Zãa 1, 3 - Bibeli do fee

Amai Ilaaɔ̃ ŋa

¹ I cɔ kubi nla nla iyi Ilaaɔ̃ Baaba í bi wa, hee à waa kpe wa amaɛ ŋa. Nɔ ntɔi bɛɛbɛi à jɛ. Ŋɔi í jɔ̀ inɛi andunya ŋa a kù mà wa domi a kù mà Ilaaɔ̃ mɔm wo.

² Iŋɛ baakɔɔm ŋa, si nsɛi à jɛ amai Ilaaɔ̃ ŋa, amma a kù mà bɛirei aa ka na ka yɛ ala. Do nŋu fei, à mà waati iyi Kirisi á na ku faata wa aa ka jɔɔ, domi aa ka yɔɔ bɛi í yɛ.

³ Inɛ iyi wa cɔ kpãai ideu ihɛ̃ fei, wa ce kookaai ku ba ku maaju bɛi Kirisi mɔ í maaju.

⁴ Inɛ mɔ iyi wa ce dulum fei, wa kua woodai Ilaaɔ̃i, domi dulum wooda ku kuai.

⁵ Ì mà ŋa iyi Jesu, nŋu iyi kù ce dulum, í naai ku nya dulum dii amanɛ ŋa.

⁶ Na nŋu, inɛ iyi í wɛɛ do nŋu fei ci ya maa mɔsi dulum ku ce. Amma inɛ iyi wa ce dulum, lafɛ̃ɛ kù yɔɔ, kù nɔ kù màa.

⁷ Iŋɛ amam ŋa, i maà ti i jɔ̀ inɛ gɔ ku dĩ iju nŋɛ. Inɛ iyi wa ce mii iyi í jɛ dee dee, inɛ dee deei, si bɛi Jesu takaɛ í yɛ.

⁸ Inɛ iyi í ya maa mɔsi dulum ku ce, inɛi Seetam nii, domi hai sintei Seetam wa ce dulum. Na ŋɔi í jɔ̀ Jesu, amai Ilaaɔ̃, í naa ku kpaò icɛi Seetam.

⁹ Inɛ iyi í jɛ amai Ilaaɔ̃ fei, ci ya maa mɔsi dulum ku ce, domi kuwɛɛi Ilaaɔ̃ í wa siɛ. Kaa yɔkɔ ku maa ce dulum, domi í jɛ amai Ilaaɔ̃.

¹⁰ Nsɛi, aa ka yɔkɔ ka mà inɛ ŋa iyi à jɛ amai Ilaaɔ̃ ŋa do inɛ ŋa iyi à jɛ ti Seetam. Inɛ iyi kù waa ce mii iyi í jɛ dee dee fei, do inɛ iyi kù bi kpaasiɛ, kù jɛ ti Ilaaɔ̃.

Ka bi njɛ

¹¹ Ide iyi ì gbɔ hai sinte ŋa, nŋui í jɛ ka bi njɛ,

¹² nɔ ka maà yɛ bɛi Kaɛ̃ɛ inɛi Seetam inɛ laalɔu, nŋu iyi í kpa ifɔɛ. Na mii í ce í kpaa. Í kpaai si na iyi í jɔ̀ kuceɛ í jɛ laalɔ, nɔ ti ifɔɛ í jɛ jiida.

¹³ Iŋɛ inɛm ŋa, bii inɛi andunya ŋa à cé ŋɛ, i maà jɔ̀ ku mu ŋɛ biti.

¹⁴ À mà iyi à kua ikui, nɔ à lɔ si kuwɛɛ si na iyi í jɔ̀ à bi kpaasi nwa ŋa. Inɛ iyi kù nɛ kubi, si ikui í wa.

¹⁵ Inɛ iyi í cé kpaasiɛ fei, woo kpa inɛi. Iŋɛ taka nŋɛ ì nɔ ì mà ŋa iyi woo kpa inɛ ci ya nɛ kuwɛɛ hai tã.

¹⁶ À mà bɛi kubi í yɛ si na iyi í jɔ̀ Kirisi í na kuwɛɛɛ na iri nwa. Na nŋu, awa mɔ ka na kuwɛɛ nwa na irii kpaasi nwa ŋa.

¹⁷ Bii inɛ gɔ í nɛ amani si andunyau ihɛ̃, nɔ í yɛ kpaasiɛ í wa si are nɔ í toaa anyi, bɛirei kubii Ilaaɔ̃ á ce ku wa si inɛɛu bɛ.

¹⁸ Iŋɛ amam ŋa, i maà jɔ̀ ka bi njɛ do ide ku fɔi gɛlɛ nŋu akã, amma ka bi njɛ do ntɔ do si kuce.

Laakai ku sũ si wajui Ilaaɔ̃

¹⁹ Njɛ ku bi si kuce nwa á jɔ̀ ka mà iyi à jɛ ti ntɔ, nɔ laakai nwa á maa sũi bi Ilaaɔ̃.

²⁰ Baa bii idɔ nwa wa yɛ taale nwa à mà iyi Ilaaɔ̃ í re idɔ nwa í nɔ í mà mii fei.

²¹ Na nŋu, iŋɛ baakɔɔm ŋa, bii idɔ nwa kù waa yɛ taale nwa, à nɛ laakai ku sũ bi Ilaaɔ̃.

²² Nɔ mii iyi à tɔɔɛ fei á mu nwai, domi à waa jirima woodaɛ ŋa nɔ à waa ce mii iyi á dɔ̃aa si.

²³ Woodaɛu wee. Ka dasi Amaɛ Jesu Kirisi naanɛ, nɔ ka bi njɛ si bɛi í jilɛ nwa.

²⁴ Inɛ iyi wa jirima woodai Ilaaɔ̃ ŋa, í wa si Ilaaɔ̃i nɔ Ilaaɔ̃ mɔ í wa si lafɛ̃ɛ. Hundeɛ iyi í mu nwai í jɔ̀ à mà iyi í wa si wa.