya ŋa, à nɔ à waa jɛ sɛɛdaɛ.

¹⁵ Inɛ iyi í jɛsi iyi Jesu í jɛ Amai Ilaaɔ̃, Ilaaɔ̃ í wa siɛ, nɔ lafɛ̃ɛ mɔ í wa si Ilaaɔ̃.

¹⁶ Nɔ awa à mà kubi iyi Ilaaɔ̃ í bi wa, nɔ à dasi kubiu naanɛ. Ilaaɔ̃i í jɛ kubi. Inɛ iyi í nɛ kubi í wa si Ilaaɔ̃i, nɔ Ilaaɔ̃ mɔ í wa siɛ.

¹⁷ Bɛɛbɛi kubiɛ í kɔ̃ si idɔ nwa, ku ba ka nɛ laakai ku sũ si ajɔi kiitiu, domi si bɛi Kirisi í yɛ, bɛɛbɛ mɔi awa mɔ à yɛ si andunyau.

¹⁸ Njo kù wa si kubi, amma kubi iyi í kɔ̃ í ya lele njoi. Na nŋu, inɛ iyi í nɛ njo, kubi ci ya kɔ̃ siɛ domi njoi ijuukpãi wa ce.

¹⁹ Awa à nɛ kubi domi Ilaaɔ̃ í tako í bi wa.

²⁰ Bii inɛ gɔ í ni nŋu í bi Ilaaɔ̃ nɔ í cé kpaasiɛ, ilu iboi, domi inɛ iyi kù bi kpaasiɛ iyi wa yɛ, kaa yɔkɔ ku bi Ilaaɔ̃ iyi kù waa yɛ.

²¹ Kirisi í na wa woodau ihɛ̃ í ni, inɛ iyi í bi Ilaaɔ̃, lafɛ̃ɛ í nɛ ku bi kpaasiɛ mɔ.