Zãa 1, 2 - Bibeli do fee

Kirisi* wa sobi wa

¹ Iŋɛ amam ŋa, ǹ kɔ nŋɛ ideu ihɛ̃ wai ku ba i maà ce dulum ŋa. Amma bii inɛ gɔ í ce dulum, à nɛ inɛ gɔ iyi á tɔɔ nwa suuru bi Ilaaɔ̃ Baaba, nŋui í jɛ Jesu Kirisi inɛ dee deeu.

² Nŋu takaɛ í ce kuweei araɛ ku ba ku kpa idei dulum du wa, amma kù jɛ ti awa akã, do ti inɛi andunya feii.

³ Bii à waa jirima woodaɛ ŋa, si bɛɛbɛi aa ka mà iyi à màa.

⁴ Bii inɛ gɔ í ni nŋu í màa, nɔ kù waa jirima woodaɛ ŋa, lafɛ̃ɛ ilu iboi, ntɔ kù wa siɛ.

⁵ Amma inɛ iyi wa jirima ideɛ, siɛi kubii Ilaaɔ̃ í ya kɔ̃ do ntɔ. Mii iyi á jɔ̀ ka mà iyi à nɛ anu akã do nŋu wee.

⁶ Inɛ iyi í ni nŋu í nɛ anu akã do nŋu, lafɛ̃ɛ í nɛ ku maa nɛi bɛi Jesu takaɛ í nɛ.

Wooda* titɔ̃

⁷ Iŋɛ baakɔɔm ŋa, kù jɛ wooda titɔ̃i ǹ kɔ nŋɛ. Wooda nwoi, iyi ì nɛ hai sinte wo ŋa. Wooda nwou, nŋui í jɛ ide iyi ì tako ì gbɔ tã ŋa.

⁸ Do nŋu fei, wooda iyi ǹ wa n kɔ nŋɛu ihɛ̃, inɛ nŋu wooda titɔ̃i, nɔ à waa yɛ ntɔɛi si Kirisi do si iŋɛ taka nŋɛ, domi ilu kuku wa sɛkɛɛ, nɔ inya kumá ntɔ wa daana.

⁹ Inɛ iyi í fɔ wa ni nŋu í wa si inya kumá nɔ í cé kpaasiɛ, si ilu kukui í wa hee nsɛi.

¹⁰ Inɛ iyi í bi kpaasiɛ, lafɛ̃ɛi í wa si inya kumá, nɔ nkãma kù wɛɛa iyi á dasiɛ dulum.

¹¹ Amma inɛ iyi í cé kpaasiɛ, si ilu kukui í wa, si ilu kukuu mɔi í nɔ wa nɛ si. Kù mà bii wa bɔ, domi ilu kukuu í dasiɛ fɛɛju.

¹² Ǹ wa n kɔ nŋɛ wai, iŋɛ amam ŋa, si na iyi í jɔ̀ Ilaaɔ̃ í nya dulum du ŋɛ na irii Jesu.

¹³ Ǹ wa n kɔ nŋɛ wai, iŋɛ baaba ŋa, si na iyi í jɔ̀ ì mà inɛ iyi í wɛɛ hai sinte ŋa. Nɔ ǹ wa n kɔ nŋɛ wai, iŋɛ awaasũ ŋa, si na iyi í jɔ̀ ì jɛ Seetam inɛ laalɔu igũ ŋa.

¹⁴ Ǹ wa n kɔ nŋɛ má, iŋɛ amu ŋa, si na iyi í jɔ̀ ì mà Ilaaɔ̃ Baaba ŋa. Nɔ ǹ wa n kɔ nŋɛ má, iŋɛ baaba ŋa, si na iyi í jɔ̀ ì mà inɛ iyi í wɛɛ hai sinte ŋa. Nɔ ǹ wa n kɔ nŋɛ má, iŋɛ awaasũ ŋa, si na iyi í jɔ̀ ì nɛ gbugbã ŋa, nɔ idei Ilaaɔ̃ í wa si ŋɛ, nɔ ì jɛ Seetam inɛ laalɔu igũ ŋa.

¹⁵ I maà ti i bi andunya ŋa do mii ŋa iyi à wa si andunya. Inɛ iyi í bi andunya, kubii Ilaaɔ̃ Baaba kù wa siɛ,

¹⁶ domi mii iyi í wa si andunya fei, hai kubi nfe nfei amanɛ, do kɔdɛɛi mii iyi iju wa yɛ, hee do faau ku ce, gɔgɔɛ gɔ kù waa naa hai bi Baaba, bii kù jɛ hai si andunya.

¹⁷ Andunya í nɔ wa tã mbɛ do binɛɛ, amma inɛ iyi wa ce idɔɔbii Ilaaɔ̃ á maa wɛɛi hee do ajɔ fei.

Mbɛɛi Kirisi*

¹⁸ Iŋɛ amam ŋa, kɔɔi andunya í maai wa. Si bɛi ì gbɔ ŋa à ni inɛ gɔ iyi í jɛ mbɛɛi Kirisi á naa, wee nsɛi, mbɛɛi Kirisi nkpɔ í to wa. Ŋɔi í jɔ̀ à mà iyi kɔɔi andunya í maai wa.

¹⁹ Mbɛɛ ŋau, hai si inɔ nwai à fita, amma a kù jɛ inɛ nwa ŋa, domi bii à jɛ inɛ nwa ŋai wo aa wa inɔ nwa. Amma à fita ku ba ka mà iyi kãma nŋa kù jɛ inɛ nwai wo do ntɔ.

²⁰ Amma iŋɛ ì ba Hundei Ilaaɔ̃ hai bi Inɛ Kumáu ŋa, nŋui í jɔ̀ iŋɛ fei ì nɛ kumà ŋa.

²¹ Bii ǹ wa n kɔ nŋɛ, kù jɛ a ni i kù mà ntɔ ŋa, amma si na iyi í jɔ̀ ì màa ŋai, ì nɔ ì mà ŋa iyi ibo kãma kaa yɔkɔ ku fita hai si ntɔ.

²² Yooi í jɛ woo sɔ ibo bii kù jɛ inɛ iyi í ni Jesu kù jɛ Kirisi. Lafɛ̃ɛ mbɛɛi Kirisii iyi wa kɔ̀si Baaba do Ama ajɔ.

²³ Ntɔi inɛ iyi í kɔ̀si Ama, kù nɛ Baaba. Inɛ iyi í gba Amau í nɛ Baau mɔi.

²⁴ Iŋɛ mɔ, ide iyi ì gbɔ hai sinteu i jɔ̀ ku wa si idɔ nŋɛ. Bii í wa si idɔ nŋɛ aa nɛ anu akã ŋa do Ama do Baau.

²⁵ Kirisi í ce nwa kuwã. Kuwã iyi í ce nwau, nŋui í jɛ kuwɛɛ hai tã.

²⁶ Iyi ǹ kɔ nŋɛu ihɛ̃, ǹ kɔɔ wai na inɛ ŋa iyi à waa bi a dasi ŋɛ kurara.

²⁷ Amma iŋɛ, Hundei Ilaaɔ̃ iyi Kirisi í na ŋɛu, í wa si ŋɛ. Na nŋu, i kù nɛ bukaatai inɛ gɔ ku kɔ nŋɛ si cioi ngɔgɔ, domi Hundeu wa kɔ ŋɛ si cioi mii fei iyi í jɛ ntɔ, ibo kù wa si. Na nŋu, i jɔ̀ i nɛ anu akã do Kirisi ŋa, si bɛi Hundei Ilaaɔ̃ í nyisi ŋɛ.

²⁸ Nsɛi, iŋɛ amam ŋa, i jɔ̀ i nɛ anu akã do Kirisi ŋa, ku ba ajɔ iyi á faata wa ka nɛ idɔ ku buba, nɔ anyɔ ku maà mu wa si wajuɛ si ajɔ iyi á nyi wau.

²⁹ Si bɛi ì mà ŋa iyi Kirisi í jɛ dee dee, i jɔ̀ i mà ŋa iyi inɛ iyi wa ce dee dee fei amai Ilaaɔ̃i.